SO’O’UPU A LE MĀLŌ: O le taeao nei, na faia ai le Sauniga Fa’aleMālō o le Afioga i le Tama’ita’i Sā iā Sr. Malia Emanuela Betham.
O le Afioga i le Tama’ita’i Sā, sa fa’ae’e atu ai e le Mālō i le tausaga ua mavae 2023, le fa’ailoga tauāloa o le Poloā’iga mo Galuega Maoa’e ma le Ta’uleleia (Order of Merit), e ala i lana tautua matavela i lana auaunaga iā Samoa i le itu tau a’oa’oga.
O le Tama’ita’i Sā iā Sister Emanuela Betham (S.M.S.M. Anna Betham), ua fa’amauina o se ulua’i Tama’ita’i Sā Samoa lea, na tofia e avea ma Pule’āoga mo le Kolisi Sagata Maria i Vaimoso mai le tausaga 1976 se’ia o’o mai i le tausaga 1981.
I lenei tausaga, ua fa’amauina, ua 88 tausaga o lona soifua, na soifua mai i le Aso 20 Ianuari 1936, mai lona afio’aga o Samusu Aleipata.
O ia o se tasi o ulua’i Samoa na fa’au’uina mai i le Iunivesite Aoao o le Pasefika i Saute i Fiti i le 1973 ma mua’i galue ai i le Mālō mai le tausaga 1952 i le 1953.
Sa tautua i le Ofisa Tutotonu o le Ekalesia Katoliko i Roma i Italia i le tausaga e 1987, ona toe fa’aauau ai i le tausaga 1997 se’ia o’o atu i le tausaga e 2001.
Sa ia tau’aveina fo’i tofiga o le fai’āoga mo le Kolisi Telosia i Moamoa amata mai i le 2017 – 2021. Ua silia i le 69 tausaga o galue i le Ekalesia Katoliko aemaise lava i le galuega fa’afai’āoga.
O lana tautua ua afu sisina, ma lona sao tāua i le fa’afaileleina o le soifua tuputupu a’e o fanauiti, aemaise o le ola fa’aleagaga o tagatānu’u Samoa, sa a’e ai le tōfā ma le fa’autaga i le Mālō, ina ia fa’ae’eina atu ai, le fa’ailoga tauāloa o le Poloā’iga mo Galuega Maoa’e ma le Ta’uleleia (Order of Merit) mo Sister Emanuela Betham i le tausaga ua mavae 2023.
O lea Poloā’iga mo Galuega Maoa’e ma le Ta’uleleia, e fa’ae’eina atu i ‘ai latou sa faia ni tautua maoa’e mo Samoa e le gata i totonu o le atunu’u ae fa’apea fo’i i tulaga fa’avāomālō po’o ni tagata sa tu’uina atu ni saofaga maoa’e mo le unā’ia o so’o se taumafaiga aemaise lava le tu’uina atu o le fa’amamafa i le atina’e poto salalau, a’oa’oina, tusia o tusi, fa’asaienisi ma matā’upu fa’alelotu.
O Lana Afioga i le Ao Mamalu o le Mālō iā Tuimaleali’ifano Va’aletoa Suālauvī II, sa ia fa’ae’eina atu lenei fa’ailoga tauāloa mo le afioga i le Tama’ita’i Sā, e pine fa’amau ai lana tautua fa’amalie loto, e pei ona molimauina i fanau atamamai ua i ai nei.
O le Afioga i le Sui Palemia iā Tuala Tevaga Iosefo Ponifasio, na ia tau’ā’aoina le tagāvai o Samoa i le ‘Āiga Tama’ita’i Sā, o le fa’aaloalo mauāluga a le Mālō ma Samoa aoao, i le soifua tautua o lenei toa manumanu o le talalelei ua fai i lagi lana folauga.
Ata Pu’eina: [Mālō Samoa] Taunuuga Toatasi.
