Tusia: Tusiga Taofiga
E lua ni afā tetele o lo’o ta’amilo nei i le vasa Pasefika, e pei ona i ai le afā muamua o Cody lea sa fa’amauina le a’afia ai Fiti i aso fiafia.
Ma o lea afā na molimauina ai le tetele o tafega i lea Mālō ma ma’imau ai le se soifua o se tasi o tagatanu’u o Fiti.
O le isi fo’i afā o lo’o ta’amilo ane i Ausetalia, ma o lo’o tumau pea vaoaga ai latou e i ai poto fa’apitoa mo le vaaia o tala o tau, i le ono toe afea ai o le Pasefika i lea afā.
O le ala lea o le toe fagufagu ma le fa’amanatu mai pea a le Ta’ita’ifono o Fa’alavelave Tutupu Fa’afuase’i ma Fa’alavelave Matuiā ia Agafili Tomaimanō Shem Leo i le atunu’u atoa, ina ia alofagia fa’aauau puipuiga masani ma tapenaga e sauniuni ai i so’o se taimi ina ne’i lutia tatou i ni afā mālolosi ma ni lologa tetele e ono a’afia ai fale aemaise o ni soifua ma’imau.
O le fautuaga malosi mai le N.E.O.C. ina ia tautuanā fa’apuna lelei suāvai ma ia taofiofi fanau mai le so’ona feoa’i i nofoaga lolovaia, lopala ma tetele ai tafega ina ne’i a’afia ai i ni siama o ni fa’ama’i ‘ese’ese ma a’afia ai i ni gasegase tugā e ono a’afia ai ma le soifua.
O le mau tau’ave lava a le Mālō mo tagata uma, e sili lava le puipuia i lo le tautogafitia.
O le tatalo a le Komiti o le N.E.O.C. ma le Mālō ia Samoa atoa, ina ia alofagia, fa’atumau pea le ola tatalo ma anapogi o tatou tagata, ina ia fa’atagisia le puipuiga mamana a le Atua mo Samoa aoao ma ona tagata, aemaise o le tete’e atu i fa’ama’i ma ni mala fa’alenatura e ono tutupu fa’afuase’i ma maliliu ai nisi a’o amatalia ai le folauga matagofie o lenei tausaga fou 2022.
