I le fa’agasolo ai o galuega mata’itū ma le puipuiga o i latou e to’a15 ua fa’amaonia ua a’afia i le Koviti-19 aua lava le saogalemu ma le taofiofia o le ono pepesi atu i tua o lenei fa’ama’i i le atunu’u lautele;
O lea e fautuaina ai le mamalu o le atunu’u, ua i ai nei Samoa i le La’asaga 3 o Lapataiaga (Level 3) po’o le lanu mūmū, e amata fa’amamaluina i le ta tonu o le 6pm i le afiafi o le Aso To’ana’i 22 Ianuari 2022.
O vaega nei ua fa’amamafaina ma tapu o lo’o aiaia i le La’asaga 3 o Lapataiga – Level 3:
- Aiaiga o Poloa’iga o Fa’alavelave Fa’afuase’i.
- Nonofo tagata uma i Fale.
- Tapunia uma faigāmalaga fa’avāomālō.
- Mata’itu nofoaga tonu o le atunu’u o le a ono alia’e mai ai le fa’ama’i.
- Tapunia vaega uma o Samoa.
- Taofi fa’atasiga ma potopotoga i ni sauniga pei o faigālotu.
- Tapunia uma ‘Āoga
- Tapunia uma galuega a le Mālō ma Pisinisi Tumā’oti se’i vaganā ai Auaunaga Fa’apitoa ma Auaunaga Tau Fa’alavelave Fa’afuase’i.
- Fa’anofoesea uma le aufaigaluega o lo’o galulue mo le puipuiga o le atunu’u mai lenei fa’ama’i fa’atasi ai le aufaigaluega fesoasoani.
- Leai ni faigāmalaga i le va o Upou ma Savai’i.
O le a tapunia Samoa atoa mo le 48 itula amata atu i le itula e 6pm i le asō, Aso To’ana’i 22 Ianuari 2022 se’ia aulia le afiafi o le Aso Gafua 24 Ianuari 2022 i le ta tonu o le 6pm i le aoauli.
Na’o le aufaigaluega ma ta’avale ua fa’atagaina fa’aletulafono e mafai ona femalagaa’i mo le tu’uina atu o le auaunaga tāua ma fia vave mana’omia mo le tali atu i ni fa’alavelave tutupu fa’afuae’i.
E fa’ailoa atu o le solitulafono le le usita’ia o tu’utu’uga o tapu o le Poloa’iga o Fa’alavelave Tutupu Fa’afuase’i fa’atasi ai ma Tulafono e feso’ota’i ai.
Matou te talosagaina pea le lagolagosua fa’aauau a si o tatou atunu’u atoa fa’apea a outou tatalo leoleoa a’o tatou i ai i lenei vaitaimi faigatā.
Fa’afetai
Agafili Tomaimanō Shem Leo
Ta’ita’ifono – Komiti o Fa’alavelave Tutupu Fa’afuase’i
