Tusia: Tusiga Taofiga
E o’o mai le asō, e leai ma se fa’aseā po’o se talosaga aloāia tusitusia mai pisinisi taxis ma pasi, ua tu’uina atu i le Mālō e ala i le afioga i le Minisitā o Pulega o Fela’uā’iga i le Lau’ele’ele iā ‘Olo Afoa Fiti Va’ai, e tagisia ai se si’itaga o tau o pasese mo taxis ma pasi.
O le tali manino lea a le afioga i le Minisitā, i nisi o manatu fa’aālia sa agina i luga o le ea, i le fesiligia ai o se finagalo o le Mālō ina ia toe iloilo ai le fetu’unā’iga o tau o pasese mo ta’avale lāiti ma pasi.
“E leai ma se talosaga aloāia po’o se fa’aseā ua tu’uina mai i lo’u Ofisa fa’atatau i si’itaga o tau o pasese mo taxis ma pasi. “Na’o tala sala tua lava o lo’o fa’alogoina ma fesili o lo’o aumaia e tusitala, ae leai ma se isi ua aga’i mai lo’u Ofisa ma tu’uina mai aloāia lea matā’upu i luga o la’u laulau.”
Ta’utino ‘Olo, afai e leai se tusi aloāia ua ia taulimaina, e lē tatau fo’i ona talanoaina fua lea matā’upu. O le afioga i le Minisitā sa fai lana pisinisi ta’avale lāiti la’u pasese, na ia fa’ailoa, o le taimi nei ua tofu ta’avale uma ‘āiga Samoa, afai ae manana’o ia pisinisi e si’i le tau o pasese mo femalaga’iga a le atunu’u i taxis ma pasi, o lona uiga, mo le aga’i atu i le lumana’i, o le a leai se isi e toe fia fa’aāogaina ia auaunaga mo femalaga’iga.
O le tu’ualalo ma le fautuaga a le Minisitā mo ia pisinisi, e tāua le taugofie o pasese ae o lo’o ola pea le pisinisi ma solosolo lelei, nai lo le taugatā, leai ni tagata feoa’i ona fa’aletonu ai lea o le tupe maua.
Na momoli fo’i le fa’afetai a le Minisitā i le aufaipisinisi ta’avale la’u pasese lāiti ma pasi mo le galuega fītā o lo’o feagai pea ma i latou mai lea taimi i lea taimi auā se tupe maua mo le tausiga o ‘āiga, tautua o nu’u fa’apea ai ma ekalesia.
