Tusia: Tusiga Taofiga
Malae Va’alele Fa’avāomālō a Samoa i Faleolo
E ui ua maua le tui puipui o le Koviti – 19, ma ua amata fo’i ona fa’aitiitia le pepesi i le lalolagi o lenei fa’ama’i pe’ita’i e le’o maluelue ai lava le Mālō i le toe tatala ai o faigāmalaga masani fa’avāomālō i le va o Samoa ma isi atunu’u i le taimi nei.
E ui i le fa’atauanau mai pea o nai aiga i atunu’u i fafo mo se avanoa e fia malaga mai ai mo tafaoga ma malologa i Samoa nei, peita’i e lauāluga pea i le naunauta’iga o Samoa le puipuia ma le saogālēmū o nai o tatou tagata.
Na fa’atepa e Agafili Tomaimanō Shem Leo, o le Ta’ita’ifono o le N.E.O.C. ia Tusitala ina ua latou fesiligia lea matā’upu, ma avea ai Fiti o se atunu’u tuāoi o Samoa o lo’o i le Pasefika, sa tatala a latou faigāmalaga masani i aso fiafia ua tuana’i atu, ma na o latou patipatia ma le agaga fiafia le ulufale atu o le silia ma le afe turisi mai Ausetalia auā se tupe maua mo le tamāoā’iga o lea Mālō.
Peita’i na tauāluga lea fiafia pu’upu’u ina ua toe pōia Fiti i le vairasi fou o le Koviti – 19 ma ma’imau ai soifua o nisi o le atunu’u aemaise lava i latou e le’i faia tui puipui o le Koviti – 19.
Saunoa Agafili, e fai fo’i o le alofa i nai aiga o lo’o fia tafafao mai, a’o le popole ma manumanu i le soifua ma le ola o nai o tatou tagata o lo’o i Samoa nei.
Na fa’afetaia fo’i e le Fa’atonu Sili Aoao o le Matāgaluega o le Soifua Mālōlōina ia Leausa Samau Dr. Take Naseri, le tapuā’iga ma le tu’umumusu a nai o tatou tinā ma tamā mātutua, ua afua ai ona mamau pea lago o Samoa i le leai o se fa’ama’i o pepesi i o tatou lau’ele’ele.
Saunoa Leausa o lo’o lagonaina pea le fa’autaga ma le moe mai o tatou tuaā mātutua, ina ia alofagia ‘aua ‘aua lava ne’i vave tatalaina ālāva’a mo femalaga’iga fa’avāomālō se’ia mautinoa lelei ua sefe ma ola manuia le lalolagi atoa mai lenei fa’ama’i oti mata’utia.
O le popolega o le Mālō ona o lo’o vaaia pea le fa’atupulā’ia o le alia’e o nisi o siama fou o lea fa’ama’i ma e ono ma’imau ai lava le soifua o nai o tatou tagata.
Mo le taimi nei, e le’o mālōlō fo’i fa’atalanoaga a Samoa ma tatou pa’aga fa’avāomālō mo aiaiga e malupuipuia ai si o tatou atunu’u pe a toe tatala faigāmalaga masani i se taimi lata mai.
