Lau Susuga i le Taitai o le Sauniga – Lau Susuga Ioane Petaia
Lau afioga i le Sui Palemia ma Minisita o le Kapeneta
Lau afioga Sir Tom & Lady Masters – Kiorana and greetings to you
Le afioga i le Peresetene ma le mamalu o tulaga tofi o le Asosi o Alii ma Tamaitai Tuai o Avele
Lau Susuga i le Pule Aoga, ma Faiaoga ma le mamalu o le Laumua o le Kolisi o Avele
Le paia o Samoa ua potopoto i lenei taeao
Ou te faatalofa atu.
O le maitau atu i le agai mai o le solo i le taeao nei, le sagisagi fiafia o alii ma tamaitai o le solo, ma a outou teuga i lanu e iloa ai le laumua o Avele. Ona ou manatua ai lea o se tasi o ona viiviiga. E faapea lona fuaiupu;
‘Le matietie ane i le vaomatua’
‘Mauga o Vaea ae tu faatafa’
‘Ae lafoia lona ata’
‘E faapaolo ai lupe o le foaga’
Ona momoli mai lea o foliga o le laumua i le tali o le pese e faapea;
‘O le ie lanu meamata’
‘Ae muatolu samasama’
‘E mai Niue lana ula’
‘Le puataunofo o lona sei lena’
‘Ua iloa ai oe, e Samoa’
‘E le galo Avele i le agaga’
O le aso ananafi sa o tatou māua ai i le talafaasolopito o le faigamalaga a le Kolisi, ae a fua, ua 100 tausaga le matua o le Aoga, o lona uiga, ua autupulagā, ua maua’a molimau, ua niuali le tautua, ua tini ma ua tau le ‘ai. Le ‘tautua faamaoni tausiniō’ mo Samoa ma ona tupulaga.
O le viiga lena o le Atua, aua o Ia na mafua ai ona totō le fatu i le 1923 e fa’atū le aoga. O lona finagalo na lotolotoi i le folauga a Avele i lenei 100 tausaga, atoa ma luitau na tutupu ai. O lona Agaga Paia, sa musuia fanau a Samoa ma le Pasefika sa aoaoina ai, ina ia ‘tautua faamaoni ma tausiniō. Lea ua pine i le taeao nei.
Ou te momoli atu ai le faafetai a le tatou Malo i le tautua a Avele i le aoaoina o fanau a Samoa. Tatou te manatua i latou na mua i malae, ua fai i lagi le folauga. O Susuga i Pule aoga ma faiaoga sa o latou aoaoina le fanau, ou te faafetai atu i lo outou sao e fa’amumū le lamepa o le ‘tautua faamaoni ma tausiniō’.
Ou te faafetai atu i le mamalu o alii ma tamaitai tuai o le Aoga mo lo outou sao i le saga faaleleia o le tatou aoga. O upu masani a Samoa, e afua mai mauga le manuia o Nu’u. E fesili foi muli mai ia mua mai. O outou lava e lave i le sololelei, ma lave i tigā, ma tua i ai le Susuga i le Pule Aoga ma Faiaoga, aemaise o alo o si o tatou atunuu o loo aotauina ai.
Mo le fanau aoga, ia faamalolosi ma finafinau i le aoga. E moomia e Samoa fanau aoaoina lelei. E le gata i le poto salalau, ae ia sili ona leoleoina o outou loto, aua e tupu mai ai le amio. O le amio tauagafau e iloa gofie ai le tama ma le teine e aoaoina lelei. Ia manuia outou le fanau aoga.
Ia manuia le atoaga o le 100 tausaga o le laumua o Avele. Ia manuia le savaliga a le laumua i le agai atu i le lumanai. Ia manuia tulaga tofi mai Sui uma o le Asosi o tama ma teine tuai o Avele. Aemaise lau Susuga i le Pule ma Faiaoga ma fanau uma o loo aoaoga i le laumua o Avele.
Ua saunia e le Malo se seleni e 20,000 mo le faailogaina ole 100 tausaga o Avele e lagolago i galuega mo le faaleleia o le laumua.
—————————————————————————————-
Over the years Avele developed a reputation of a strong institution fit for the purpose of agricultural studies which continues to provide the backbone support for most countries of the Pacific. As a result, many students from the region came, from Niue, Tokelau, Cook Islands, Tuvalu, and Tonga. I am pleased to note that some, who are prominent leaders in their countries are here to join us in Avele’s celebrations.
Before closing, I take this opportunity to thank Avele College for its service to Samoa and its contribution to education. I acknowledge the principals and teachers – past and present, for their commitment to teach and nurture the students who entered and left the hallways of Avele College for their journeys towards their chosen future. I thank the Old Pupils Association for their continuing support to the school and for being role models for current and future students to strive for excellence in education.
Happy 100th anniversary Avele.
SOIFUA MA IA MANUIA.
Photo by Government of Samoa (Leaosā Fa’aifo Fa’aifo)
