(OFISA SOOUPU); Ua mae’a ona pasia e le Kapeneta nisi o suiga o Poloaiga mo Faalavelave Tutupu Faafuasei mo le Faama’i o le KOVITI-19 lea e aofia ai le toe tatala o le malaga a le vaa la’upasese e tasi i le Aso Sa i le va o Upolu ma Savaii. O lenei faigamalaga e malaga atu i Mulifanua i le itula e 3:00 ae taliu mai Savaii i le itula e 5:00 i le afiafi. O nisi o fesuiaiga e fa’atatau lea i itula faaopoopo e taula ai va’a fagota i le Uafu i Matautu aemaise le fa’atulagaina o faigamalaga mo le kuata mulimuli o le tausaga.
E ui lava i fesuia’iga o lo’o i ai, o lo’o tumau pea le tele o tapu aemaise lava mo taimi e tatau ona tatala ma tapunia ai ia pisinisi eseese aemaise maketi i Upolu ma Savai’i lea o lo’o autalaina atu i lalo mo le silafia e le atunu’u:
- Maketi – Tatala mai le Aso Gafua i le Aso To’ona’i mai le 6 i le taeao seia o’o i le 8 i le po
- Aso Sa – TAPUNIA ai Maketi uma lava i le atunu’u
- Supamaketi – Tatala mai le Aso Gafua i le Aso To’ona’i mai le 6 i le taeao seia o’o i le 10 i le po
- Aso Sa – Tatala mai le 3 i le aoauli seia o’o i le 10 i le po
- Nisi o pisinisi e mafai ona tatala i le Aso Sa i lalo o aiaiga o lo’o i Poloaiga
- Pamu penisini – tatala mai le 3 i le aoauli seia o’o i le 10 i le po
- Fale talavai – tatala mai le 3 i le aoauli seia o’o i le 10 i le po
- Faleaiga – tatala mai le 12 i le aoauli seia o’o i le 10 i le po
- Faleoloa laiti – tatala mai le 3 i le aoauli
E 198 le aofaiga o fa’asalaga (tickets) ua tuuina atu e le Matagaluega o Leoleo talu ona amatalia le fa’amamaluina o Poloaiga mo Faalavelave Tutupu Faafuasei mo le Faama’i o le KOVITI-19. O le aofaiga o lapataiga (warnings) mo Poloaiga talu mai Mati 2020 e 406, 344 mo Upolu ma le 62 mo Savaii. O lo’o faaauau pea asiasiga ma galuega fa’atino a le Matagaluega o Leoleo aua le mata’ituina o Poloaiga o lo’o faamalosia pea mo Samoa.
Fa’asalaga o lo’o i ai nei mo i latou e solia Poloaiga o lo’o ta’ua i luga mo Faalavelave Tutupu Faafuasei mo le Faama’i o le KOVITI-19:
- Tagata ta’ito’atasi – $200 mo le solitulafono muamua, ma le $500 i aso ta’itasi e fa’aauau ai lea solitulafono
- Mo fa’alapotopotoga fa’atulafono e $5,000 mo le solitulafono muamua, ma le $7,000 i aso ta’itasi e faaauau ai lea solitulafono
Mo le aotelega o Poloaiga aemaise fa’asalaga mo solitulafono, asiasi i le Upega o Fa’amatalaga mo le Malo o Samoa – https://www.samoagovt.ws/category/novel-coronavirus-covid-19/
Mo fa’amatalaga fa’atatau i Poloaiga ma nisi fa’afesili, fa’afeso’ota’i le Ofisa mo Fa’alavelave Fa’afuase’i (NEOC) i le 997/32759. Mo fa’amatalaga fa’ale-soifua maloloina, vala’au i le 8006440.
