Lau Susuga i le Taitai o le Sauniga, Susuga Rev Aliilelei Lefua,
Lau Sususga i le Peresitene o le Asosi o Puleaoga i Kolisi, Susuga Rev Fuatimu Posese,
Sui o le Faletupe o le BSP o loo lagolagoina lenei faamoemoe,
Susuga i Alii ma Tamaitai Puleaoga o Kolisi,
Le Paia ma le Mamalu o le Tapuaiga a Matua,
Alii ma Tamaitai faiaoga, aemaise o alo ma fanau e faasinotonu iai lenei vaiaso o le Sailiga Siamupini o Taaloga Lakapi a Kolisi
Ua mae’a ona togi i le lagi le tupe o le taulafoga nai Fitilagi pupula. Ua fana fo’i i le lagi le afi mua na i Niniva ma Punialava’a i le vi’iga ma le fa’amanū, ona o le alofa ma le agalelei o le Atua ua maua ai lenei taeao. Tau lava ina ti’aulutonu ma lele fa’a ti’amalie i lagī lona vi’iga nei e o’o i le fa’avavau.
O lele fo’i ua mae’a ona tapui ma paniniu le tafatolu o pa’ia ua aofia nei, a’o pa’ia fo’i ma mamalu le avea o ele’elesā ma fanua tapu o lo’o tatou tapisa ai nei, e le toe afea e se tala ae na ona ou fa’atulou i ai.
Ae faaleoina le agaga o le faafetai i Lau Susuga I le Taitai o le Sauniga, o lau saunoaga tima’i ma faamalosiau i alo ma fanau a le atunuu i lenei taeao, manatu o le a fesoasoani tele i le faiga o a latou faaiuga i totonu ma fafo mai o le malae. O la matou tatalo ia saga faamanuia le Atua I le valaauina, maua sou finagalo auā le Atua ma Lana Galuega.
Faafetai i le Asosi o Puleaoga i le amanaiaina e ala i le valaaulia faaaloalo.
Ua tatou iai le asō e molimauina le taua o mafaufauga e ala i faatinoga a fanau i le taaloga o le Lakapi, o le taaloga ua lauiloa ai Samoa i le lalolagi ua le gata i le ta’itoafitu, ae faapena foi I le sefululima (15). O le taaloga sa ave iai le faamuamua mo na o alii, peitai, o lea foi ua aofia ai ma tamaitai e pei foi ona iai le faamoemoe i lenei vaiaso. O le silasila mamao a le Malō, ia faatauaina tamaitai e ala i avanoa tutusa, ua le gata i galuega ma matātā, ae ua faapena foi i le avea ma tagata taalo ma pulega i taaloga.
Faamalō i le tatou Asosi o Puleaoga mo le faatulagaina o taamilosaga e tapu’e ma atinae ai pea tomai ma agavaa o fanau i taaloga, tele foi taimi e taula’i atu ai le aoaoina o mataupu i le poto salalau ma le mafaufau mo so latou lumanai manuia, ae ua misia ai a tatou meaalofa o taleni ua
faamanuiaina ai e le Alii ia ni isi o fanau.
E faapitoa se faamatalaga mo alii ma tamaitai o le a tausiniō i lenei vaiaso i taaloga, o avanoa o mea e le au maua, e le mautinoa pe toe sau pe leai foi.
O le valaaulia e mafai ona faalautele atu, ae o ē e filifilia, ua na o se vaega to’aititi. O lea e malaga mai a tatou Kolisi mai Salafai ma ‘au mai Kolisi i tua, ua tuua ai isi fuafuaga a faiaoga ma outou le fanau sa tatau ona fai i le tuuaga, peitai, ua silafia e le Asosi o Puleaoga le tāua o taaloga i lo outou soifua aoaoina.
O le ala foi lea e faamanatu ai pea i a outou le fanau, ia faaaoga lelei avanoa, avanoa sa outou malaga mamao mai ai, avanoa e faailoa atu ai i faiaoga, o loo iai se meaalofa faapitoa ia te oe, faailoa atu ai i ou matua, o lou lumanai lea.
Mo Alii ma Tamaitai faiaoga o loo gafataulimaina ma aoaoina a tatou au taaalo, faamalo le onosai, faafetai le manatu i lo outou valaauina auā se lumanai manuia o fanau a le atunuu. I le avea ai ma Minisita o Taaloga ma Alagaoa mo le Fiafia o Tagata, oute lagolagoina ma talisapaia ma le agaga faafetai a outou taumafaiga uma e atinae ai taaloga i Aoga. E talitonu le faamoemoe, e iai le taimi ma le aso, o le a toe foi mai ai fanau ma faafetai atu mo ā outou galuega lelei.
Faafetai atu i matua i la outou lagolagosua i nai o outou alo ma faiaoga, o le tasi lenei vaega tāua i taumafaiga a tatou fanau, o le manaomia lea o la tatou lagolago mo i latou, ia le gata i aoga, ae ia faapena foi i taaloga. A fai e iai se aoga o loo galulue faatasi itutino uma nei i le taumafaiga o au taaalo, e le taumate o i latou na o le a faamanuiaina ma faapaleina i le taamilosaga lenei.
Oute faamanatu atu i le Komiti ma i latou uma o le a faatautaia tatou taaloga, ia fai malū o outou faiva, ia to’afilemu mea uma, ma ia faia mea uma e tusa ma le tulafono.
Tatou le fanau, taalo i le mea e gata ai lou mafai, taalo fiafia, taalo tausaafia, taalo mo sou avanoa e avea ai ma avefu’a a Samoa i sana au faavaomalo ia le gata i le taimi nei, ae o le lumanai.
Ia faamanuia le Atua i lo outou faamoemoe i lenei vaiaso, ia taulimaina i lona agalelei fuafuaga uma ma ia iai lona filemu i taaloga a le fanau.
OUTE FIAFIA E FAAILOA ATU, UA TATALA ALOAIA LE SAILIGA SIAMUPINI O LE TAALOGA LAKAPI A KOLISI 2024.
SOIFUA MA IA MANUIA.
