(Aso Gafua, 30 Setema 2024)
Susu o lau susuga ile taitai ole sauniga,
Lau susuga faifeau toeaina
Rev Fiafia Toleafoa, afifio o malo fa’aaloalogia o lenei taeao,
afifio mai o le paia fa’alemalo aemaise le loaloa ole Matagaluega i ona tulaga fa’alupea ua afifio mai i lenei taeao e molimauina lenei
fa’amoemoe taua.
E manatu o paia fa’ata’oto’oto o lenei aso o le ā ta’oto ia fa’amaene
o tai loloto, aua e leai lava se tautai poto na te fia autalaina paia ma
mamalu o Samoa. O Paia mai le vavau e o’o lava ile fa’avavau. Nu’u
atu ia e fa’atini e tausala ma le faleupolu o tofiga aua ole latou lea
fatu’aiga tausi.
Ae ole a faga tonu loa le malama ma vili tonu le ifi o māina e tusa ai
ma lo’u tulai atu I lenei taeao liugalua, aua sina tala e fa’atatau i lenei poloketi/atina’e taua.
O lenei atina’e poo le fausina o lenei tunoa o se moemitiga ua leva
ona fuafua mai e le tatou malo ma le Matagaluega ole Soifua
Maloloina. O le fausiaina lea o se umukuka faapitoa ma fa’atotogaina aua lava le gaseseina o mea taumafa a le falemai tele Tuasivi nei.
O le auga lava ma le fa’amoemoe o lenei atina’e poo lenei tunoa, ina ia mafai ai lava ona gaseseina e le aufaigaluega fa’apitoa e aofia ai le au kuka (chefs) ma i latou oloo iai le tomai ma le agava’a I mea taumafa paleni ma le soifua maloloina lelei (Dieticians), ina ia mautinoa le soifua maloloina lelei o taumafa ole ā gaseseina aua le fofoga taumafa o gasegase oloo taofia i le falemai tele lenei i Tuasivi.
O le a faamalosia I lenei poloketi le unaia ole taumafa paleni ma le taumafai e fa’atele le taumafa I fualaau fai sua ma fualaau taumafa mata(Healthy Food) ae ia aua ne’i tele le taumafa o a tatou gasegase i meaai falai ma taumafa o loo tele ai le ga’o, suka ma le masima e pei o taumafa e iai Fish and Chips, fasi povi masima ma kuka ga’oa mai faleaiga ua fa’ateteleina ai le tino puta ma le toto maualuga i nai o tatou tagata Samoa.
O le isi vaega taua, o le a mautinoa le mama ma le lelei o mea e
gasese ai taumafa mo gasegase (Hygiene Purposes), aua ole a
faamalosia i lenei fale ma le aufaigaluega lava ia a le falema’i le
tumama lautele ma ia fufulu mama I vaivela ipu ma mea uma ole a
faaaogaina mo le gaseseina o mea taumafa.
Ia ma le vaega mulimuli, e manatu ole a tele se seleni fa’asao (cost
savings) a le Matagaluega ma le malo ole a mafai ona fa’asaoina ma sefe mai le okaina o meaai mai tua i isi faleaiga mo a tatou gasegase aua ole a mafai lava ona kukaina lava pe gasese lava e le aufaigaluega mea taumafa mo gasegase. O nisi na o penefiti ma le aoga o le a maua mai I lenei poloketi taua ua leva ona moemiti iai le malo male Matagaluega ole Soifua maloloina.
O le fa’amoemoega o lenei poloketi, o le a tapena lava e le
Matagaluega tagata faigaluega fa’apitoa e iai tomai ma agava’a e
faatinoa le gaseseina o mea taumafa e pei ole au kuka faapitoa
(chefs), ole aufaigaluega fesoasoani (kitchen support hand), tagata e iai tomai faapitoa mo taumafa paleni ma taumafa tatau mo le soifua maloloina (Dieticians) ia ma isi lava vaega ina ia mautinoa le ausia ofa’amoemoega autu o lenei poloketi, o le unaia lea ole taumafa i meaai paleni ma le soifua maloloina lelei.
O le fa’atupega o lenei poloketi, sa fa’atupeina lava e le malo o
Samoa I tupe fa’asao (savings) mai le paketi a le Matagaluega ole
Soifua Maloloina I lalo ole Special Purpose Account Fund. O le tau
aofai o lenei galuega e 1.4 miliona tala (1,440,607.88) sa fa’amanuia
ina ai le konekarate a le SCHWARZ CONSTRUCTION Ltd latou te
fausiaina lenei fale ile umi e fitu masina. O lenei atina’e e aofia ai le
fausiaina o le fale e iai totonu potu ma vaega ese’ese e talafeagai mo le kukaina o mea’ai e pei o ogaumu, aisa ma cooler, potu e teu ai oloa ma meafaigaluega fa’apitoa aua le gaseseina o mea taumafa.
E iai lo’u taofi, ua lava tapena ma ua saunia mea uma aua le fa’atinoga o mea taumafa mo Salafai nei. Pau lava sina vaega e fa’aatoa ai, ole taufa’asoasoaina lea o le aufaigaluega mai Upolu e fesoasoani mo le tau amataina o lenei fa’amoemoe ona ole utiuti ole aufaigaluega oloo galulue ile taimi nei..
Ia ole upu masani a le tatou atunu’u, o le mea e lelei mo Upolu, e
tatau foi ona lelei mo Savaii. Afai oloo tausasami fiafia gasegase ile
falema’i i Moto’otua ona oloo iai lava le umukuka/tunoa e gasese ai a latou mea taumafa, e tatau lava fo’i la ona mafai foi e Savaii ona kuka lava a latou mea taumafa mo gasegase ile falema’i tele iinei i Tuasivi.
E iai le taofi a au ole Minisita ma le faigamalo, o nei atina’e uma, e
mo le manuia lautele o si o tatou atunu’u ma ia fa’aleleia atili
auaunaga uma fa’asoifua maloloina mo le atunu’u atoa aemaise e
tatou malo asiasi mai atunu’u mamao.
Talitonu le toafi, o le a aoga lenei fale aua gasegase ma tagata nu’u
uma o Samoa oloo alaala ma papa’aao I Salafai nei. Ia e avea foi lenei avanoa e avatu ai foi se tu’ualalo ile tatou aufaigaluega ma le
Matagaluega ina ia fa’aoga ma le tatau ma le fa’aeteete nei aseta
taugata ma le taua a le tatou malo.
Soifua ma ia Manuia.
Ata Pueina – Malo o Samoa (Pule Puleina)
See insights and ads
All reactions:
2626
