(Aso Lua 11 Iuni 2024 -10.00 i le taeao.)
Lau susuga i le ta’ita’i o le sauniga Bishop/Peresitene Sauaga Seiuli
Lau susuga i le Alii Pule o Fesoasoani alofa a le Ekalesia Iesu Keriso o le Au Paia o Aso e Gata Ai i Samoa nei Dr.Kapuana Ainu’u
Sui ofisa eseese o le Ekalesia ua auai mai
Sui o le matagaluega o le Soifua Maloloina
Aemaise le pai aua potopoto
Ua maea ona totō le niu i le tuaoi, ua maea fo’i ona fana le ū ile vāteatea aua le finagalo paia ma le alofa o le tatou Tama Fa’alelagi i lenei taeao. O paia faale-Atua, paia faale-aganuu ma paia faale-malo ma paia o lenei taeao ma le aso, o le a lu’ulu’u atu faatini o tausala aua e le a’ua’u ise leo ona autalaina.
Ua tatou ofaga potopoto ma fa’atasi i lenei taeao matagofie, ona o le foa’i alofa a le Ekalesia Iesu Keriso o le Au Pa’ia o Aso e Gata Ai, le container 40 futu, tumu lelei i nofoa fa’ata’avalevale ma to’oto’o i ona itu’āiga ‘ese’ese ma e fou lava. E fesoasoani ma lagolago ai i le galuega fa’aleleia a le Mālō o Samoa mo ona tagatānu’u e i ai a’afiaga tumau o le soifua.
O se tasi nei o anavatau na ‘ave i ai le fa’amuamua a le tatou Mālō ma le fa’anaunauta’iga ia fa’ateleina ma fa’amalosia le fa’atāuaina o aiātatau ma mana’oga fa’apitoa a ona tagata e i ai a’afiaga tumau o le soifua o lo’o i Samoa nei. Ua mae’a fo’i ona sainia e le Mālō o Samoa le maliliega fa’avāomālō i le fa’atāuaina o aiātatau a tagata e i ai manu’aga tumau o le soifua i le tausaga e 2014.
O aiaiga ma ta’iala o nei foa’i, e lē mafai ona fa’aāogaina i totonu o maota gasegase ae tau lava o le fa’asafua atu ma tu’uina atu i tagata Samoa ta’ito’atasi e i ai a’afiaga tumau o le soifua. O lea sa fa’atalosagaina ai e le Matāgaluega nei le Ekalesia mo ni nofoa fa’ata’avalevale auā le auaunaga tau soifua mālōlōina i totonu o ona maota gasegase uma. Ma o lenei ua agalelei mai ai le Ekalesia ma tu’uina mai ai nofoa fa’ata’avalevale fou lava e 40 mo le Matāgaluega o le Soifua Mālōlōina (M.O.H.), e fesoasoani ai i le fa’aleleia o ana auaunaga i totonu o Falema’i uma i le atunu’u.
O le faigāpa’aga a le Ekalesia o le Au Pa’ia o Aso e Gata Ai ma le Mālō, tauala mai i le Matāgaluega o le Soifua Mālōlōina, sa amatalia mai i le tausaga 2014, ma o lea o lo’o fa’aauau pea se’ia o’o mai i lenei tausaga. O le fa’amoemoe ma le naunauta’iga a le Ekalesia e fesoasoani ai mo tatou tagata a lo tatou atunu’u e i ai a’afiaga tumau o le soifua. E tauala mai i ana auaunaga o foa’i ma fesoasoani alofa i le lalolagi atoa, ua mafai ai ona tu’uina mai container 40 futu e tumu i nofoa fa’ata’avalevale ma to’oto’o ‘ese’ese i tausaga ta’itasi.
Ua fa’aopoopoina le foa’i a le Ekalesia e ala i le fa’atupeina o oloa mana’omia ma mea faigaluega ma nisi o masini fa’apitoa e fa’aāogaina i le gaosia ma le fausia o ‘ā’ao (vae ma lima) fa’apipi’i ma nisi o mea faigaluega fa’apitoa e mana’omia ma fesoasoani ai i tagata e i ai a’afiaga tumau o le soifua, ua mafai lava ona gaosia ma fausia i Samoa nei e i latou ua uma ona a’oa’oina i nei tomai ma poto fa’apitoa i le fa’amalu a le Matāgaluega o le Soifua Mālōlōina. O le 8 ai nei o container ua foa’iina mai e le Ekalesia o le Au Pa’ia o Aso e Gata Ai mo Samoa talu mai le tausaga e 2014. I fa’amaumauga a le tatou Matāgaluega o le Soifua Mālōlōina, ua silia ma le 2,700 nofo fa’ata’avalevale ae silia ma le 800 to’oto’o ‘ese’ese ua mafai ona foa’iina fua mai mo Samoa.
I le avea ai ma Minisitā o le Matāgaluega o le Soifua Mālōlōina, e fai ai a’u ma Sui o le Mālō Tuto’atasi o Samoa, e talia aloā’ia lenei foa’i tāua tele i lenei tausaga 2024, ma fa’aleoina fa’apitoa ai le agaga fa’afetai o le Mālō i le Ekalesia a Iesu Keriso o le Au Pa’ia o Aso e Gata Ai, i ona Ta’ita’i ma Pulega i Samoa nei, fa’atasi ai ma le Pasefika, aemaise le lalolagi atoa. Ona o nei fesoasoani ma nei auaunaga taugatā e lē taugofie ua foa’i fua ina mai mo Samoa i tausaga ta’itasi.
Fa’afetai fa’apitoa fo’i i le Matāgaluega nei i ‘ai latou o lo’o gafa ma le va’aia lelei o nei aseta tāua, ma fa’atinoina le auaunaga auā nai o tatou tagatānu’u, mālō le galulue lē fa’alogologotigā auā le tautuaina o nai o tatou tagata o lo’o sulufa’i mai mo le mana’omia o la tatou fesoasoani faifaipea. Manatua ‘aua ne’i muta le fai mea lelei, ‘aua ne’i motusia le ola tautua alofa auā nai o tatou tagata fai mai.
Fa’amoemoe o le ā tatou fa’aāogaina ma le tatau nei meaalofa ma fa’asoasoa atu ma le lelei, talafeagai ma fa’amaoni nei nofoa fa’ata’avalevale ma to’oto’o mo le manuia lautele o tatou tagata e i ai a’afiaga tumau o le soifua. Fa’atasi ai fo’i ma le tausia, puipui, leoleo lelei ma fa’apelepele a tatou nofoa fa’ata’avalevale ua foaiina maim o le auaunaga o totonu o maota gasegaseina ia umi ona lelei ma maua pea i aso ma taimi uma aua le fa’aogaina e tatou tagata nuu lautele e autova’a atu i totonu o soo se maota gasegase i Upolu nei ma Savaii.
SOIFUA MA IA MANUIA.
Ata Pu’eina – Malo o Samoa (Pesetā Tusiga Taofiga)
