Lau Afioga i le Fofoga Fetalai, ou te tulai atu e faaopoopo i nisi o saunoaga a sui o le Malo i le mataupu o le lafo ua i le mamea nei.
O le autu o le lafo a le Sui o Lepa o le faamaonia lea e le Maota lenei le lē iai o se faatuatuaga ia te a’u o le Palemia ma lau Kapeneta ona e lē o ia i matou se lagolago fulisia i totonu o le Palemene.
Lau Afioga i le Fofoga Fetalai, e leai se sui po’o se vaega o sui i totonu o le Palemene lenei o iai se faatuatuaga fulisia (majority).
E lē o iai i le sui o Lepa, o lē ona le lafo. E lē o iai i le sui o Gagaifomauga 3. E lē o iai i le sui o Lotofaga lea e tautala atu.
E pei ona folasia e se tasi o sui Faipule o le Maota, o le taaloga lenei o le taaloga o fuainumera. O la’u mau, e 18 le fuainumera a le sui o Lepa, e 20 le fuainumera o le sui o Gagaifomauga 3 ae 15 le fuainumera o le sui o Lotofaga. O ia fuainumera e mamao ma le numera fulisia o le 27.
Na tā’ua e le sui o Lepa isi lafo o le lē faatuatuaina ma le suia ai o faigamalo ona na ausia fuainumera fulisia i totonu o le Maota. O le taimi lenei e lē o maua se fuainumera fulisia.
Ae tasi lona, lau Afioga i le Fofoga Fetalai, o le 15 lea e ia te a’u, poo le Kapeneta, o le Pule Faatonu, o loo ‘apo e le Tulafono Faavae, e faafoeina le Malo.
Ou te fia tautala i mafua’aga o lo’o aumai e le sui o Lepa e faavae ai lana lafo. O le puipui (a) e oo i le puipui (e) o loo faavae i luga o ni tusitusiga a le FAST i lau Afioga i le Fofoga Fetalai e aofia ai le faatea’ina o a’u ma minisita e toalima ma le faapea mai ua 29 sui o le FAST e lē faitauina ai le toaono ua faatea.
Ou te taofi e leai se tāua o ia tusitusiga e aumai i le lafo aua e pei ona e saunoa i le tatou fonotaga talu ai, e leai se malosiaga o ni faaiuga faavaega faaupufai e a’afia pe suia ai tofiga faale-Malo i totonu o le Palemene (silasila i le itulau 828 o fa’amaumauga o le Palemene – Hansard o le aso 21 Ianuari 2025).
I le ma le isi, e 35 sui faipule o le FAST na faatautoina mo le paeaiga lenei o lo’o faagasolo. Fai mai le tulafono e tasi le auala e vaea ai se sui faiupule mai lana vaega faaupufai i totonu o le Palemene, o lona faamavae. O le Kapeneta uma lenei e toa 15 o sui uma o le FAST. O le Kapeneta lenei o lo’o faafoeina ma faaauau le pulega faale-Malo i le tulaga na saili ai i le atunu’u i le palota o le 2021, e faatū le FAST e sui ai le faigamalo a le HRPP.
Ona ou o’o mai ai lea i le puipui (f) o mafuaaga e faavae ai le lafo o le lē faatuatuaina – o loo faapea mai:
“E taua tele mo le manuia lautele o le atunuu le faia ai o se palota o le tulaga le faatuatuaina ina ia aumaia ai se maninoga i lenei mataupu pe faamata o lo o iai pea i le Kapeneta, lea e aofia ai le Palemia, le faatuatuaga o le Palemene.”
E lua upu ou te manatu e tāua i le mau lea, o le “faatuatuaina” ma le “faamautinoaina”, “confidence” and “certainty.”
I le tulaga masani i le faaaogaina poo le faauigaina o le upu “faatuatuaina” i tulaga faa-Palemene, e faasino lea i le fulisia i se pulega. E fai ma faataitaiga, i le Palemene lenei e 53 ona sui mai Itumalo e 51, o le 27 o sui, e tino ai le fulisia po’o le tulaga faatuatuaina. E pei o a’u upu amata, e leai se sui poo se vaega i totonu o le maota lenei ua mautinoa ua iai se faatuatuaga atoatoa o le Palemene ona o le leai o se numera fulisia o ausia.
O lona uiga e lē anoa pe aoga se fesili o le faatuatuaina e taunu’u ai i se faaiuga tatau ma talafeagai i le lafo lenei – it is a moot issue. E lē o se mataupu e tatau ona amanaia.
Ona ou o’o mai lea i le upu “faamautinoaina”, “certainty.” Lau Afioga i le Fofoga Fetalai. Na o le pau le tulaga lea iai se mautinoa i totonu o le Palemene, o a’u ma le Kapeneta o loo faafoeina le Malo i luga o le Tulafono Faavae. O le pulea e se vaega toaitiiti poo se minority government o se Malo e lē o se tulaga ese. O loo tupu foi i isi Malo faatemokarasi ona o loo tulai mai ai i na foi Palemene le tulaga lea ua iai tatou. O le pulega a vaega toaitiiti o se faiga e faaauau ai se paeaiga ma faatino ai galuega tau pulega faale-Malo.
Lau Afioga i le Fofoga Fetalai, o lenei mataupu ua ave foi e le sui o Lepa ma le HRPP i le tulafono ma ua tolopo mai e le Fa’amasinoga seia maea atu se finagalo o le Palemene i le lafo lea ua tagofia nei.
Ua iai se mau e faapea ua vevesi ma faaletonu ma ua lē iloga i mafaufauga o tagata poo le a tonu le tulaga o loo faafoe ai le Malo – pe o tusa foi ma tulafono? Pe faapefea ona faaauau le faiga Malo lenei a ua vaevaeina le vaega faaupufai o le FAST lea e tū ai le Malo?
O le tali – ua faaauau le Malo i luga o le malosiaga o le tulafono ona ua le o iai se fulisia i le vaega o le HRPP poo le vaega ole FAST lea e taitai e le sui o Gagaifomauga 3, i totonu o le Palemene. O le tele o tala ma faasalalauga e faasaga mai i le Malo e le sui o Lepa poo le Taitai o le itu agai, ma faatulai mai le lafo o le lē faatuatuaina i le Malo, o se taga, o le tā tūtū o vae i le lē malie i le mea ua iai le Palemene – o le pulea lea o le Malo e se vaega toaitiiti e faavae i luga o le tulafono. O le mea ua tupu, o le mea ua iai. O le ata faamaoni lena o le Palemene o Samoa ma pulega faale Malo ua tatou o iai. O loo faagasolo lava le galuega faale-Malo e a’u nei ma le Kapeneta.
O la’u folasaga i le tatou fonotaga talu ai nei, na ou faaalia manino ai ua ou nofo sauni faatasi ma la’u Kapeneta e talia se finagalo o le Maota lenei i le mataupu o le faatuatuaina o le Malo i le faatinoga o’o o’o ua fofola mai e le tulafono. O lona uiga, a faamaonia le lafo o le a ou fautuaina le Ao o le Malo mo sana poloaiga e faataape ai le Palemene mo le faia o se palota tele, general election. A teena le lafo, o le a faaauau pea le faiga Malo lenei.
Lau Afioga i le Fofoga Fetalai tatou o atu ia e faagasolo le mataupu. A ua tatou le maua se tulaga o le faatuatuaina ona o itu ua folasia, talosia e tatou te maua se mautinoa i le laasaga o le a o’o atu loa iai le Palemene lenei.
>>> END<<<
See insights and ads
All reactions:
144144
