14 Iulai 2021
(OFISA SOOUPU); O le vaiaso nei na toe fa’aauau ai le fa’atinoina o tui puipui mo le KOVITI-19 talu mai le taofiga lē tumau o tui puipui i le vaiaso ua tuana’i.
E tusa ai ma fa’amaumauga a le Matagaluega o le Soifua Maloloina:
• Tui muamua (first dose): 53,540 (29,864 alii & 23,676 tamaitai) e tusa lea ma le 43.9% o le faitau aofai o le atunu’u e agava’a i le tui puipui o le KOVITI-19
• Tui lona lua (second dose): 11.406 (6,371 alii & 5,035 tamaitai) e tusa lea ma le 9.4% o le faitau aofai o le atunu’u e agava’a i le tui puipui o le KOVITI-19
O le aso ananafi sa fa’asalalau ai e le Matagaluega o le Soifua Maloloina ia taimi ma nofoaga o le a fa’atinoina ai tuiga mo le KOVITI-19.
Nofoaga mo tui muamua (first dose) ma tui lona lua (second dose):
• Falea’oga Fa’apitoa a le MOH, fa’afesaga’i ma le Fale Fa’amamā Toto (NKFS) Motootua
• Ofisa Tutotonu mo Polokalame o Tui Puipui (fale lanu moana fa’afesaga’i ma le Seb n Rene) Motootua
• Ofisa o le Soifua Maloloina – Matagialalua
• Ofisa o Tuirisi ma Tagata Maimoa (STA)
O nei nofoaga e tatala mai le Aso Gafua i le Aso Faraile mai le 9 i le taeao seia oo i le 6 i le afiafi, fa’atasi ai ma le Aso To’ona’i mai le 9 i le taeao seia oo i le 1 i le aoauli, e fa’atino ai tui puipui mo so’o se tasi e agava’a e fa’atinoina lona tui puipui. O le a fa’apea foi ona fa’atino ai tatou tui lona lua (second dose) o le KOVITI-19 mo e ua tatau ona fai latou tui lona lua (second dose).
O lo’o fautuaina e le Matagaluega le atunu’u ina ia aumai pepa fa’amaonia (ID), Tusifolau po’o se pepa fanau mo le fa’amautuina o fa’amaumauga.
Mo fa’amatalaga fa’atatau i Poloaiga ma nisi fa’afesili, fa’afeso’ota’i le Ofisa mo Fa’alavelave Fa’afuase’i (NEOC) i le 997/32759. Mo fa’amatalaga fa’ale-soifua maloloina, vala’au i le 8006440.
—
