ASO LUA, 9 APERILA 2024 @10:00 I LE TAEAO
Ou te fa’atalofa atu i le pa’ia mauāluga o lenei sauniga. Susū o lau susuga i le Ta’ita’i o le Sauniga, lau Susuga i le Faifeau Toeaina, o le Toeaina Fa’atonu – Rev. Enefatu Lesā. E fa’apea fo’i le aufaigaluega pa’ia a le Atua ua o tatou mafuta i lenei taeao. Ua afio mai lau afioga i le Ao Mamalu o le Mālō ma le Masiofo, Le pa’ia o le Tafatolu o le Faigāmālō Tuto’atasi o Samoa. Le pa’ia o ‘āiga, o paolo ma gafa. Lau afioga i le Faletua ma le nofoaalo. Ou te fa’atulou atu.
E fa’atulou atu fo’i i le pa’ia o le afio’aga nei. Auā le afifio o Alalatama, afifio Tuisugaletauā ma Luamanuvae. Alalata’i Pulemagafa ma le Faigā, ma le mamalu iā Saleupolu. Maumau e, pe ana o se fa’anofotupu, po’o se fa’afotu. A’o lea ua o tatou feiloa’i i le fusialo, ina ua tō le ua fa’avauvau, ma tafea le tauofe i Pili’ōua, Faleipouiva, ma Fatutolo, ona o le valaau pa’ia a le Atua i le afioga iā Tuisugaletauā Sofara Aveau.
E manomano fetu o le lagi, ae iloga fetu pupula. E tele matāmatagi o le atunu’u, ae iloga ona matagi folau. Afai e se’e i le malū, ona foe lea o pese. Afai fo’i e folau i le taili ma le fa’ali’ali’a, e mau le to’ovae, ma sapaitali gasegase o le toelau. E afua ai le malu o ‘āiga ma nu’u, e sei a’i le talalelei, ma nanea ai le tautua i le Mālō ma le atunu’u.
O le agaga lea o lenei taeao, i le auai mai o le tatou Mālō. E molimoli le fa’afetai ma le fa’amālō i le tautua a le afioga iā Tuisugaletauā i le Mālō ma si o tatou atunu’u. O se tasi o tamāli’i na afu lana tautua i Matāgaluega a le Mālō na galue ai. O lona mā’elegā ma lona fa’amaoni, na o’o ai lava ina avea ma Fa’auluuluga o le Matāgaluega o Fa’ato’aga ma Faigāfaiva i le tele o tausaga.
Na mua’i filifilia Tuisugaletauā e avea ma Sui Usufono o le Palemene i le Paeā’iga lona 13, mai le 2001 – 2006, mai le Itumālō Fa’aalalafaga o Vaimauga i Sasa’e. I lea lava nofoā’iga na tofia ai e avea ma Minisitā o le Matāgaluega o Fa’ato’aga, Vaomatua ma Faigāfaiva ma le Va’ai Tau.
Na soso’o ai ma le Paeā’iga lona 14 a le Palemene, na tofia ai e avea ma Minisitā o le Matāgaluega o Puna’oa Fa’alenatura ma le Si’osi’omaga, Fa’alapotopotoga o ‘Ele’ele a le Mālō ma le Pulega o Suāvai. Na toe fetu’una’i i le 2006 matāfaioi fa’aMinisitā o le Kapeneta, ma tofia ai Tuisugaletauā e avea ma Minisitā o le Matāgaluega o Galuega Tetele, Fela’uā’iga ma Atina’e ‘Ese’ese.
O le Paeā’iga lona 15 mai i le 2011 – 2016 na tofia ai Tuisugaletauā e avea ma Minisitā o le Matāgaluega o Feso’ota’iga ma Fa’amatalaga Tekonolosi. E tolu paeā’iga soso’o sa tau’aveina ai e le afioga iā Tuisugaletauā le Tofi o le Itumālō. Ou te talitonu, sa tu mauāluga ai le Itumālō i ‘upufai o Mālō, aemaise o lona sao i le Kapeneta.
A’o matou galulue ai i le laulau a le Kapeneta, o se tamāli’i e agamalū. E lē so’ona si’i, ae sa finau ina ia si’itia auaunaga a le Mālō sa i lalo o lana va’aiga, se’i tali manaoga o le atunu’u.
O lo’o silafia fo’i e le tatou Nu’u ma le Itumālō, o Tuisugaletauā o se tamāli’i e lagolago tele i atina’e a le Mālō. E le gata i atina’e o lo’o i totonu o le Vaimauga, ae fa’apenā fo’i i le atunu’u atoa. E pei o le toe tatalaina o le malae va’alele i Fagali’i i le tausaga na te’a nei, ua mafai ai ona toe fa’aauau lea tautua a le Mālō mo le mamalu o le atunuu fegāsoloa’i, i le va o Samoa ma Amerika Samoa.
Ou te momoli ai le fa’afetai tele a le tatou Mālō i le tautua a le afioga iā Tuisugaletauā. Fa’amālō le tautua Mālō, fa’afetai le tautua i le Itumālō ma le atunu’u. O lea ua fai i lagi lana folauga, ae manatua pea lona sao ma lana tautua iā Samoa, ma e autupulagā.
E silafia uma e le matou vasega o Faipule, e le’o ni tofiga faigofie, tofi o Itumālō i le Palemene. Auā e aofia uma ai le ‘āiga ma le nu’u, o le to’alua ma le fanau, e lagolago ma fa’amalosi’au. E lē taumate, sa fa’apenā le afioga iā Tuisugaletauā i lona tula’i mai ai i le tofi o le Itumālō. Ou te fa’afetai atu ai i le Faletua iā Salā ma le nofoaalo, aemaise le pa’ia o le Itumālō ma le Afio’aga nei. O lo outou lagolago ma le fa’atuatuaina o Tuisugaletauā i le 15 tausaga na ia tau’aveina ai le Tofi o le Itumālō, sa ia lototele ai i ‘upufai o Mālō, ma mā’elega ai e tautua si o tatou atunu’u.
O le tatalo a le tatou Mālō, ia fa’amafanafanaina e le Agaga o le Atua le pa’ia o ‘āiga, o paolo ma gafa. Ia fa’alototeleina le Faletua ma le nofoaalo. Ia mālōlō atu ma le manuia le Afioga iā Tuisugaletauā i lona tu’ugamau, se’ia o’o i le aso e afio mai ai lo tatou Ali’i o Iesu e si’itia lana Ekalesia i le nofoali’i o le alofa tunoa. Ia tafimala le pa’ia o le afio’aga i ona tupu ma ona e’e. Ia manuia lau Susuga i le Ta’ita’i o le Sauniga, aemaise Samoa ua potopoto.
SOIFUA.
