Lau Susuga i le Taitai o le Sauniga, Susuga Komisi Samuelu,
Afioga i Minisita o le Kapeneta,
Taitaifono ma le Komiti Faatonu o le Faletupe Tutotonu,
Fa’auluuluga o Matagaluega ma Faalapotopotoga a le Malo,
Pule Sili o Faletupe o Fefaatauaiga,
Pule Sili o le Kamupani o le APEX Solutions Ltd,
Pule Sili o le Kamupani o le SUCON Consultancy Ltd
faapea le mamalu tauee o Samoa ua potopoto
O lea ua mapu i le tuasivi le fagotaga a le manusina, auā faiva o le Alii-seu o le Talalelei, e tusa ma le taulaga molia, auā so tatou va lelei ma le Tapa’au Sili i le lagi. Faafetai tele i lau susuga i le Faafeagaiga. Ia agalelei le Atua ma utupūpūina fulu o le segaula aua le feagai ai ma le valaauina.
Ae tau ia ina ou sāua le va, ona o Samoa o le Ao Mamala. Tulou tupua tausi o le afioaga nei, i Lepea ma Vaitagutu, e afio ai le Afioga i le Faumuina, o le Tupufia. Susū ai Usoalii ma Tāmāpaa. Susu i la’ua o Nofoasā, Ai’i ma Vaitagutu. Alalatai le mamalu o le Tauaitu ma le saofaiga ma Atua.
O paia o lena e i aao o le To’afa o Igoamatua, o la latou fatuaiga tausi lea.
O le auga o aute ma le faamoemoe autu o lenei aso, o le faailoa aloa’ia lea o le amatalia o galuega faatino i le fausiaina o le maota poo le nofoaga e tua i ai le ofisa autu a le Faletupe Tutotonu o loo i Apia. O lenei fale e faalagolago ma toomaga i ai le ofisa autu a le Faletupe Tutotonu i taimi o faalavelave faafuasei ma mala faalenatura.
E talitonu e le o toe po se silafia i le faatupulaia o mala faalenatura e pei o afa ma matagi malolosi, lologa, mafui’e, tsunami ma faamai tetele ona o le suiga o le tau ma le natura o le siosiomaga.
O le agaga la o lenei galuega, ina ia mafai ona fa’aauau pea le faatinoga o auaunaga a le Faletupe Tutotonu i taimi e feagai ai ma nei luitau.
O lenei fale e tolu fogafale ma o le a fa’aaoga uma e le Faletupe Tutotonu mo le teumaluina o tupe, faapea masini ma galuega faatekonolosi, auā le puipuiga malu o faamaumauga ma faamatalaga o galuega a le Faletupe Tutotonu faapea ai ma le nofoaga mo le aufaigaluega o le a faatinoina nei vaega uma.
O lenei galuega o le a faatupeina lava e le Faletupe Tutotonu mai i lana Tala Faatatau o le Tupe, i le tau e tusa ma le $31 miliona. Ma, e fuafua e fausiaina lenei fale i le umi e tusa ma le 20 masina.
O lenei galuega o le a fausia e le kamupani o le Apex Solutions Ltd, i le mae’a ai o iloiloga o faiga fa’atauofo a le Malo (Tenders Board Procurement Process)
O le ata o lenei galuega sa tusia e le kamupani a le SUCON Consultancy Ltd. O latou foi lea o le a gafa ma le va’ava’aia ma mātaitu lelei le faatinoina o le galuega, e tusa ma aiaiga, seia oo ina mae’a lelei ma atoatoa ma tuuina mai i le Faletupe Tutotonu mo le fa’aaogaina.
E momoli le faafetai i le Komiti Faatonu ma le Pulega a le Faletupe Tutotonu o Samoa, mo le finau maua’i e faatino lenei galuega tele ma le taua. O se galuega e aoga, e le gata mo le faatinoga o galuega fa’aauau a le Faletupe Tutotonu, ae mo le aotelega o fuafuaga a le Malo.
O le tatalo ia agalelei le Atua. Ia uli ma sao le amataina faapea le faatinoga o lenei galuega seia mae’a atoatoa. E talitonu ua faatasi mai lo tatou Matai Sili i lo tatou faamoemoe, e pei ona tomatauina ai i tatou e le Susuga i le Faafeagaiga.
Ia alofagia e le Atua fuafuaga o totoe o lenei aso.
Soifua ma ia manuia.
