Aso Faraile, 6 Setema 2024 – 12pm – Manono-uta Primary School
O le a lē toe sōlia le filifili o le vaosā o Samoa, pe toe asaina le ogāsami mamala lele, auā o lea ua uma ona fa’ata’oto e le fofoga o le aso le pa’ia lea. O paia o le Atua lea ua mae’a ona sula ma su’i e lana auauna, ua atoa ula ai lanu o le nuanua i le Alofa Agalelei o le Atua.
Pau lava o lea, e fia fa’apoi le tulaga ma mua’i ala uta, leaga ua mamalu ma mapu’epu’e lenei taeao na atofa.
Tulou lau susuga a le ta’ita’i o le sauniga. Tulou le pāpā’a’ao o lau afioga le tamā o le Itūmālō a Aiga le Tai. Tulou le maualuga o tupu ma e’e ma pona malolosi o le afioaga ma le au vala’aulia.
Tulou le alalata’i o lau tōfā a le matua o faiva ma le aiga sa Lemalama. Le e’e mai o le laulau ma le komiti fa’afoe ma mātua. Lau susuga a le asiasia’oga, pulea’oga, faia’oga ma le laumua i alo ma fanau aemaise fo’i o uo ma e masani a le laumua nei.
Tulou! Tulouna lava.
Ua talaleomalie le igoa tamaita’i e ala i le upu tuumumusu ale Atua i lenei taeao. E moni ai le upu “Ua malie le va’ai, ua malie le fa’alogo ua lologo sa o le fale na oloolo.” Ua fa’apena le lagona o lenei taeao. Ua logo i tino matagi lelei fa’asuaga fa’aleagaga, ua tau ai le ai i lo tatou va ma le Atua.
Fa’amālō i lau susuga a le ositaulaga i lenei taeao. Aua ne’i mavae le fa’au’uga a le Agaga i le feagai ai ma le vala’auina ma ia maua pea le lauga ma le mau auā le Mālō o le Atua.
Fa’afetai i le Atua ua mafai ona fa’amae’aina lenei galuega tele ma o lenei fo’i ua fa’ataunu’uina lona Tatalaina i lenei aso. Ua moni le tala a le Tusi. “O le fa’amoemoe ua taunu’u o le la’au lea o le ola a o le mana’o ua o’o e suamalie i le loto.”
E fia momoli le fa’afetai i le pa’ia o le Afioaga. Le pa’ia o le komiti ma mātua ona ua tafa lo outou finagalo e vala’auina le Mālō e faia se tala i le fa’ataunu’uina o lenei fa’amoemoe tāua.
Fa’afetai fo’i i le komiti le lagalaga ma moemanatunatu e pei o le tamāloa A’ana.
Malo le pale. Fa’amālō le sa’ili.
E ui i le tupe ae talitonu ana le galulue fa’atasi lo outou pa’ia ma le autufuga i le fa’atinoga o lenei galuega, e le mafai lava ona outou silasila ma va’ai i le tino mai o le fale lea.
O lea e momoli ai le fa’afetai i lo outou pa’ia sa outou pulupulima ma tapu’a’ao fa’atasi lenei galuega matagofie. Malo le fa’atoatoa.
Lau tōfā a le matua o faiva ma le falefa o lo outou aiga sa Lemalama, mālō le limalima ma le silasila. Ua matagofie le galuega lea ua molimauina lona tula’i mai.
Lau afioga a le pulea’oga ma susuga a faia’oga, le fale lena. E mana’omia le tausi lelei ma ia fa’apelepele iai ona e faigata ona tatou maua nei itu’aiga o fale taugata ma matagofie.
Le fanau, amu’ia outou ua outou maua lenei fale. Taumafai e puipui ma fa’aaoga lelei ia aogā ma umi aua isi tupulaga o loo fai a’e taeao.
O le mau a nisi e fa’apea: “E lē o le fale a o le anofale.” O lo’u manatu a lē lelei le fale e faigata fo’i ona maua se anofale lelei. E leai seisi e fia galue ma nofo i se fale matagā ma mālepelepe.
Tausi lelei le fale lea, e umi ai ona manaia. Mitamita i lau a’oga.
Lo tatou nu’u, tulei mai tatou fanau le aoga e fa’aaoga nei aseta ua maea ona fau mo le lelei o le itu tau a’oa’oga.. E tatalo atu matua, ia tu’u mai outou a’ao e lagolagosua i le galuega a faia’oga mo le manuia o fanau. Aua le faitau masei ae galulue fa’atasi ma le loto lelei mo se taunu’uga lelei. Ia fa’amanuia tele le Atua ia te outou fanau.
O le matou tala o le a taseu i fanua, leaga o la ou te vaai atu le tatou polokalame, e iai le isi fa’amoemoe o le komiti ma matua pe a maea le tatou fa’amoemoe lenei.
A ua sala pe lape se gagana, lafo i fogāva’a. Toe fo’i mai se upu ua lē taugalēmū i le fa’afofoga.
O le upu a e masani ai le atunuu, “E le tofu liu uma atu i le vaa.”
A ta’ape le filiali’i ia folau i lagimālie le aofia. Susū au’auna a le Atua i le lagimanino. Ni to’oto’o gauia ma ni fuelafo i le aofia.
Manuia le afioga tamā o le Itūmālō. Manuia le Komiti ma matua.
Lau susuga le asiasi aoga. Le Pule aoga ma le aiga faiaoga.
Soifua lelei le aofia ua poto i lenei aso.
Fa’amanuia le Atua i polokalame o totoe o lenei aso.
SOIFUA.
Ata Pueina – Malo o Samoa (Leaosa Faaifo Faaifo)
