Ua tala mai le lagi le mamalu o le Atua, ua faaalia foi e le vanimonimo galuega mamana a Ona Aao. Amuia le nuu ua latou lagona le leo fiafia, le Alii e, latou te savavali i le malamalama o ou fofoga, latou te fiafia lava i lou Suafa i aso uma, o lau amiotonu foi e maualuluga ai i latou.
O le silisiliese lea o le Atua ua Faavae ai Samoa, o Lona lava alofa ma Lona faamaoni o lea ua mafai ona tatou feiloai i le avafatafata i lenei taeao i Lona toafilemu. Ua ia faasopo mai foi le soifua o le tatou Palemene i lenei tausaga fou, fo’i atu ia le Viiga ma le faaneetaga ia te Ia e le aunoa.
Tulouna ia le malutaue’e o le Maota Fono o le atunuu, tulouna ia Tiafau o le Malae o le Faautugatagi a Samoa i ou sa ma faiga. A o ou paia foi ma mamalu faaifogata, i ou sa faale-atunuu i le afua mai Malaetele seia paia le siufanua i sisifo. Taoto ia i malaetaue’e e fia aua Aiga ma Tama, Tama ma Aiga, le Usoga a Tumua ma Pule, Ituau ma Alataua, Aiga i le Tai ma le Vaa o Fonoti.
E le vaea foi le falaooto i le fale na ula ma Malaetele, o ou Malaesā aua e faigata le Laau na Amotasi, Tootoo o le Faleula ma upu i le Manu’atele, Sua ma le Vaifanua, Fofo ma Aitulagi, Saole ma Saleaaumua ma le Launiu Saelua ma le nofo a Maopū.
I ou mamalu faale-Malo, le afio o lau Afioga i Le Ao o le Malo ma lau Masiofo, Sui o le Fono a Sui Tofia ma outou Faletua, afio lau Afioga i le Palemia ma Minisita o lau Kapeneta, le mamalu o Nofoa ma Sui Usufono mamalu uma o le Palemene a le atunuu.
Lau Afioga i le Faamasino Sili, lau Afioga i le Peresetene ma le mamalu o le Faamasinoga.
Afio lau Afioga i le Kovana Sili ma lou Faletua, le Lutena Kovana ma le Kapeneta, lau Afioga i le Peresetene ma le Maota Maualuga, le Fofoga Fetalai ma le Maota o Sui, le Faamasino Sili ma le Vasega o Faamasino.
A o ou paia faale-Talalelei le aoao o Samoa i ona tafa e fia, tulouna ia le afifio o Faaao o Ekalesia Kerisiano e fia i Samoa. O ositaulaga ma auauna faauuina o le Talalelei a le Atua, lo latou valaauina e tauasu le ipuvai o le ola mo se manuia o Samoa. Faafetai i le Atua i Lona lava alofa mutimutivale ua o tatou oaoa ai nei i lenei taeao fou, lea ua tatou fesilafai i le olioli ma le filemu mai ia te Ia. Na o tatou manatu lava i lagona e pei o le tula o le vao, sa o tatou savavali foi i le ala na fai ma faapogai o le nuu naumati, peitai ua o tatou sapi i laolao ona o le talitonu i mea e le vaaia. Faamalo le soifua manuia ma le lagi e mama, faafetai le faatoatoa.
Ou te faamanuia atu lenei tausaga fou. Ua fou lenei tausaga aua e fou pea le Atua ua Faavae ai Samoa le atunuu pele. Tatou tatanu ina ia lilo tapu o le faiva aua e le o se matalalaga lea a le taliuta ua na o se tautaulemau a le Nofoa, e le aoaia foi e le matapia le manaia.
A o tatou potopoto ai i le Maota Fono o le atunuu, ua faamanatu mai ia te au le tumati’e o tiute tauave o lo o tatou tauaveina o ni Sui Usufono o le Fonousu a si o tatou atunuu pele. O le Palemene lenei o lo o sufi ai upufai ma faaiuga e fausia ai le lumanai o le atunuu. Ia o tatou amanaia lenei faatuatuaga i le faamaoni, i le alofa ma le lotomaualalo.
Le mamalu e o le Maota, ua amatalia le tatou folauga i luitau ma tofotofoga i totonu o le tatou Malo. E ui i finagalo eseese masani e pei ona i ai le saolotoga e faaleo ai finagalo e tusa ma faiga faatemokalasi, ae ou te tatalo atu ma le faaaloalo ia o tatou manatua pea le tatou tautinoga o le loto faamaoni mo Samoa ma lona manuia e tatau ona sili atu nai lo mea uma. I taimi o le lē mautonu ou te fautuaina ia o tatou galulue punouai, o i tatou o ni tausimea o le filemu ma le lotogatasitasi.
I le mamalu faafofoga mai o Samoa, ua ou taulimaina le tusi mai i le Vaega Faaupufai a le Faatuatua i le Atua Samoa ua Tasi mo le faate’aina o nisi o le Vaega Faaupufai e toaono (6) o lo o i totonu o le Kapeneta. Ua faailoa mai o latou Suafa i faasalalauga faalauaitele mai o latou tulaga i totonu o le Vaega Faaupufai faapea foi matafaioi i le Kapeneta.
Ua fesiligia ai foi le avanoa o latou Nofoa i totonu o le Palemene, peitai e ao ona ou faamanino. O lea laasaga, e le mafai e le Fofoga Fetalai po o le Palemene ona faia se faaiuga e avanoa ai o latou Nofoa i le Palemene ona e le tusa ai ma aiaiga faale-Tulafono. E le aafia foi o latou tiute ma tofiga i totonu o le Palemene e tusa ma le Faavae ma isi Tulafono.
O latou tiute i totonu o le Kapeneta e le o afaina e tusa ma aiaiga o le Faavae.
Ua faailoa mai foi i lea tusi le auai atu o le Malo i le isi Vaega Faaupufai, peitai ou te le faaaogaina seiloga ua i ai ni mau maumaututu e faamaonia ai.
E i ai foi ala faale-Tulafono e mafai lava ona uia e i latou i fafo atu o le Palemene.
O le mataupu foi i se lafo o le lē faatuatuaina, ou te faailoa manino, i le vaai a le Fofoga Fetalai e le talafeagai mo lenei taimi. E le maua ai se manuia mo le Palemene ae a se filemu mo le tapuaiga a le atunuu.
O mataupu uma e pei ona tulai mai ma agiga i lenei vaitau e le o ni mataupu tau i le Palemene a o ni mataupu tau Vaega Faaupufai. E le moomia foi ona talanoaina i totonu o le Palemene aua e le o ni galuega tau i le Palemene. Faamolemole, e le o se Palemene a se Vaega Faaupufai a o le Palemene a le atunuu o lo o tapuai mai.
Fai mai upu o le tatalo a Mose, “Le Alii e, ua fai oe ma mea matou te nonofo ai i lea tupulaga ma lea tupulaga. A o le i fanaua mai mauga, e le i faia foi e oe le lalolagi ma le atulaulau, o le Atua oe mai le vavau e oo i le faavavau.”
A o le malelega foi a le Tupu Tafaifa mulimuli o le atunuu o Malietoa Vainuupo po o Malietoa Tavita na faamalosi mai ai mo Samoa, “Samoa, ia ou alu ifo i le eleele ma o’u mamalu, ae tafatasi paia ma mamalu i le Atua moni o Samoa.”
Le paia e o le Palemene, le Atua lea na valoia e o outou Tua’a ma ni o matou Matua i lo latou talitonuga na o Ia e i ai le amiotonu ma le manuia e faavavau. O alofa molipo foi ia mo le Palemene ma Samoa. Aua fai mai Tavita, “O lona alofa ua fai ma faleapitaga tatou te malu ai, o lona falefetafa’i foi tatou te mapu i ai i aso e le taugamalie ai.
O lau tatalo faatauanau ma le lotomaualalo i le paia o le Palemene i lenei taeao, ia alofagia, ua i ai le faamoemoe o le Fofoga Fetalai, e le talanoaina ia mataupu i totonu o le Palemene. E afua mai mauga manuia o nuu, e tafe atu foi i lenei Maota le suamalie o manuia mo Samoa mo a taeao.
Fai mai Iesu, “E iloa outou e tagata o o’u So’o pe afai tou te nonofo fealofani.” Tuu ia le tatou tusitusilima ae ia tatou femulumulua’i ma mulumuluaufoe o lo o faatali mai le atunuu pele. Samoa le atunuu pele matou te faamalulu atu ma asuasu atu vaimalu i puega i sau matau mai, pe afai ua i ai se aleu po o se faaletonu o lau Palemene alofa ma faamagalo. E matou te faamoemoe atu i lau tofā faale-Atua e malu ai lau Palemene i lau tatalo ma lau tapuaiga. Aua o upu lava e masani ai, “E le sili le ta’i nai lo le tapuai, e le sili foi le Taitai nai lo le felagolagoma’i.” O le tatou savavali faatasi i luma e faalagolago i le tatou gafatia e lagolago le tasi i le isi ma galulue faatasi mo le manuia o Samoa ma se Viiga o le Atua. Ia, o tatou manatua o le eseesega o mafaufauga e mafai ona avea ma puna o le malosi pe a laolao i le faaaloalo ma le faamoemoe tutusa.
Le paia e o le Palemene, ia avea lenei tausaga ma se tausaga o le faamoemoe faafouina, faamalosia le galulue faatasi ma le filemu. Ia o tatou faatino le tatou valaauina e tusa ma a tatou faaiuga ma faatinoga e siitia ai le soifua manuia o o tatou tagata, puipui a tatou tu ma agaifanua ma saunia ai le ala mo se lumanai mo augatupulaga a sau. Alofagia e le Atua lenei aso ma le alofaiva o le Palemene ia tafatafafuga i le Agaga Paia lo outou finagalo, manuia le usugafono i lenei taeao, manuia le atunuu o tatou mafuta faatasi, manuia le tapuai mai a le atunuu i Samoa nei ma so o se tafa o le Lalolagi.
