TALA LATA MAI O LE PEPESI AI TUA O LE KOVITI – 19 I SAMOA
Ua lipotia mai e le Matāgaluega o le Soifua Mālōlōina le pesia ai o i latou e to’a 128 i le fa’amai o le KOVITI-19 i totonu o lenei 48 itula mai le 2:00 i le aoauli o le Aso 07 Iuni i le 2:00 i le aoauli o le Aso 09 Iuni 2022. E to’a 126 i latou ua a’afia mai tua i le mamalu lautele o le atunu’u ma le to’alua (2) na fa’amauina na faimalaga mai i totonu o Samoa (border). Ua si’itia ai le aofaiga oi latou (community & border cases) ua a’afia i le siama o le Koviti – 19 i le 14,315. E to’avalu (8) i latou o lo’o taofia i le taimi nei i nofoaga fa’apitoa i le Falema’i i Moto’otua.
E saga fautuaina pea le mamalu o le tatou atunu’u ina ia tausisia ma usitā’ia fautuaga fa’alesoifua mālōlōina o lo’o tu’uina atu i taimi uma, e ala i le faia o tali fofoga, tausisia le nofo ma le tutū vāvā mo le lua mita mai le isi tagata, ma ia fa’anofoesea i se nofoaga fa’apitoa o lou fale tau mamao mai lou ‘āiga, pe afai ua masalomia lou a’afia i āuga o le Koviti – 19.
O lo’o fa’aauau pea tuiga i falema’i uma i totonu o Samoa. Manatua o le faia o tui puipui o le Koviti – 19 aua o le puipuiga sili lea mo Samoa atoa, e tete’e atu ai i le ogaoga o āuga o lenei fa’ama’i faigatā. O la tatou galuega fai fa’atasi le puipuia o Oe, o lou ‘āiga, o Samoa atoa ae silisili ai e pele iā te Oe.
AOTELEGA O LE GALUEGA FA’AAUAU A LE MATĀGALUEGA O LE SOIFUA MĀLŌLŌINA MO LE PUIPUIGA O SAMOA MAI LE KOVITI – 19. O lenei lipoti sa tu’ufa’atasia mai le 2:00 i le aoauli o le Aso 07 Iuni 2022 se’ia aulia le Aso 09 Iuni 2022 i le 2:00 i le aoauli. Fa’amatalaga au’ili’ili o le tulaga o lo’o i ai le fa’ama’i i Samoa fa’apea le tuiga o lo’o tu’uina atu i le kalafi o lo’o i lalo. Ae mo nisi fa’amatalaga fa’aopoopo fa’amolemole asiasi i le ‘upega tafa’ilagi a le Matāgaluega o le Soifua Mālōlōina (http://www.health.gov.ws) po’o le valaau o le telefoni numera 6008440.
