Ua ripotia mai Amerika Samoa, e to’atolu (3) ni tagata ua faamaonia le a’afia i le faama’i o le KOVITI-19. Ua faamaonia foi o i latou ua a’afia o ni tagata faigaluega i le va’a la’uoloa, o le Fesco Askold lea na taunuu i Amerika Samoa i le Aso Sa, 8 Novema 2020 (taimi a Amerika Samoa).
Na vave faailoa mai lenei mataupu e le Faatonusili o le Soifua Maloloina o Amerika Samoa, Aifili Tufa i le Faatonusili o le Soifua Maloloina a Samoa, Leausa Samau Dr. Take Naseri i se la fesootaiga i le telefoni i le po anapo.
Na amata malaga mai le va’a o le Fesco Askold mai Kalefonia, ona afea lea o Tahiti, faato’a malaga mai ai i Samoa i le Aso Sa, 8 o Novema. Na vave tu’ua e lea va’a Samoa i le taeao o le Aso Gafua, 9 o Novema mo Amerika Samoa.
E le i atoa se 24 itula na taula ai le va’a o le Fesco i le uafu i Matautu. E mautu le faafoega o le faagasologa o tulaga uma mo le tuuina atu o le faatagaga e ulufale mai ai soo se va’a i le uafu. O lenei galuega e mata’ituina faatasi e le Matagaluega o le Soifua Maloloina, Matagaluega o Leoleo, Matagaluega o Tiute, Ofisa Fa’aasu, Ofisa o Femalagaiga ma le Pulega o Uafu, ma na uia e le va’a o le Fesco Askold nei tulaga uma.
E pei ona sau ai i le amataga o le Poloaiga mo Faalavelave Tutupu Faafuasei o le KOVITI-19, o va’a uma e fia ulufale i Samoa e manaomia le faia uma o kilia faafoma’i mo le auva’a, ua i ai pepa faamaonia e leai ni a’afiaga i le KOVITI 19, faatasi ai ma ripoti o atunuu sa afea muamua. E siaki uma e le sui o le Soifua Maloloina a Samoa nei pepa faamaonia i tua atu o le a’au, tusa lea ma le tasi le maila le mamao mai le uafu i Matautu. Faato’a mafai ona ulufale se va’a i le uafu i Matautu pe a faamalieina uma nei tuutuuga faasoifua maloloina.
O le auva’a uma e aofia ai ma le Kapeteni o le va’a e tatau ona faanofoesea i se potu faapitoa o le va’a a o faagasolo siaki a le Soifua Maloloina. A faamalieina loa tuutuuga uma a le Soifua Maloloina a Samoa, ona faato’a aumaia lea o le va’a e se sui o le Pulega o Uafu a Samoa i totonu o le uafu.
O le a tapu le vaega tonu o le uafu e taula ai lea va’a, ma e leoina foi e Malu o le Malo ina ia mautinoa e leai se tasi o le auva’a e tulaueleele i luga o le uafu. O latou e galulue i auaunaga eseese i luga o le uafu, o le a mata’ituina lelei foi ina ia mautinoa e leai se latou fesootaiga ma se tasi o le auva’a.
O nei faagasologa uma sa mulimulitaia ma le toto’a, a o faia siaki mo le va’a o le Fesco Askold. O le aufaigaluega uma a le Malo sa faatinoa siaki, sa malu puipuia ma faia latou ofu faapitoa mo le puipuiga, tali fofoga ma totini lima faapitoa i le taimi na faatino ai o latou tiute. Sa faamamaina faapitoa mo le puipuiga (sterilized) tino o pusa oloa (containers) sa aveese mai le va’a. O nei galuega faifaatasi uma ua faatinoina ma le toto’a ina ia mautinoa le saogalemu ma le malu puipuia o Samoa mai le KOVITI 19.
E o’o mai i le asō, o lo o tumau pea le saogalemu o Samoa mai le KOVITI 19, ma e faaauau pea le galulue punoua’i o le Ofisa Tutotonu mo le Faafoeina o Faalavelave Matuia ma Faafuasei (NEOC) e auala i le faagasologa lelei o galuega a ofisa o gafa ma auaunaga i uafu ma malae vaalele, ina ia malu puipuia pea Samoa i nei taimi faigata.
Mo le faamalosia pea o le puipuiga o Samoa mai le faama’i, ua faanofoesea ai nei i se nofoaga faapitoa tagata faigaluega uma sa faatinoa le auaunaga mo le va’a o le Fesco Askold. O se tasi lea o vaega o puipuiga faasoifua maloloina. O le a faasolo a latou siaki faapitoa o le KOVITI 19 i totonu o le lima aso o lumanai. E o’o mai i le asō o lo o tumau pea le soifua maloloina ma le malolosi atoatoa o i latou uma nei.
