(ASO TO’ONA’I, 1 IUNI, 2024 I LE MATA’AGA I SALETOGA)
Lau Susuga i le Ta’ita’i o le Sauniga, Susuga Ruperake Petaia,
Afioga i Minisita o le Kapeneta,
Le paia o le auvala’aulia mai atunu’u i fafo
Fa’apea le mamalu taue’e o Samoa ua potopoto
Talofa, Talofa lava!
O lea ua a’e le mata’igatila e pei o upu e fai i faiva o tapua’iga, ua to so tatou fa’amanuiaga aua le galuega fa’aositaulaga a le susuga i le Ta’ita’i ole sauniga. O lea ua mae’a ona momoli so tatou sao ia Manuvao, ao se fa’apolo mase fa’asagi i le Atua mo lana pule fa’asoifua, ua mua atu mua mai tau le ai, i lona alofa ma lona agalelei ua tatou poto ai moli i futiafu i lenei aso.
E avea ai ma sui o le Malo, le afioga i le Tama’ita’i Palemia ma le mamalu ole Kapeneta e alagaina se upu faatauva’a aua lenei aso ma le fa’amoemoe. E lagona le fiafia ma le agaga fa’agae’etia, i le mafai ona lagolagoina ma fesoasoani le Malo, i le toe auina mai lea o le Fa’aaliga lenei i Samoa, e tauala atu lea i le Matagaluega o Puna’oa Fa’alenatura ma le Si’osi’omaga, le Matagaluega o Tiute ma Tupe Maua, ma le Pulega o Tagata Maimoa ma Tafafao mai fafo.
O le ‘Paradise Camp Arts Exhibition’, poo le Fa’aaliga o Ata ma Tusitusiga i Parataiso, na gaua’i atu ai le va’aiga fa’ava-o-malo ina ua fa’aalia i le Fa’aaliga Fa’avaomalo Fa’aonaponei Lona 59 i Venise i Italia i le 2022, fa’apea fo’i ina ua ia asia le Fale Mata’aga o le Powerhouse i laufanua o Gadigal i Sini, Ausetalia i le 2023.
O le tulaga manuia o lea faʻaaliga, o loʻo faʻamauina lelei e le aufa’asālalau a le lalolagi, ua faʻaigoaina o se fa’aaliga e “tatau ona maimoaina” ma “matagofie”, ma sa fa’asalalauina e o’o atu i le silia ma le miliona o tagata i le lalolagi, fa’atasi
ai ma le fua fa’atatau e silia ma le miliona tagata sa maimoaina, fa’apea foi ma le sili atu i le piliona o tagata matamata i luga o upega tafailagi. O le tulaga fa’ava-o-malo o Samoa o lo’o iai nei i le tulaga o fa’atufugaga, e aunoa ma se masalosalo, ua si’itia, e ala i fa’aaliga matagofie ma tala na fa’amatalaina i le Paradise Camp. O le musuia e o tatou tagata, a tatou aganu’u ma lo tatou si’osi’omaga, o le a mautinoa lava le fa’agae’etia o le tagata matamata i le Fa’aaliga o le Faatasiga i Parataiso poo le Paradise Camp.
O le fa’aaliga o le Faatasiga I Parataiso po’o le Paradise Camp, o le a va’aia i Samoa nei mo ni nai masina. O lea la, e tele ni avanoa tatou te fiafia ai i tu’ufa’atasiga a le Pasefika, e aofia ai le fa’afiafiaga o le Teuila ia Setema, fa’apea ai ma le Fonotaga a Ulu o Malo o le Taupulega ia Oketopa i le tausaga nei. Ae mo lenei aso, o se auala matagofie lenei e fa’ailoga ai le amataga o le tatou 62 Tausaga o le Tuto’atasi ma lona fa’amanatuina.
Ou te fia fa’ailoa fo’i ma le agaga fa’afetai le lagolago agalelei o le Matagaluega o le Va i Fafo ma Fefa’atauaiga o le Malo Niu Sila, Digicel Pacific, Saletoga Sands Resort, le Samoa Fa’afafine Association ma i latou uma lava sa lagolagoina ma saofagā i le fa’amautūina o lenei fa’aaliga. Ana le seanoa la outou lagolagosua, e le mafai ona fa’ataunu’uina lenei fa’amoemoe.
Avea ia lenei avanoa taua, oute momoli atu ai le fa’amalo ma le fa’afetai i le susuga ia Yuki Kihara, i le fa’ama’ite i mea lelei, aemaise lona finafinau i le fa’afoeina lea o lenei galuega, ina ia I’u ma le manuia, aua se ‘ai mo Samoa. Matou te fa’amalo atu i lou lototele ma lau taleni, lou alofa i o tatou tagata, aganu’u ma agaifanua, i ona matagofie uma ma puapuaga, o lo’o pu’eina manino i nei galuega. Ia fai lea ma fa’amanatu ia tatou uma, aemaise le tupulaga talavou, o foliga ia o le ta’utinoga i galuega – o le ta’utinoga i le tulaga pito i lelei, o le faia o galuega taulima i lau lava filifiliga, ma le fatuina o se talatu’u tumau.
Ma o lea, e faasilasila aloa’ia atu ai i le ava ma le fa’aaloalo tele, ua tatala aloa’ia nei le Faaliga o Ata ma Tusitusiga i Parataiso, poo le “Paradise Camp Arts Exhibition” i Saletoga i Samoa nei.
Ia manuia le fa’amoemoe o lenei aso. Ia manuia foi le fa’amanatuina o le 62 tausaga o le Tutoatasi o si o tatou atunuu o Samoa.
SOIFUA, MA IA MANUIA !!
Ata Pueina – Malo o Samoa (Pule Puleina)
