(Aso Lua, 10 Setema 2024) TANOA HOTEL, Apia
1. Manatu o le a ou lē toe aga’i i Utumā’au o lea ua mae’a ona paelago Paia, Sā ma Faigā o le tatou aso. Ua faafofoga foi le Atua i sa tatou fa’apolo ma sā tatou fa’asagi ina ia tulituliloaina pea e lona Alofa ma ana Faamanuiaga sā tatou tautua faatauva’a.
2. Faamalo le folau ia outou afioga i Taitaifono o Komiti Faatonu, aemaise Ofisa Sili o Pulega a tatou Faalapotopotoga e 25 o iai nei. A toe manatu i le tatou feiloaiga muamua ia Iulai o le tausaga talu ai, sa 27 a tatou Faalapotopotoga. Ae e le toe po malaē i le tou silafia le fetu’una’iga o le SLC, STEC ma le SSFA lea e tau faamae’aina fuafuaga mo le faama’ape’ina faa le Tulafono, ma agai atu i Matagaluega fou e lua (2) lea ua faatuina faa le Tulafono, e pei o le Matagaluega o Eleele ma Fuafanua, ma le tatou Matagaluega o Taaloga ma Ala oa mo le fiafiaga o Tagata.
3. O lea foi ua faagasolo faatalatalanoaga a a’u nei le Minisita, ma tou afioga i Taitaifono ma Ofisa Sili o Pulega, mo le faamautuina o Fuafuaga Autasi poo Corporate Plans a tatou Faalapotopotoga. O le faauauina lea o le faatinoina o alafua a le Malo mo ana Faalapotopotoga e pei ona tuuina atu ai Letters of Expectations mo a tatou Faalapotopotoga uma i le amataga o lenei tausaga.
4. E avea ai foi lenei avanoa e faamauina ai le agaga o le faafetai ma le faamalo i a tatou Faalapotopotoga o lea ua maea ona faia tatou faatalatalanoaga ma ua faamautuina ai a latou Fuafuaga Autasi.
5. O le lu’i foi lea mo Taitaifono ma Ofisa Sili o Pulega o Faalapotopotoga e le i tuuina mai a latou Fuafuaga Autasi e faamautu ai a tatou consultations. Manatua, o le Fuafua Autasi, poo Corporate Plans, o le matafaioi patino lava lea a Komiti Faatonu ma Ofisa Sili. E ao la ona ave iai se faamamafa ma faataua ina ia mautinoa, ia faamaeaina uma a tatou Fuafuaga Autasi a o lei faaiuina le masina lenei o Setema. O le a o’u mata’ituina toto’a le faagasologa o lenei galuega taua, aemaise ai foi le tuliloaina o fuataga o galuega e ala ia tatou Lipoti faa le Kuata ma Lipoti faa le Tausaga lea e tuuina mai ia te a’u ma le tatou MPE.
6. E iai faaiuga a le Kapeneta ua taoto nei mo a tatou Faiga Faavae, e aofia ai faiga faavae mo totogi ma faamanuiaga o Ofisa Sili, o Faiga Faavae a le Matagaluega o Tupe mo Nonogatupe ma faaunegatupe e moomia ai le faamalumalu a le Malo, ae faapea foi Faiga Faavae mo le malu puipuia o ana aseta e pei o le Vehicle Regulations a le tatou Tulafono o Pulega o Tupe 2001.
7. Ou te fautuaina malosi a tou susuga i Taitaifono ma Ofisa Sili ina ia mulimulitaia ia Faiga Faavae. O lo o matau le Kapeneta ma le Malo i nisi Faalapotopotoga o lo o soli faavae, ma e pei o upu a le atunuu, e a Ulu tafega ae selefutia ai Vaisigano. E tatau i Faalapotopotoga a le malo ona usitaia ma mulimulitaia faiga faavae i le li’o o pulega lelei ma galuega faatino a Faalapotopotoga a le Malo poo le Public Bodies Framework.
8. O le asō, o le lona lua ai lea o a tatou feiloaiga faa le tausaga, e faasoa ai i taunuuga o a tatou galuega mo le tausaga faa le tupe 2023, aemaise o ona luitau ma le agai atu foi e faamautu galuega ma Lipoti faa le Tausaga o le 2024.
9. E fia faamamafa atu lava i Komiti Faatonu ma Pulega a tatou Faalapotopotoga le tausisia o Pulega lelei, aemaise i a outou faaiuga fai e faafaigaluega ma puipuia ai aseta a le tatou Malo.
10.Ia fai faaiuga lelei mo Faalapotopotoga, aua foi le tuua le tou galuega o le faailoa mai i le Minisita poo le Kapeneta nisi o faaiuga e tuuina atu tou te manatu e le faamalieina ai matafaioi a Faalapotopotoga o loo totonu o Tulafono. O le Kapeneta e lautele la latou silasila i vaega uma e tatau ona tuuina atu ai le auaunaga mo le atunuu atoa, o le vala la lena e ao ona lalaga faatasi atu iai ma galuega faatino a Komiti Faatonu ma Ofisa Sili a tatou Faalapotopotoga.
11.Ia manino foi le Taitaifono ma le Komiti Faatonu aemaise le Ofisa Sili ma le Pulega o Faalapotopotoga uma, i alafua ma faamoemoega, o miti ma atina’e a le Malo o lo o fia faatinoina. E tatau foi ona faatino ma le amiotonu, ma le le faaituau tiute ma matafaioi mo le manuia o a tatou Faalapotopotoga.
12. Ua iai nisi Faatonu, na tofi atu e le Malo e fesoasoani i le Komiti Faatonu ma le Pulega, ae uma ane pei ua tu tu faatasi mai ma le Pulega ae faasaga tau mai i le Malo. Manatua, o outou o lupe faalele a le tatou Malo i Faalapotopotoga taitasi. E iai le faamoemoe i le Malo o outou tou te tauaveina lea itu o lana galuega ina ia ausia sini autu na faatuina ai Faalapotopotoga ua tofia iai outou e avea ma faatonu.
13.Agalelei mai le Alii i lenei aso ma ona fuafuaga uma, ia maua ni finagalo anoa e unaia ai tulaga lelei o le faatinoga o galuega a tatou Faalapotopotoga uma a le Malo. Ia taumulimuli atu pea manuia o le Atua i o outou faiva ma tiute aemaise le valaauina.
Soifua ma ia manuia.
Ata Pueina – Malo o Samoa (Jasmine Netzler-Iose)
