E ui o lo’o tapunia le atunu’u atoa ona o puipuiga mai le Koviti – 19 peita’i o lo’o fa’aauau pea galuega fesoasoani a le Pulega o Tineimū ma Fa’alavelave Tutupu Fa’afuase’i e tali atu ai i so’o se gasegase tugā fa’apea ni fa’alavelave tutupu fa’afuase’i e tula’i mai ma feso’ota’i ane i le numera o le 911.
O gasegase uma e mo’omia ai le fesoaosani a le auaunaga e feso’ota’i lava ma le Matāgaluega o le Soifua Mālōlōina mo le fautuaga a’o le’i auina atu ia gasegase mo togafitiga fa’afoma’i.
Talu mai ona tapunia atoa le atunu’u lautele i le 6:00 i le afiafi o le Aso To’ona’i 22 Ianuari 2022, se’ia o’o mai i le taeao nei Aso Gafua 24 Ianuari 2022, e silia ma le 25 gasegase sa ofoina atu ai le fesoasoani a le Pulega o Tineimū e ala i ta’avale auina ai gasegase (ambulance) fa’atasi ai ma le fesoasoani muamua.
E tāua le saogālēmū o le atunu’u atoa, o le fa’amanatu ina ia vave feso’ota’i le Pulega o Tineimu mo se fesoasoani i le numera o le telefoni 911
