Malelega a le Afioga i le Ao Mamalu o le Malo – Tuimalealiifano Vaaleto’a Sualauvi II i le 62 Tausaga o le Tutoatasi, 03 Iuni 2024 – Mulinuu Apia, Samoa
Oute muai faatulou ma faatalofa atu i lau Susuga i le Taitai o le Sauniga,
lau Afioga Father Moea’iseu Raymond Betham, faapea
Lau afioga i le Sui o le Fono a Sui Tofia
Lau afioga i le Tamaitai Palemia ma le Kapeneta, ma Minisita Lagolago
Lau afioga i le Faamasino Sili ma le Vasega o le Faamasinoga
Lau afioga i le Fofoga Fetalai ma Sui Mamalu o le Palemene
Lau Afioga i le Ulu o Tokelau
Lau afioga i le Loia Sili o Amerika Samoa
Members of the Diplomatic Corps
Faauluululuga o Matagaluega ma Faalapotopotoga a le Malo,
Pisinisi ma le Vaega Tumaoti
Le Paia maualuga o le Aufaigaluega totofi a le Atua,
Ae tainane le Paia o Samoa I totonu o lo tatou atunuu ma e o loo papa a’ao i atunuu i fafo, mai lava i ona mauga maualuluga seia paia ona fatu tuloto. O le paia lava lea aua Aiga ma Tama, o Tama ma Aiga, Tumua ma Pule, Ituau ma Alataua, Aiga i le Tai ma le Vaa o Fonoti.
Oute faatulou atu foi i le paia o le faigamalo a Tutuila ma Manu’a.
I le afio o lau afioga i le Kovana ma le Kapeneta,
Afio o le Peresetene ma le maota o Senate,
Afio o le Fofoga Fetalai ma le Fono Faitulafono,
Afio o le Faamasino Sili ma le vasega o Faamasinoga.
O le paia lava lea auā Sua ma le Vaifanua, Fofo ma Aitulagi, Sa’ole ma le Launiu Saelua. Afio le Laau na amotasi ia Samoa, afifio Faatui ma alalata’i Tootoo o le Faleula, ma upu i le Manu’atele.
O se avanoa le ‘au maua foi lenei ou te faatalofa atu ai i le mamalu o le atunuu ua auai mai mo le savali faaaloalo o lenei taeao, i sui o nuu ma afioaga ma faalapotopotoga eseese, o aufaigaluega foi o matagaluega ma faalapotopotoga a le malo faapea ma pisinisi, o e foi ua faimalaga mai atunuu i fafo i le fia faatasi mai i lenei aso taua o lo tatou atunuu. Ae le faagaloina ai nai Aoga ua faamalolosi mai, ua avea ai nisi o alo ma fanau, o faiaoga ma matua, e fai ma o latou sui. Faafetai le taupati mai ma le lotonuu.
Ua o se fisaga tai folau mauli o le fiafia i lenei taeao fou, ona ua mafai ona tatou toe aleaga pi’ioa i Tiafau nei i le lagi o manū ma le to’a laulelei. O le taeao na atofa, ma le aso na tu’u lagi, lea ua o tatou aulia ai ma le manuia i le pule faasoifua a lo tatou Matai Silisiliese le faamanatuina o le 62 tausaga o lo tatou Malo Tutoatasi. Ia tatou manatua ma sula ai faatasi le faamaoni o le Atua le Tama, le Alo ma le Agaga Paia o loo ua faavaeina ai lo tatou Malo ma le atunuu. Pei ona tatou molimauina pea i aso e taugalemu ai ma aso foi e soua ai la tatou folauga, e ui ina tetele pesega ae matua lava i le oo. AISEA? Aua o le Atua Pule Aoao, na te le tuuna, na te le tuulafoaina foi lana fanau o e faatuatua ma talitonu ia te ia ma le faamaoni.
Faafetai tele le Atua, aua ua e ta’ui Samoa i ou aao faaola ma lou alofa tunoa. “Aua o oe le Alii e, ua fai oe ma o matou talita, o lo matou mamalu foi, ma le faaeaina o matou ulu.” O lou lava poto, ma lou malosi, ma lou tamaoaiga na mafai ai e nai o matou tuaa ua tofafa mai tia sa ona fausia ma atia’e lo matou malo lenei. Ua matou saoloto ma aeae ai nei, ma faaeaina ai o matou ulu i le Vasa Pasefika ma le lalolagi.
Ua laveaina ai Samoa mai fevesiaiga ma taua o loo maumau ai soifua ma aveesea ai le saolotoga ma le saogalemu o isi o matou uso a tagata, i nisi o malo ma atunuu, aemaise foi o aafiaga tuga o mala faalenatura, ma suiga matuia o le tau ua aafia ai le siosiomaga. Faafetai ua matou malu i ou aao agalelei.
Samoa e, o le filemu o le Atua e silisili I mea uma lava. O le faauuga foi o lona taitaiga mamana tatou te taunapo ai pea I le nofo lelei ma le fealofaniga e tusa ma lona finagalo paia ma le Talalelei ia Iesu Keriso. Aua o le manuia ma le filemu moni o Samoa e mai I le Atua ia, o le Ao Faaniutu ma le Afi Faaniutu I le faigamalaga a si o tatou malo ma le atunuu. Aua a tala o tatou gafa, o Samoa lava o le Aiga. A moni foi lo tatou faakerisianoina, o tatou o le fanau a le Atua, o le aiga lava I tatou uma. Tatou te galulue faatasi ai o le auaiga o Samoa, o le auaiga foi ia Keriso, mo le manuia o lo tatou malo ma o tatou tagata, nei ma ielua.
E feagai pea i tatou ma le faatinoga o o tatou faiva eseese, o faatufugaga, o matuaifaiva o le poto ma le atamai, o taleni, ma lo tatou valaauina i tofiga ma auaunaga, e tautua ai Samoa ma lona malo, le atunuu, o ekalesia, o nuu ma aiga. E le o auaoa i le silafaga a le Atua mea uma e faia i le alofa ma le faamaoni, e le maumauina ai lo outou afu liligi, o lo tou sao ma la tou taulaga osi lea, e le gata mo i tatou nei, ae mo le lumanai ma augatupulaga o le a soofauina le galuega mo le manuia o Samoa.
E le mavae le loto faafetai i le Aufaigaluega paia a le Atua, mo la outou osigataulaga faifaipea, o loo outou tulivae ai I le Nofoalii o le Paia e Faavavau, mo Samoa. O lo tatou malosiaga lea, o le tatou taula lea, o le tatou talipupuni lava lea i mailei a le fili o loo le mapu e saili auala tatou te afaina ai. Apo pea ia lo outou faiva, ina ia mumu pea le lamepa o le faaolataga ia Samoa ma lona Malo Tutoatasi. O le tatalo, ia saga faatumuina la outou tofa faaleagaga, auā le Atua ma lana talalelei.
Lau afioga i leTamaitai Palemia, le Kapeneta ma le faigamalo, faafetai tele mo le foeina o le sa o Samoa. E lē faigofie le galuega, aua e fai o le lotoifale, a o le va-i-fafo i faalagamaea a le Pasefika ma le lalolagi. O loo molimauina le tu maualuga pea o si o tatou atunuu i le momoliina o le mau a Samoa, aemaise lo tatou galulue vava lalata ma o tatou uso i le Pasefika mo le atinaeina o le tamaoaiga, le aputiputiina o alaga ‘oa, le puipuiga ma le saogalemu o tuaoi ma o tatou faasinomaga i le Pasefika, faapea ma le tapueina o le soifua maloloina ma tulaga tau aoaoga.
Ae tupito i le saga vanivaniina ma le uunaia o vala uma mo le faaititia o aafiaga o le lalolagi aemaise lava o atumotu laiti e aofia ai Samoa mai suiga ogaoga o le tau, ua faatupulaia. E momoli atu ai le faafetai i lo outou alofaiva ma le sailiga malo, ina ia manuia Samoa. O lea foi ua faailo le igafomua i le tauaofiaga a le Palemene i le faasoaina o le tamaoaiga ma mea e ave iai le faamuamua a le tatou Malo mo le isi tausaga faaletupe o lumanai. Faamalo faafetai le faasoa. Ia saga faaoloaina pea e le Atua la outou tofa, aua le faatautaiga o le Malo o Samoa.
Lau afioga i le Fofoga Fetalai, faapea Sui Mamalu o le Fono Aoao Faitulafono a Samoa, faafetai seu faatamalii. O le vaogagana o le lanu lauava, e faasua ma tali uaga mauga, ae utu vanu ma vaitafe. E afua ai ona mafalā laau matua i auvae mauga, e tafe manino ai vaitafe, e soo gafa ma le sami. E faamaugagana ai le mau, ‘e afua mai mauga le manuia o Nuu’. O outou lava o lupe na fa’ia mai i le fuifui, auā se ‘ai mo le tapuaiga a le atunuu. O manū na o le galuega, ia taitai ma faamanuia pea le Atua ia outou afioga aua lo outou feagai ai ma le lipoiina o upufai o lo tatou Malo.
E momoli atu foi le faamalo i lau afioga i le Faamasino Sili, le Peresetene o Faamasinoga o Fanua ma Suafa, ma Alii ma Tamaitai o le Faamasinoga. Ia malu pea lo outou faiva i le Tulafono, ma ia tulu’i atu e le Atua le tofa ma lona sosia i le atamai ma le poto aua le puipuiga o le amiotonu a le tulafono.
Le paia o Samoa le atunuu pele, mai ona lumā fatutoto seia oo atu i ona si’ufatu tu loto, i Samoa nei faapea foi ma e o i atunuu e mamao. Oute talitonu, poo fea lava o afifio ma papaao ai suli o lo tatou atunuu, e susue lava le faamalama ma vaavaai mai.
Faafetai tele mo a outou tatalo ma le tapuaiga, lo outou alofa ma le agalelei, la outou tautua tuavae ma la outou tautua aitaumalele ina ia manuia faiva o si o tatou Malo, ia manuia foi o tatou nuu, o tatou aiga, ma a tatou Ekalesia. Ia faafoi atu ai pea le viiga ma le faamanu i le Atua i lo outou soifua sailimalo, aua ua avea nisi o outou ma avefu’a mo o tatou aiga, o tatou nuu, a tatou ekalesia, ma le atunuu, e le gata i Samoa nei ae faapea ma malo i fafo. Ua lagona ai le mitamita ma le faagaeetia i lo tou sao i falagamaea, lo outou ausia o faailoga maualuluga faalemalo faapea ma aoaoga, le faaogaina o a outou taleni ma meaalofa mai le Atua, le fausiaina o pisinisi ma atina’e tetele, le valaauina i galuega maualuluga ma tulaga tofi mamalu. Faafetai foi le taofimau i a tatou tu ma aganuu, ma la tatou gagana, aemaise o le faasalalauina o le Talalelei ma le atia’eina o aulotu ma ekalesia i nuu ma atunuu ua outou afifio ai, e faaauauina ai le tapuaiga i lo tatou Atua pei ona sa fofoaina ai lo outou soifua tapuai i Samoa.
E faapitoa foi se faafetai i le pulega mamalu a alii ma faipule o afioaga ma alalafaga, faapea foi le lagolagosua a saoao ma tamaitai, faletua ma tausi, faapea le malosi o le nuu, ina ia malu ma saogalemu o tatou aiga, aemaise nai alo ma fanau, faapea foi o tatou tofi ma measina ma a tatou tu ma agaifanua. E avatu ai foi le faamalo i lo outou sapasapaia ma le uunaia o fuafuaga ma galuega mo le atinae o Nuu ma Itumalo, ma taumafaiga a lo tatou malo, o loo outou galulue faatasi ai. Ia faamanuia le Atua ia tou pulega aemaise outou faiva alofilima.
E le tuuitiitia foi se faafetai ma se faamalo i le sao taua o a tatou paaga mai atunuu i fafo, aemaise o auaunaga faifaipea a faauluuluga ma tagata faigaluega uma o Matagaluega ma Faalapotopotoga a le Malo, o Faalapotopotoga Tumaoti, o Kamupani ma Pisinisi, ma le au fai atinae eseese o le atunuu. Ia outou maua le manuia, le poto ma le atamai mai le Atua, aua le tauaveina o outou tiute ma le auaunaga o loo outou faatinoina.
Samoa e, e faamanatu atu aua la outou faafofogaaga i lenei taeao. Ua o tatou i luga o le gaga aua la tatou taligamalo mo le fono a Taitai o Malo o le Taupulega ia Oketopa o le tausaga nei. Ua e masani i lau tiu fa’aaloalo ma lau talimalo lelei. Ua e niuāli foi i le vasa Pasefika i le faafoefoeina o tauaofiaga tetele faapenei. Ua aave foi tala o le matagofie ma le mama o o tatou laufanua, o tatou nuu ma aai, ma lo tatou siosiomaga. O loo i outou aao lava ma o matou lima le faatumauina o le ta’u leleia o si o tatou atunuu, ma le malupuipuia o lea usugafono tele. O le tatalo ma le agaga faaaloalo, alo mai le paia o le atunuu, tatou nutimea faatasi ma oloolo pitovaa, e lagolago i le agaga lotonuu ma le alofa ia Samoa, ina ia sao ma uli lenei faamoemoe tāua a lo tatou Malo. O le uluai taligamalo lenei a Samoa ma le Pasefika i se tauaofiaga tele faapenei, ma e le se galuega faigofie. E matua manaomia ai lo tatou galulue soosootau’au ma tuu atu lo tatou faamoemoe i le Atua na te taitai folau i a tatou tapenaga uma.
Le Atunuu e, ia aualiitia pea e le mana o le Atua Silisili Ese lau folauga. Ia apepeleina pea o tatou Taitai ma le tafatolu fefaatauagai o lo tatou Malo Tutoatasi, i lona filemu ma lona alofa. Ia liligi ifo faaua ana faamanuiaga ia Samoa aoao mai lava i se aupito matua e oo lava i nai tupulaga talavou ma fanau iti, o le lumanai manuia lea o lo tatou atunuu.
Ia manuia tele le faamanatuina o le 62 tausaga o lo tatou Malo Tutoatasi.
Soifua
Ata Pueina – Malo o Samoa (Pesetā Tusiga Taofiga)
