19 AUKUSO 2020: Na amatalia i Taualumaga a le Palemene o le Aso Lua, 18 Aukuso 2020, ona lē o toe fa’asalalauina Taualumaga i luga o le upegatafa’ilagi o le Facebook e pei ona masani ai. O lea ua maea ona faatulaga ma faaaogaina le upegatafa’ilagi o le Youtube mo le auaunaga masani a le Palemene.
Ua faia lenei suiga ona ua maitauina ma le faanoanoa le faatupula’ia o uiga lē migao e tauala i fa’amatalaga so’ona lafoa’i i Sui Usufono o le Palemene, ma ua solia ai le va-tapu’ia ma le lē fa’aaloalo i Taitai o le atunuu.
O le naunauta’iga o le Ofisa o le Fono Aoao, ia maua uma e tagatanuu e le gata i Samoa nei, ae faapea foi i tagatanuu o lo o afifio i atunuu i fafo, Taualumaga ma Felafolafoaiga a le Fono Aoao. Peitai, ua lē o gatasi le futia ma le umele e tusa ai ma lenei faamoemoe.
O le ala lea sa toe iloilo ai nisi auala talafeagai, e faatino ai le auaunagai se auala e malupuipuia ma saogalemu aua le faafofoga maimoa mai o si o tatou atunuu.
Ua mafai nei ona tuuina atu Taualumaga ma Felafolafoaiga a le Fono Aoao Faitulafono, e aunoa ma le toe faalavelaveina i ni lafoga lē manuia, aua le maimoa tapuai mai o si o tatou atunu’u aemaise o alo ma fanau o Taitai o Samoa mo a taeao.
