Aso 10 Tesema 2021.
Susuga Utufua Naseri
Minisita ole Kapeneta
Sui Faipule ole Palemene
Sui o malo mai fafo
Sui o faalapotopotoga tumaoti ma matagaluega ale malo
Sui o nuu ma alaalafaga
Alii ma Tamaitai
Ou te faatalofa atu i tou paia ma mamalu ua faatasi mai i lenei sauniga faitaulia!
Ole aso 10 Tesema o tausaga taitasi ua faamanatuina ai ile lalolagi atoa polokalame e faailoga ai le Feagaiga mo Aia Tatau a tagata soifua e pei ona sainia ile 1948. O lenei feagaiga oloo faalauiloa ai Saolotoga ma aia tatau mo tagata uma ma ua faamauina ose matatia aupito taua mo tagata soifua uma.
Ua faailoga ina foi le taua o lenei aso i Samoa nei e faamanatu mai ai le mauaina e tagata nuu uma o nei saolotoga ma aia tatau.
Oloo faaauauina le tutumau o Samoa ile puipuiga o nei aia tatau ma ua faaaogaina lenei aso e tutū faatasi ai ma atunuu ole lalolagi ile faailogaina o lenei feagaiga. E tolu ni sauniga taua ua tatou faailogaina ai le Aso mo Aia tatau I lenei tausaga.
Ole sauniga lenei ose avanoa e soalaupule ai mataupu taua tau aia tatau ma oloo taitaia ele Ofisa ole Komesina mo Sulufaiga ma le ofisa e gafa tonu ma ia matupu. O le sini autu ’ole fausia o faalapotopotoga malolosi e ala i faiga pulega lelei ma aia tatau a tagata. Ole faamoemoe o lenei faatalanoaga ole faavaeina lea ose faavaa mautu e fefaasoaa’i ai ni taunuuga lelei mo le uunaia o faiga pulega lelei ma le aloaia i auala taualoa o aia tatau a tagata.
Ole aso ole a taualuga ai le 16 aso mo le tetee atu i sauaga o tamaitai ma tama teine. E ia te au le fiafiaga maualuga oute faalauiloa ai Faiga Fa’avae ma I’ugafono a nuu nei: Lalovi Mulifanua ma Vaiee i Upolu faapea Taga, Asau ma Saleia o Savaii. O tulafono a nei nuu ma afioaga ua faailoa mai ai lo latou le taliaina o nei sauaga. Oloo faailoa mai ai foi le taua o matafaioi a alii ma faipule faapea taitai uma o nuu ile tetee atu I sauaga faapea le puipuiga o tamaitai ma alo teine ole nuu mai i ia tulaga maulalo.
E avatu foi the faamalo i Fono mamalu a Alii ma Faipule o nuu ma afioaga e pei ona ta’ua. Ole tou naunautaiga ina ia soloia sauaga e ala ile faamalosia o a outou tulafono faalenuu ose faaiuga tatau ma se gaoioiga aupito taua lea ile puipuia ai o aia tatau a tagata ae maise ole tetee atu i soo se sauaga.
Oute fiafia foi e faailoa atu nisi o tatou faalapotopotoga tumaoti ua loa tausaga o galulue punouai e faailoa ma faalauteleina le silafia o tatou tagata nuu le taua ole faatinoga o aia tatau a tagata uma. Ose itula oi luma ole a tufatufaina atu ai outou tusi taualoa e faamauina ai outou sao taua ile faamanatuina o aia tatau.
