Tusia: Tusiga Taofiga
Komesina o Tineimu, Afioga ia Tanuvasa Petone Mauga
O lo’o tumau pea ona vaaia e le Komesina o le Pulega o Tineimu ma Fa’alavelave Tutupu Fa’afuase’i ma lona Ofisa, le fa’atupulā’ia o le leai o se fa’amamafa ma le fa’atāua i nisi o le mamalu o le atunu’u, e ala i le feso’ota’i muamua o le 911 mo se fesoasoani mo e ua a’afia ma mafatia.
I le molimau a le Komesina o Tineimu, Afioga ia Tanuvasa Petone Mauga o lo’o matauina pea le to’atele o nisi, na’o na tupu lava o le fa’alavelave fa’amuamua loa ona pu’e ata (photos & videos) ma fa’asalalau i luga o upega tafa’ilagi, ae galo ai le galuega alofa e tatau ona fa’amuamua mo se ola o le a ma’imau po’o ni meatotino fo’i ua fa’atamaia.
O ia faiga ua maitauina ai, pei ua fai fa’atauvaga e nisi ia gaioiga, po’o ai e muamua fa’ailoa sea fa’alavelave ua tula’i mai mo le silamaimoa a le lalolagi, ae fa’atuatuana’i ai fesoasoani muamua sa tatau ona mua’i fa’atino.
O ia gaioiga ua avea ma ala e fa’atuai ai ona logoina le Pulega o Tineimu, ma atili tuai ai ona ofoina atu le auaunaga ma le tautua a le Ofisa mo se ua a’afia ma mafatia, ona o ni fa’alavelave tau ta’avale po’o ni mu fo’i pe malemo fo’i i le sami.
O le isi tulaga na fa’ailoa e Tanuvasa, pe afai fo’i ua taunu’u atu le Ofisa, e tatau lava ona i ai fo’i nisi e fa’alavelave i galuega i le nofoaga tonu o lo’o tupu ai se fa’alavelave aemaise pe afai e fa’asuā – āva nisi, e le gata i lea a’o le leaga o auala e aga’i i maota ma laoa o e sa a’afia aemaise o aiga sa fia maua se fesoasoani ma avea ai ma tulaga na fa’aletonu ai nisi o ta’avale a le pulega sa tali atu i valaau.
Fa’atasi ai ma le isi vaega tāua, o le fa’asinoga o nofoaga tonu o lo’o aga’i mai ai le valaau, auā e i ai taimi e ‘ese le nofoaga o lo’o valaau mai ai le tagata i le telefoni, ‘ese le nofoaga o lo’o tupu ai le fa’alavelave.
O le tasi lenā o itu lelei, o le galuega tele a le Mālō o lo’o ua amata fa’atino nei, mo le fa’aigoaina o auala ma le fa’atuātusiina o maota ma laoa.
Mo le fa’ai’uga o lenā tausaga ua mavae atu fa’atasi ai ma le amataga o lenei tausaga fou 2022, o fa’amaumauga nei mai le Ofisa o le Pulega o Tineimu ma Fa’alavelave Tutupu Fa’afuase’i, i le aofa’i o fa’alavelave sa tali atu ai le Ofisa e ala i la latou galuega fesoasoani.
O Fa’amaumauga ia o le Masina atoa o Tesema 2021 (01/12/2021 – 31/12/2021)
Mu fale – 5 (Faleasi’u, Vaitele tai, Island Grill Fugalei, Taufusi ma Sale’aula)
Mu Va’a – 1 I totonu o le Compound a le Bluebird Vaitele
Mu Ta’avale – Leai se mu na fa’amauina
Mu Vaomatua/Vao – Leai se mu na fa’amauina.
Mu o Lapisi – 11
Fa’alavelave Tauta’avale– 11 (MVA)
Galuega Lavea’i i le Sami – Leai se fa’alavelave na fa’amauina (Sea Rescue)
Galuega lavea’i i le Togāvao – Leai se fa’alavelave na fa’amauina (Land Rescue)
Auaunaga o Ta’avale Ma’i (Ambulance) – 334
O fa’amaumauga o Aso Fiafia (Festive Season) (20/12/2021 – 07/01/2022)
Mu fale –2 (Vaitele tai, ma Taufusi)
Mu Ta’avale – Leai se mu na fa’amauina
Mu Vao – Leai se mu na fa’amauina.
Mu o Lapisi – 5
Fa’alavelaveTauta’avale–5 (MVA)
GaluegaLavea’I I le Sami – Leai se fa’alavelave na fa’amauina (Sea Rescue)
Galuegalavea’I I le Togavao – Leai se fa’alavelave na fa’amauina (Land Rescue)
Auaunaga o Ta’avale Ma’i (Ambulance) –127
O lo’o fa’aauau pea le auaunaga a le Pulega o Tineimu ma Fa’alavelave Fa’afuase’i i le taimi nei, a’o le tatalo a le Ofisa ma le aufaigaluega atoa, ina ia alofagia e Samoa, tautuanā o le fa’asaoina o se soifua mai i ni fa’alavelave matuiā, o le galuega fai fa’atasi, ae le’o se ata malie e pei ona manatu māmā ai nisi.
O lo’o tumau pea le auaunaga fesoasoani a le Tineimu, mo le 911 vili fua pe a mo’omia se fesoasoani mo fa’alavelave matuiā e pei ona fa’ailoa atu.
