Taofia mo se Taimi Lē Tumau o Faigamalaga mai Niu Sila i Samoa (Repatriation Flights) ona o Tulaga Faatupulaia o le Faama’i o le COVID19 i Totonu o Aukilani-Niu Sila
(OFISA O LE SO’OUPU); I lana Fonotaga Faapitoa 35 o le Aso Lua 25 Aokuso 2020, na talanoaina ai e le Kapeneta ma faatulafonoina ai e le Ao Mamalu ole Malo e faapea:
I. Le tapunia o tuaoi fava-o-malo (International Borders) mo faigamalaga uma i le va o Samoa ma isi atunuu seia toe iai se isi faaaliga;
II. Le faatinoina o le faasalalauga faalauaitele mo le nofo silafia o le atunuu i le tapunia o faigamalaga a vaalele e agai mai i Samoa i le taimi nei;
III. Le faatonuina o le Komiti mo Faalavelave Tutupu Faafuasei (NEOC) e tagai i ni auala talafeagai e toe faafoi mai ai fanau o loo aooga faasikolasipi i atunuu i fafo;
IV. Le tolopo o le faigamalaga mai Niu Sila sa fuafuaina i le Aso Faraile 28 Aokuso 2020 seia toe iai se isi faaaliga.
Le amata faamamaluina o nei suiga i le Aso Lulu 26 Aokuso 2020 seia toe iai se isi faaaliga.
E faatumauina pea isi aiaiga o Poloaiga o Faalavelave Tutupu Faafuase’i na mua’i tuuina atu.
O lenei faaiuga na faia i lona tulaga faanatinati e tusa ai ma le Vaega 38(1)© o le Faavae o le Malo Tutoatasi o Samoa.
