ASO FARAILE, 19/07/2024 I LE 9:00 I LE TAEAO
Tulouna lou asa-asa-vao, tulouna lou faletā i le vao.
Tulouna lou lago-se’e tā, tulouna lou faletā i le a’ai.
Tulouna lou apisā, tulouna lou taufalemau.
Tulouna lou malamala fiti, tulouna lou malamala fiti mamao.
Tulouna lou meana’i-tāua, tulouna lou a’ea’e ma lou ifoifo.
Tulouna lou afu liligi ma lou toto masa’a.
Tulouna lou sila so’ofau, tulouna lou ula-oge.
Tulouna lou to’ū, tulouna lou tagausi.
Tulouna ou sa lautele, tulouna ou sa fa’apitoa.
Susū lau susuga le Ta’ita’i o le sauniga, lau Susuga Rev. Dr. Latū Latai. O le fa’afeagaiga taulagi auā le afio o Alo o Sina ma Salavalasi. Pola puipui e le Faletolu ma le Vainalepa. O le susū lava lea o auauna fa’a’uuina a le Atua ma o latou faletua, i le atulasi o fata faitaulaga.
Afifio Minisita o le Kapeneta.
Afio lau afioga le Fofoga Fetalai ma le mamalu o faipule o le maota.
Susū le Amepasa o le Malo Iapani, Your Excellency Mr. Keisuke Senta.
Afio le Taitai o le Itu Agai, lau Afioga Tuilaepa Dr Sailele Malielegaoi.
Afifio Pulesili o Matagaluega a le Mālō, Pule o Kamupani Tumaoti.
Mamalu o le Asosi o Tama ma Teine tuai o Avele I Samoa nei ma soo se tafa o le lalolagi
Samoa ua potopoto I ona itu taulagi, male mamalu ole au-vala’aulia ua poto I malae o le Kolisi i Avele i lenei taeao manino.
Ua pa’ia le vasa i vasā. Ua pa’ia le fale na tulutulu i tao. Ua pa’ia le fale na tutulu i le moana. Ua pa’ia Tama a le lagi, ua pa’ia Tama a le fale. Ua pa’ia talā lumā, ua pa’ia talā tuā. Auā ua nofoia pou o matuātala. Ua api tia, ua ‘ainā faleva’ai i pa’ia o Sāmoa ua potopoto, aua Aiga o Tupu, Aiga o Nofo, Aiga o Pāpā, Aiga na Tafa’ifā.
Ae a le tapuaiga mau a Tutuila ma Manu’a? I le Susū o le Faleagafulu, Su’a ma le Vaifanua, Fofō ma Aitulagi, Sā’ole ma le Launiusāelua, Itū’au ma Alataua. Afio le Lā’au na Āmotasi, le pa’ia o Fa’atui, le mamalu o To’oto’o o le Fale’ula, Ma’upū o le Manu’atele Ua titi tōnoa ma ta’ū e tasi, auā le Nofo a Tumua, Nofo a Pule, Nofo a Tama matutua Le nofo a Tootoo
O mamalu ia, ua futiafu e tasi i Laumalili nei. O le malae e Susū ai le Susuga i le Uluaoga, le Tama’ita’i Pulelua ma le aiga Faiā’oga. E afio ai le Ta’ita’ifono ma le Laulauāfono, a o le tapua’iga mamalu a mātua; ae a tama ma teine o le Puataunofo. O le asō, o le fogāfue a fueloloa o Samoa, o le futi-futi-gā manu’ula. O le asō, e manatua ai le alofisā o Salamasina, na tala ai i le moana le efu o le to’o; ua loloma ai nei le tai o Tumua, ae tala mata-loloa le tai o Tigilau.
O le asō, ua mua atu ua mua mai. Ua sulu i le tini ma ua tau o le ‘ai pei o le faiva i fogāvai. O le fa’amoemoe ua taunu’u, o le la’au o le soifua lea. Ua tautala i ai le pu’a gagana ina ua logo le naiatea ae fa’afofoga le naiama. Ua Laolao’ifale le tamaita’i Sāfata, ae Talaleomalie le Sa’o tama’ita’i a le afioga i le Sa’opāpā ia Mata’utia. Ona manatu lea, o mamalu o Samoa, ua Tapusilia pei o le Maota o Tuala i Malaeola ma Nafoaga, e le toe aufagaina aua ua taoto a o se ala ua o’o.
O Avele, o le meaalofa ale Atua mo Sāmoa, Pasefika ma le Kelope. A fua i le ulua’i fuafuaga sa fa’ata’atia i le 1923; e fa’ato’a le fanua lenei mo se ma’umaga e tausi ai le A’oga Nofotumau i Malifa. Peitai ane, ua sui le fa’ato’a mo se ma’aumaga, ae ua avea ma se nofoaga mo se ā’oga ale Malo…e ofo lava le loto i le tōfā fa’asuamalama a le Atua. O le tofā na ala mai i ta’ita’i o le 100 Tausaga talu ai, ae fa’ataunu’u e ni tama a’oga loto finafinau.
Fai mai, o Avele, na amata i tama a’oga e 24, na filifilia e amata le a’oga i’inei, tapena mo le a’oa’oina mo le feau o le poto salalau. A lea ua sauo’o lona sao, ua pa’i fale’ula lana tautua. E pei ona i ai lenei taeao. O le fa’ailoga lea o le alofa malosi o le Atua ma le fa’atāua ua silisili ia Avele, auā e tu’uloloa lona aogā. O malaga umi faapenei pei o le malaga a Avele, e au a na mafuli le faga aua ua tu’utu’u-loloa onapo. E lagisoifua lea mau pea tōmānatu i lou tala faasolopito Avele.
E le i faigofie. E matuā le faigofie lava. Fai mai, na i ai taimi na teteva ai tama mai i le aoga, ina ua lē gafatia le mamafa o galuega, ae utiuti taumafa ma leaga fale sa nonofo ai. A o lena teva’aga, na fanau ai atina’e lelei, aemaise o le toe fausia o fale lelei. Sa iai taimi na tapunia ai le Aoga ona o fa’afitauli na oia ai le va nonofo; a o lena tapunia na to’ulu ai laumeavale o le fa’atamala, ae totogo mai ai moemoe fou ma lau lelei, o se amataga fou.
O ia fatia e tele, e le i mui-titi ai fa’amanuiaga ma matāti’a ua ausia, i so’o se tafa. Na ui i faigata, ae o lo o mamau lava fausaga o lou fa’asau, e le’i nape ai lou ati-poniu. A lea, e tau-asuasu lava le fa’amanatuga o lou 100 Tausaga pei ona tapisa nei. Ua e ausia matāti’a i ta’aloga, ma a’oa’oga. Ua sama loaloa lau puataunofo ia Samoa ma le Kelope, i tafa o le Talalelei, i Faigamalo ma Upufai, Matāgaluega ma Pisinisi Tumaoti, aiga ma faiganu’u fa’aeaina. Ua o’oo’o lava le nanamu o lau suavai fu’e, o lau tautua toa.
A silasila i suiga matagofie o nei aso, e ofo lava le loto. Ua lālelei ou falea’oga; ua pei se malaevaalele lou auala. O lou falesamoa tū mātila pei o se tausala lē ilā, lē pōnā, ua su’i fa’alaise e fetu o le lagi lona lalelei. A o lea fo’i ua o tatou potopoto mai i le asō, e fa’aulufale lenei maota, ua o se taule’ale’a ua sama lona malofie, ua saunia mo lona ulufalega, i lona faiva tautua fa’aauau. E tapena ai isi Ao ma Ta’ita’i o le Mālō. E tapena ai isi minisita ma isi faipule. E tapena ai isi pule o aoga Tusi Paia ma isi faifeau ma faletua. E tapena ai isi loia ma faia’oga. E tapena ai isi foma’i ma ave vaalele. E tapena ai isi Pulesili ma Sui Ofisa sili, e tapena ai isi fai pisinisi ma isi matai tausi aiga lelei.
A vaili ma fesili pe fa’apefea ona tutupu o nei mea, ona o tatou taula’i lea i le moni o le ‘au’au o lenei aso: “Atua To’ala-fa’a’autama”. O lou gafa, o le ‘auafa na to mai i le Atua, na fa’amaite mai i lana tōfā, i le 100 tausaga ua mavae. Na filifilia ai tama totoa ma finafinau sailimalo e 24. O le Tōfāmanino e ulugafa ai le Atua. A lea ua usugafa, talagafa ua tagafa ai itu e fia o Samoa ma le Lalolagi. O LE ATUA E TOATASI, o ia lava o le TO’ALA-FA’A’AUTAMA o manuia ua sila sā’aga i ai i le asō. O le fa’aauau pea o lou gafa sailimalo Avele, o le Atua, e To’ala-fa’a’autama.
E faafetai i le tausi feagaiga o le Amepasa ma le Malo Iapani, pei ona iai la tatou faigapaaga. O lea lava ua fa’aauau ma ua topule, ua fai lava lea ma ala o le fa’ataunu’uina, o le tofā alofa o le Atua e le gata ia Avele, a o Samoa. E faafetaia foi le afioga i le Tamaitai Palemia ma le Faigamalo, ona o le ma’au fa’aauau pea mo aoga uma o Samoa, o lo’o manuia atu ai ma Avele.
Fa’afetai atu i le Ta’ita’ifono ile alii faipule, afioga Tagaloatele Papalii Pasi Poloa ma le Laulauafono o le Kolisi. E fa’amalo atu i le mamalu o matua i ona tupu ma ona e’e. E fa’amalo atu i lau susuga le Uluaoga, Pulelua ma le aiga faia’oga, fa’apea tama ma teine o le Puataunofo. Malo loto tetele i le Alii. Fa’afetai mo lenei galuega tele ua pati ta’oto i le asõ.
E fa’afetai atu i suli ma feoi o Avele, sa agalelei ma ifo tonu le foa’i i le Kolisi. E le gata i lea a o uluaoga ma isi o laumua, na agalelei mai. O fa’afeagiga ma ekalesia ma Samoa atoa sa tali mana’o i le fa’asau ma le fa’ala o Avele, ao sa’ili seleni mo lenei galuega.
E tele lava mafua’aga e mafai ai ona tolo-ia galuega lelei fa’apenei. Aua foi e faigata ona tu’ufa’atasi ni finagalo eseese se tele? A o le tino mai o lenei malu matagofie, o le lagisoifua lea o le Atua To’ala-fa’aautama, ua na lē tu’ulafo’ia ona tagata fa’atuatua galulue. O lea ua tu le failā, le mila ma le ‘ala. O le molimau ola lea, o le Atua To’ala-fa’aautama. O lea foi ua fai lenei galuega, ma fa’aa’oa’o sili i so’o se tagata fa’atuatua, “A lē atina’e a’e e le Alii le fale, e galulue fua, a lē leoleo e le Alii le ‘a’ai, e mataala fua”.
O le Atua, o le Matua-ofaiva poto. A saili i ai ma le fa’amaoni, ma fa’atoga o ia e Pule mai, e mau o tatou faiva. O so’o se eleele lava e lūlū ai le Upu a le Ali’i, e ola lauusiusi ma matala matagofie ona laufanua, e manuia foi ē galulue ai. A lea ua tepa i ula, tago i ‘ula, ua futifuti manu’ula fo’i le asō. Ua titi manu ua lava manu.
Avele, ia fa’aauau pea ona e saili i le Ali’i ma lou talitonu, o ia lava o le “ATUA TO’ALAFA’A’AUTAMA.” Ia tausi lelei lenei meaalofa tāua, aua e lē taugofie, e le i faigofie ona tapena. Ia fai pea lenei eleele ma nei atufalega, ma matāvai manino, e utuvai ai tupulaga o Samoa, e agaia faleupolu. Ua manaia le ‘au’aso o le maota ua se aūa e moeli’ili’i. Ua manaia fau o le maota, ua se sila a o le fau’ulu. Ua manaia le taupupu ua o ni afali’o o le masina. Ua manaia le atuao o le maota ua o se soa e ta’i. Ua manaia tulutulu o le maota ua o se ‘ati’ati. Ae ne’i fai ma pona, lo tatou fāoa o le vi’iga; a ia matua pea le tu’u i le Ali’i, o ia lava o le Atua To’ala-fa’a’autama.
Sā’aua, ua matagōfie lē miō, o le tiatiaō a mānaia le asō. Ia sasāfe pea u’u ma saga’i ane ‘ai o le tai. Ia punitia vaialia ae sū’ea pea vaiola, ma ia fotulupe pea nu’upule. Faamanuia mai le Atua ia Avele ma lona faamoemoe i le asõ.
Soifua ma ia manuia !!
Ata Pueina – Malo o Samoa (Pule Puleina)
See insights and ads
All reactions:
3131
