PALOTA LA’ITITI MO GAGAIFOMAUGA #3
Tusia: Tusiga Taofiga
O le asō ua amata ai le resitala mo le Itumalo o Gagaifomauga #3, e pei ona i ai le Ofisa o Faiga Palota i Savaii mo le fa’atinoga o lenei auaunaga seia mae’a i le Aso 31 o Iulai 2020.
I le feiloa’iga a le Savali ma le Komesina o Faiga Palota, Faimalomatumua Mathew Lemisio, na ia fa’ailoa ai, o le Aso Faraile o le vaiaso ua mavae, na tu’uina atu ai le tusi o le poloa’iga a le Fofoga Fetalai ia te ia ma le Ofisa o Faiga Palota, e fa’amaonia ai le avanoa o le nofoa o le Itumalo o Gagaifomauga Numera 3, ina ua tu’uina atu le fa’amavaega aloaia tusitusia a La’aulialemalietoa Leuatea Polataivao, o le sa avea ma Faipule o le Itumalo.
I le taimi nei e 1,414 le aofa’i o tagata sa resitala mo le Itumalo o Gagaifomauga #3 i le Palota i le 2016, peita’i o lo’o fa’agasolo nei le galuega resitala a le Ofisa o Faiga Palota, ma ua talosaga ai e le Komesina, Itumalo uma i le atunuu aemaise Gagaifomauga #3 o lo’o tapena lana Palota La’ititi, ia tautuana tautau se ie po’o se fu’a pa’epa’e i lumā fale o aiga, pe afai e le’i mae’a ona resitala i latou e tatau ona Palota, e faigofie ai i le aufaigaluega ona iloa tonu i latou ua tatau ona fa’atino a latou resitala.
I le Tulafono o Faiga Palota, so’o se Palota la’ititi lava e faia, e tatau ona fa’ataunuu a’o le’i o’o i le 6 masina e lumana’i ai le Faiga Filifiliga tele a Samoa, ma o le mafua’aga lena o lo’o mafai ai ona fa’ataunuu pea le Faiga Palota La’ititi a Gagaifomauga #3.
Fa’ailoa e le Komesina, fa’atoa fa’alauiloa aso e fa’ataunu’u ai le Palota La’ititi mo lea Itumalo, aso e fa’aulu ai Sui Tauva, aso e fa’agata ai le toe fa’aui i tua o suafa o so’o se Sui Tauva, aemaise o le aso e mae’a ai le iloiloga fa’ai’u a le Komesina o Faiga Palota fa’atatau i agava’a o Sui Tauva ta’itasi o le a tausinio pe a mae’a le Resitala o lo’o fa’agasolo nei.
Na saunoa fo’i Faimalomatumua, pe afai ae fa’agata le fa’auluina o Sui Tauva mo lea Palota La’ititi ae leai se tasi ua fa’auluina lona suafa, o lona uiga, o le a ta’oto lea Palota La’ititi mo le tolu masina e tālia ai se isi poloa’iga mai le Fofoga Fetalai, auā se isi aso e fa’ataunuu ai lea fa’amoemoe peita’i afai ae tupu lea tulaga, o lona uiga o le a lē fa’ataunu’uina lenei Palota La’ititi ona ua a’afia le ono masina o lo’o fa’atulafonoina e lē tatau ai ona faia se Palota La’ititi ona o lo’o loma le Palota tele a Samoa aoao i le tausaga fou.
Ae afai ae tapunia le avanoa mo le fa’auluina o Sui Tauva o lea Palota La’ititi ae na’o le to’atasi sa fa’aulu atu i le Ofisa, o lona uiga i lalo o le Tulafono o Faiga Palota, o le a aloaia ai loa lea tagata e avea ma Sui Faipule o le Palemene mai le Itumalo o Gagaifomauga Numera 3 na te tauaveina le tofi o le Itumalo mo nai masina o totoe o lenei paea’iga.
Fa’ailoa e Faimalomatumua, ua lava tapena le Ofisa o le Komisi o Faiga Palota, e faia le Palota La’ititi mo Gagaifomauga #3, auā sa amata tapena mai lava le Ofisa ina ua mae’a le Palota tele a Samoa i le 2016, soso’o ai ma le Palota La’ititi a le Itumalo o Fa’asaleleaga #2 i le tausaga ua mavae, o lona uiga o lu’itau uma ma lesona aogā sa fa’amauina i nei Faiga Filifiliga ua mavae, ua toe matimati ai le auaunaga a le Ofisa auā le Faiga Palota La’ititi o le a faia ma le Palota tele a Samoa ia Aperila o le tausaga fou 2021.
