(OFISA SOOUPU); Ua tuuina atu le fa’amanatu a le Komiti Faufautua mo Fa’alavelave Tutupu Fa’afuase’i ma Matuia (DAC) e ala mai i le Ta’ita’ifono ma le Ofisa Sili o le Matagaluega o le Soifua Maloloina mo le atunu’u lautele e tusa ai ma aiaiga mo maota gasegase, o gasegase, tausima’i ma si’igama’i a o i ai Samoa i lalo o Poloaiga o le KOVITI-19.
I se fa’atalatalanoaga ma tusitala na saunoa ai le Taitaifono e faamanatu i le atunu’u o lo’o tumau pea Samoa i le vaega numera tasi o puipuiga (Level 1) i le lanu samasama lea o lo’o fa’aauau ai pea ona fa’amalosia le faia o tali fofoga, tumama lautele aemaise feso’ota’iga vavamamao.
O lo’o manino i lalo o Poloaiga mo Faalavelave Fa’afuase’i ia aiaiga atoa uma e fa’atatau i maota gasegase, gasegase, tausima’i ma si’igama’i:
- Ua matua tapu ona toe ulufale se tagata i so’o se falema’i sei vagana ai, ua moomia ona vaai se foma’i
- Mo le tagata ua taofia
- ua na o le tasi le tagata tausima’i e faataga; ma
- e na o le toalua (2) tagata e fa’ataga mo asiga
O lo’o tumau pea fa’asalaga mo i latou e solia Poloaiga o lo’o ta’ua i luga mo Faalavelave Tutupu Faafuasei mo le Faama’i o le KOVITI-19:
- Tagata ta’ito’atasi – $200 mo le solitulafono muamua, ma le $500 i aso ta’itasi e fa’aauau ai lea solitulafono
- Mo fa’alapotopotoga fa’atulafono e $5,000 mo le solitulafono muamua, ma le $7,000 i aso ta’itasi e faaauau ai lea solitulafono
Mo le aotelega o Poloaiga aemaise fa’asalaga mo solitulafono, asiasi i le Upega o Fa’amatalaga mo le Malo o Samoa – https://www.samoagovt.ws/category/novel-coronavirus-covid-19/
Mo fa’amatalaga fa’atatau i Poloaiga ma nisi fa’afesili, fa’afeso’ota’i le Ofisa mo Fa’alavelave Fa’afuase’i (NEOC) i le 997/32759. Mo fa’amatalaga fa’ale-soifua maloloina, vala’au i le 8006440.
