(ASO TOFI, 30 ME, 2024 ILE 9:30 ILE TAEAO)
E’eta’i ia le paia maualuga i le susu ai o lau
Susuga le Ta’ita’i o le Sauniga, Rev. Latu Latai
Afio lau Afioga ile Sui ole Fono o Sui Tofia Hon. Lemamea Tuiletufuga Ropati Mualia
Afifio Minisita o le Kapeneta.
Afifio Minisita Lagolago.
Susuga ile Amepasa o le Malo o Saina i Samoa, Your Excellency Mr. Fei Mingxing.
Lau susuga ile Sui o le Zheng Tai Group.
Afifio Fa’auluuluga o Matagaluega ma Fa’alapotopotoga Eseese o le Malo.
Afifio Sui o Komiti o A’oga ma Pulea’oga o A’oga ua fa’amanuiaina i lenei fa’amanuiaga.
Ae a le paia maualuga o Samoa ua potopoto.
O lea ua mae’a ona momoli le tatou mua male fa’asao i le Tama oi le lagi, e fa’afetaia ai lona alofa ma lona agalelei fa’asoa, ua mafai ai ona tatou feiloa’i i le pu’e o manū, ae le o pu’e o mala, i lenei taeao matagofie.
E ao ai lava ona fa’apoipoi se fa’amatalaga, e faigata o Samoa e mamala tala, toe mamala le palapala. Fa’atulou ai i tua o Sinave ma Uluomoto’otua, aua le Afifio o Alo o Sina ma le Fuaifale o Salevalasi. O lo’o tausiva’atele e le fetalaiga i le Faletolu ma le Vainalepa ma Tuisamau. Tulou Tulou Tulouna ia.
Taoto pa’ia o Samoa ua aofata i ulumauga ma ua lalago i malae ma maota, e le toe maveve i se faamatalaga a le Malo.
A’o le asõ ma le tatou feiloa’iga, o le fa’ailoa aloa’ia lea o le amatalia o galuega fa’atino i le fausiaina o falea’oga fou mo a’oga tulagalua e tolu, e aofia ai: le Aoga Tulagalua a Apia, Aoga Tulagalua a Lepea ma le Aoga Tulagalua a St. Theresa.
O nei galuega e tolu (3) o le a fa’atupeina i lalo o le fesoasoani a le Malo o Saina.
O lenei avanoa taua, o le a toe fausiaina ai i tulaga aupito sili ona lelei ni falea’oga fou mo alo ma fanau a nu’u ma afio’aga e pei ona ta’ua. O le fa’amoemoe, ia mautinoa e lelei ma atoatoa le tulaga o nofoaga ma falea’oga e fa’aaogaina e alo ma fanau, mo le a’oa’oina o le poto salalau. E le gata i lena, ia mautinoa e lelei le si’osi’omaga mo galuega a ali’i ma tama’ita’i faia’oga o loo feagai Iatou ma le a’oa’oina o le fanau.
O nei galuega e tolu ua mae’a ona galulue ai le Malo o Saina ma a’oga ua faamanuiaina, fa’atasi ma Matagaluega ma Pulega a le tatou Malo o lo’o nafa ma le mata’ituina o galuega tetele fa’apenei, ina ia mautinoa e sosolo lelei le fausiaina o nei galuega, i luga o tatou tulafono ma ta’iala tau atina’e ua mae’a ona pasia ma fa’amamaluina e le tatou Malo. O lona tau atoa e US$11mil po’o le ST$30 miliona tala Samoa.
O le Kamupani ua filifilia e galulue i le fausiaina o nei galuega o le ZHENG TAI GROUP.
O le a galulue so’oso’o tau’au lava le tatou Malo e tauala atu i le Matagaluega o A’oga ma Aganu’u ma Matagaluega a le Malo e aofia ai le Matagaluega o Galuega, Felauaiga ma Atina’e Eseese ale Malo, Matagaluega o Puna’oa Faale-natura, Siosiomaga ma Eleele, Pule’aga ole Malosi Faaeletise ma le Pulega ole Suavai mo le mata’ituina o le galuega, ina ia mautinoa o lo’o mulimulita’ia ta’iala ma faiga fa’avae mo le fausiaina o nei galuega tetele.
E momoli le fa’afetai tele i le Malo o Saina, e tusa ai ma lenei fesoasoani tele ua fa’amanuiaina ai tatou aoga nei e tolu. Fa’afetai foi i Komiti o A’oga ta’itasi mo le sa’ili matagi i auala e fa’aleleia ma faamati’e ai le tulaga o tatou a’oga, aua le a’oa’oina o fanau, ina ia mautinoa e popoto ma atamamai e tautua mo Samoa.
Tatou faanōnōmanu i le Atua, ia ‘au o manū le tapenaga ma le amataina o nei galuega seia o’o ia fa’amae’aina atoatoa. E i ai foi le taofi, o le auai mai o le ATUA i lenei aso e ala i le tatou taulaga mōlia i le taeao, o le fa’ailoga lea o manuia mo lenei galuega.
Ia agalelei ma alofagia e le Atua fuafuaga ma lavasiga eseese o totoe o lenei aso.
SOIFUA MA IA MANUIA!
Ata Pueina – Malo o Samoa (Pule Puleina)
