LUMĀ MAOTA OLE MALO,
(ASO LUA, AUKUSO 27, 2024 I LE 8:30 I LE TAEAO)
Susu lau Susuga i le ta’ita’i ole Sauniga, Rev. Latū Latai,
E’e ma papa a’ao lau Afioga i le Ao mamalu o le Malo o Samoa –
Lau afioga Tuimaleali’ifano Va’aleto’a Sualauvi II ma lau Masiofo
Afio lau Afioga i le Sui o le Fono a Sui Tofia –
Lau afioga Tuiletufuga Le Mamea Ropati Mualia ma lou faletua
Afifio afioga i Minisita o le Kapeneta
Afifio Sui mamalu o le Fonousu a le Palemene o Samoa
Afifio Sui mamalu o Malo mai fafo,
Afio le Fa’atamā o le Iuni Lakapi Samoa –
Lau Susuga Tuilaepa Sailele Malielegaoi
Afifio afioga i le Peresitene, le Ta’ita’ifono ma le Komiti o le Lakapi Samoa
Sui uma o le Manu Samoa ma tama tuai o le Manu Samoa
Peresitene ma Tulaga Tofi uma o Iuni Lakapi Fa’aitumalo
Peresitene o le Asosi o Pule Aoga a Samoa
Peresitene o le Asosi o Laufalī a Samoa
Peresitene o Iuni Lakapi a Tama’itai Samoa
Tupu ma e’e o Samoa ua pototopoto mai i lenei taeao
Le paia sausaugatā o Samoa mai ona tumutumu mauga se ia paia ona fatu le
gae’e, ou te fa’atulou atu. Ou te manatu, o paia, sā ma faigā o le atunuu ua taoto i le matagofie i le fa’autautaga mau a Tumua ma Pule. O lea ua tatou feiloa’i fiafia i lenei taeao fou i le alofa ma le agalelei o le tatou Matai Sili. O le asõ, o le aso tatou te fa’afo’i ai le viiga ma le fa’afetai i le Atua, le tatou Matai Sili aua o lea ua tatou aulia ma le manuia le fa’amanatuina o le 100 tausaga talu ona fa’avae mai le tatou Iuni Lakapi i Samoa nei.
Ose la’asaga taua ua tatou molimauina fa’atasi. O se savaliga umi ma ose folauga ua mautu lona sao i Samoa ma le lalolagi, o le sao na fa’afaileleina mai ei latou i lena vaitau aemaise le sao o Tua’a ua faiilagi le folauaga, o i latou ia sa mua i malae ma asaina le gasu o le taeao.
I le fa’asologa o le fa’atuina o le Lakapi i Samoa, sa resitalaina ma fa’aigoaina o le Apia Rugby Union i le tausaga 1924. Mai le tele o tausaga e o’o mai i le tausaga 1960, sa suia ai i le Western Samoa Rugby Football Union ina ua amata ona maua nai ta’aloga ma au malaga mai fafo atu o Samoa.
I le fa’agasologa mai o le folauga o le Iuni Lakapi, sa maitauina le fa’atupula’ia o le ta’aloga ma sa vave ona avea le Lakapi ma ta’aloga numera tasi i Samoa e o’o mai i le taimi nei. E fiafia uma i ai le tatou atunu’u, e fa’amaopopo ai tupulaga i nu’u, afioaga aemaise totonu o a’oga.
A toe manatu i tua i lenei selau tausaga, ua fa’amauina ai nai vaega taua sa ausia e le Iuni Lakapi i lana folauga:
• Tausaga 1924 na resitaraina ai le Iuni I lalo o le Apia Rugby Union
• Tausaga 1960, na resitalaina ai le Iuni mai le Apia Rugby Union i le “Western Samoa Rugby Football Union”.
• Tausaga 1960 na malaga mai ai le Au a Maori mai Niu Sila i Samoa.
• Tausaga 1976, o se malaga muamua lea o se Au fili mai Samoa i Niu Sila.
• I le 1982 na amata ai le ta’amilosaga i le va o Samoa, Toga ma Fiti e o’o mai i le taimi nei. Mai lea ta’amilosaga, ua fa’asefululua ona siamupigi ai Samoa i lea ta’amilosaga ole Pacific Nations Cup.
• Tausaga 1988, ga ofi atu ai Samoa e fai ma sui auai o le IRB po’o le International Rugby Board. O le Tausaga muamua fo’i lea sa malaga ai le Au a Samoa mo Europa i Uelese ma Aialani
• Tausaga 1989, sa suia ai le igoa o le tatou Au mai le “Western Samoa” i le “Manu Samoa” i lana malaga ta’amilo i Europa.
• Tausaga 1990, na ofi atu ai Samoa i le Ipu a le Lalolagi i Peretania ma e o’o mai i le taimi nei o lo’o tauva ai pea le Manu Samoa.
• Tausaga 1993, ose taimi muamua lea na manumalo ai le ta’itoafitu a Samoa i le Hong Kong 7s.
• Tausaga 1995 na fa’apolofesa ai le ta’aloga Lakapi.
• Na filifilia Samoa ma Au ole HSBC 7s i le tausaga 1999. I le fa’asologa o le ta’amilosaga na ausia ai e Samoa le Siamupini aoao i le tausaga 2009/2010.
• I le tausaga 2011 ga siitia ai le Iuni Lakapi i Tuana’imato ma fausia ai le ofisa mautu e a’afia ai le malae ma fale kolegi pei ona silafia.
• I le tausaga 2015, na o’o mai ai le Au o le All Blacks i Samoa.
• I le 2019 na avea ai Samoa ma Sui ole Komiti Aoao po’o le Council o le Pulega o le Lakapi ale Lalolagi. O le tausaga fo’i lea na fa’atino ai le suiga o le igoa o le tatou Iuni i le “Lakapi Samoa” ma le fa’ailo i le “Teuila” pei ona silafia ai.
I le fa’asologa mai o ta’aloga Fa’ava o Malo a le tatou Manu Samoa XV. E o’o mai i le taimi nei, ua mafai ona manumalo le tatou Manu Samoa i au tetele o le lalolagi e a’afia ai – Uelese, Sikotilani, Aialani, Iapani, Italia, Argentina, ma Ausetalia. O pine fa’amau ia o le tulaga maualuga ua ausia e le tatou Iuni Lakapi i Samoa.
O le maitau i nei mau tausaga e tele, e fitā le ala sa sau ai le Iuni Lakapi mai le amataga e o’o mai i le asõ. Ua si’itia le maualuga ua i ai fa’atinoga o le ta’aloga talu mai ona fa’apolofesa. Ua si’itia foi le aofa’i o Au Lakapi e i lalo o le Iuni Lakapi a le lalolagi. Ua alu foi I luga totogi o le alii ma tamaitai taaalo. Ua tele manaoga e faatino ai le taaaloga.
O lu’itau ia o loo feagai pea ma tatou i le tele o taimi, o le utiuti o seleni e fa’atino ai polokalame a le Iuni Lakapi.
I lenei taeao, e fai ai a’u ma sui o le tatou Malo e fa’afetaia ai latou uma sa tautua i le Lakapi, e ala i so’o se auaunaga mai lava i Faiaoga i totonu o Aoga, i kalapu ma alalafaga ta’itasi, o Iuni Fa’aitumalo, i vasega o Laufalī, le auaunaga a Alii ma Tamaita’i Foma’I ma le Red Cross, le lagolagosua a Pulega a Alii ma Faipule o Afioaga, o Pulega ma e sa mau tofi ma galulue i totonu o le Iuni lakapi a Samoa.
Fa’amalo le galulue, fa’amalo mo le tou ola tautua i le atinaeina o fanau a Samoa e ala i lenei ta’aloga.
E fa’asili se fa’afetai a le tatou Malo i e uma o lo’o tautua ma sa avea ma sui ole Manu Samoa. Fa’afetai fa’afetai tele i le tou sao mo Samoa. O outou o ave fu’a ua lauiloa ai Samoa i le lalolagi. O lo tou sao, ua avea ma mitamitaga o tatou tagata i so’o se itu o le lalolagi.
O lea ua tapena e le Komiti Fa’atonu o le tatou Iuni Lakapi se fuafuaga e famanatu ai le tou sao taua mo outou uma sa tautua i le Manu Samoa.
Mo le tatou Iuni Lakapi Samoa, fa’amalo le galulue, fa’amalo le onosa’i. E le faigofie la outou pito laau. O le naunautaiga o le tatou Malo, tatou galulue fa’atasi, lea ua tulai mai le Matagaluega fou o Taaaloga ma alagaoa ma Fiafiaga o tagata e galulue ma la outou Pulega. Ia tula’i mai le tatou Lakapi i se tulaga lelei ma sili atu. I se tulaga e o faatasi ma manaoga ua iai nei le taaaloga lakapi I le lalolagi, I puipuiga ma le vaaiga o au, totogi o tama ma teine o le au fili a Samoa, o mea e manaomia ia atoa ai tapenaga, ia mafai ona faatino malaga, koleniga, aemaise le tulaga faapolofesa ua iai nei le lakapi.
O so’u manatu vaivai ma atonu e fai ma lu’itau Ia tatou uma. Tulou foi tama tuai o le Manu Samoa ona oute iloa o le mea lea sa mafai ai ona outou faatino le taaaloga iina aso. e aunoa ma se faalogologo tiga, le mativa ma le le tagolima sa iai le tatou au ma le tatou Iuni. I lenei vaitau, “ailoga e toe mafai ona tatou faapea, tatou o e fai i le loto, ailoga e toe malo se au I le faapea, faamoemoe i le lotonuu o tama”. Tama tuai o le Manu Samoa. Faamalo I lo outou alofa ia Samoa ma le taaloga sa outou gapatia ai.
Manatu e le o aveesea lena metotia taua mai le tatou au. Lea ua faatasi mai le tatou Manu Samoa filifilia, o loo ofo atu le latou malosi ma o latou loto mo le tatou atunuu. A o le fesili I le atunuu, o lea se isi mea tatou te faia e mafai ai ona siitia le tatou tulaga ma tatou finau ai ma isi au tetele.?
Manatu ua lava lea 100 tausaga sa tatou asa ma saili auala ai i le mativa i le taumafaiga o lenei taaloga. O le lakapi o le lumana’i o alo ma fanau ma Samoa.
Fai mai le Faifeau I le tatou faigalotu I le aso Sa. Tatou te le toe o i tua, tatou alo I luma ia togo ae se moemoe fou. E iai lo’u talitonuga e maua tupe, maua le lotonuu, maua le lagolago a le atunuu, ae sei tatou vaai poo lea le mea lea e noanoatia ai lenei atinae manaia.
E le uma le faasoa pea o le tatou Malo I tulaga o soo se taaaloga i totonu o Samoa atoa ai ma le Lakapi i nisi foi auala e fesoasoani ai le tatou Malo I le latou foi pito laau e atinae ai taaaloga.
Tama tuai o le Manu Samoa, o lea se isi tou sao mo le alu I luma o le lakapi, manaomia outou e le atunuu, o lea se tatou sao I le tatou lakapi? lafo atu. Le Iuni, faafefea ona tatou foi’a luitau o loo feagai ma outou ma le tatou au? le Malo ma tagata uma. O le manu Samoa o le au a le atunuu atoa.
E momoli atu le fa’afetai I Kamupani ma pa’aga uma i le tou lagolago i le Iuni Lakapi fa’apea so’o se ta’amilosaga i totonu o si o tatou atunu’u. Fa’afetai fo’i i le Pulega o le Lakapi a le Lalolagi, le World Rugby mo le tou sao taua i le Lakapi Samoa.
SOIFUA.
Ata Pueina – Malo o Samoa (Leaosa Faaifo Faaifo)
