Lau Susuga i le taitai o le sauniga, lau Susuga Pastor Talia Sooalo
Le Aufaigaluega Paia a le Atua.
Lau afioga I le Taitaifono o le Komiti o Fa’atonu ma lau laulau ā fono.
Lua afioga i Tausi Mavaega.
I le paia ma le mamalu o le aufai-iunite ua mafai ona tatou auai fa’atasi i le maota nei, fa’apea i latou o lo’o mā‘ua mai tatou taualumaga o lenei Fonotaga i Salafai, a’e le gata i lea, o atunu’u mamao, o lo’o tauala atu i feso’otaiga fa’aona po nei, i luga o tatou upega tafāilagi.
E manatu o outou paia ma outou mamalu, e amata mai i le tai samasama o le Tuimanua se’ia pa’ia le tai ula’ula o Nafanua o le ā le oo iai so matou leo, aua o oe Samoa o le i’a e iviivia, e lē mafai e se poto, po’o se vave ona au’auina. Tulou!!
E mua i malae sa’u faamatalaga e sula ai le agalelei o le Atua le Mataisau o mea uma, auā o ia na muā’au i le fana’elupe o le la o lenei fesilafaiga, oute talitonu fo’i, o ia foi e muli’au i le fa’asifo o le taulaumea o lenei fonotaga.
Fa’amalo faafetai i lau Susuga Pastor Talia mo le tatou sauniga lotu, ua e momoli lapalapa o malō i lo tatou Tapa’au sili i le lagi, aua lo tatou fa’amoemoe i le asō.
AUTU:
Ou te fa’atalofa ma ofo alofa atu i lenei taeao fou. O le aso lenei, o le aso na lupe, o le aso foi na atofa ma ‘afuafua, e fesilafai ai le Aufai-iunite a le Fa’aputugātupe Teu Fa’afaigaluega o Mavaega Tausi a Samoa (po’o le UTOS i lona Faa-peretania ina), e iloilo totoa ai le lipoti fa’alētausaga 2021 -2022.
E ia te au le agaga fa’agae’etia oute faia le fa’amatalaga autū o lenei fonotaga fa’alētausaga lona 12 a le aufaiiunite a le Fa’aputugātupe Teu-fa’afaigaluega o Mavaega Tausi o Samoa.
O le tausaga fa’ale-tupe 2021 – 2022 o se tausaga o Fetu’utu’unaiga (adaptation) talu suiga ma a’afiaga o le tatou atunuu ma le lalolagi atoa, ona o le fa’amai o le Koviti-19 ma le tele o isi fa’afitauli o lo’o a’afia ai le lalolagi e pei o taua ma fa’alavelave fa’a-lē-natura.
O nei mau fa’afitauli ua tele ona a’afiga; e pei ona a’afia ai le tau o le soifuaga, ua tapunia ai nisi o kamupani ma pisinisi, ua fa’aiti’itia ai avanoa faigaluega masani ma ua utiuti ai avanoa e maua ai seleni a tagata lautele.
O le masina o Novema o le tausaga ua tuanai, na ou fa’alauiloa aloaia ai le tatou tusi o “Fa’amatalaga o Alamanuia” fou, po’o le Prospectus 2022 – 2025 i le Motu tele i Salafai. O lenei tusi e taūa tele; ona e fa’ailoa ai i le mamalu o le atunuu suiga i auaunaga a le tatou ofisa, ma o se tasi o suiga tele, o le faa’iti’itia lea ole aofai o iunite e tatala ai se teugātupe i le UTOS; lea ua paū mai ai le 50 iunite i le 25 iunite. O se tasi nei o suiga na faia e le Kamupani o Pulega a le UTOS e tali atu ai i le si’itia o le tau o le soifuaga ua iai nei, mo le manuia o tatou sui-faiunite.
O le fa’amuamua lava lea a le tatou Malo, o tatou Tagatanu’u!
Ia unaia lava galuega fa’atino a Fa’alapotopotoga Tumaoti a le Malo mo le manuia o a tatou tagata.
E tutusa lava ma le UTOS; o lana anava foi lea, o le teuina fa’afaigaluea o seleni ia toe maua mai ni fa’amanuiga e afua mai i tupe fa’asili ma le si’itia o le tau aogā o Iunite aua le manuia lautele o ana sui-fai-iunite.
O le naunautaiga foi lea o le tatou Malo, ia toe sasa’a atu manuia i o tatou tagata; o se tasi lea o sini autū o le atina’e lea o le tasi (1) le miliona tala mo itumalo. Pei ona silafia ua amata nei ona fa’asafua atu seleni i nisi o itumalo ua mae’a ona fa’amalieina ‘ai’a’iga o atina’e.
Ma ou te fiafia e faailoa atu foi, o teugātupe teufa’afaigaluega i le UTOS, o se tasi lea o atina’e o lo’o fa’atagaina mai e aiaiga mo le fa’aaogaina o le tasi (1) le miliona tala mo itumalo. O se avanoa lelei e fa’afaigaluega ai e le UTOS se vaega o ia seleni mai itumalo ina ia toe fo’i atu le manuia e atina’e ai tatou Aiga, Nu’u ma Ekalesia.
E lē o fa’apito foi le vaai a le Malo i na o tatou tagata o lo’o aumau i Samoa nei. O tatou Aiga o loo tautua mai i atunuu mamao, e ao lava na fa’ailo ma le agaga fa’afetai lo latou sao i le tatou tamaoaiga, e ala lea i seleni o lo’o lafo mai i Samoa nai.
A o lea foi ua tapena e le UTOS avanoa mo tatou tagatanu’u o lo’o aumau ma faigaluega i na atunu’u e teufaigaluega mai ai a latou seleni i Samoa nei.
• Ua maea fa’amautū nei se faiga pa’aga a le UTOS ma le Kamupani mai Niu Sila o le Pacific 40 e fa’aaoga ai le Talofa Voucher e faatau ai iunite mai atunuu mamao.
• O lo’o fa’aauau pea le faiga pa’aga UTOS ma le Vodafone Samoa MTala e teu mai ai seleni e aunoa ma se tau tigaina e toe malaga mai ai i Samoa e fai se teugātupe.
Va’aiga i le Lumanai:
Oute tu’u atu se lu’i i le Komiti o Fa’atonu ma le aufaigaluega ale UTOS, ona oute talitonu, e telē se avanoa e fa’atupulaia ai fa’amanuiaga maua mo le aufaiiunite. O nisi nei o vaega e talitonu le tatou Malō e tatau ona gālulue iai le UTOS, e ono si’itia ai fa’amanuiaga mo tatou aufaiinute, ma fa’asafua atu ai le manuia i le lautele o si o tatou Atunu’u.
• Ia fa’aauau pea ona si’itia le aofai o tatou aufaiiunite, aemaise lava mai Salafai ma nu’u i tua, e ala ni fa’alauiloa ma ni fa’apitoa talafeagai faifai pea.
• Galulue so’o-tauau ma le Matagaluega o Pisinisi, Alamanuia ma Leipa e fa’amalosia le tatalaina o teugātupe mo tatou tagātanu’u ua maua avanoa mo galuega faa-vaitaimi i fafo, ia mafai ai ona teu fa’afaigalauega se vaega o latou totogi, mo se lumana’i o aiga pe ā toe foi mai.
• Ia fa’aauau pea na saili totoa nisi avanoa fou, e teufa’afaigaluega ai tatou vaegātupe, aemaise lava i totonu o Samoa nei.
• Ia fa’aauau pea ona naunautai le UTOS e atia’e oloa ma auaunaga fou e fa’aogaina ai feso’otaiga fa’aneionapo.
Upu Fa’aiu
Ma fa’aiu atu ai se folosaga lenei taeao, oute momoli atu ai lau fa’afetai tele i le paia ma le mamalu o le aufai-iunite mo lō outou talitonuina ma le fa’atuatuaina pea o galuega fa’atino ma auaunaga a le UTOS, lea ua fa’aau’au ai pea ona alu’alu i luma le tautua a le Fa’aputugātupe.
Masalo o se laolao lelei foi lenei, oute fa’ailoa mo le silafia e lo outou mamalu, le toe fetu’unaiga o sui o le Komiti o Fa’atonu ua i ai nei, ina ua maea filifiliga a le Komiti na iloiloina talosaga mo sui o Komiti o Faatonu ma tofia alo’aia ai e le tatou Kapeneta.
Ua tofia nei le Afioga ia Magele Arthur Penn e avea ma Taitaifono e suia ile Afioga ia Afoa Asiata Kolone Va’ai ua loa tausaga o tautua matavela mo le Komiti o Fa’atonu a le UTOS.
O isi sui fou e toatolu, e aofia ai:
• Le Afioga ia Seulupe Michelle Macdonald • Susuga ia Tufeao Fa’atuai Pulepule Fanolua • Ma le Afioga ia Lemalu Patricia Ah Chong – Fruean.
Ma o lo’o fa’aauau pea ona toe saili se sui toatasi e agava’a mo le avanoa e tasi o lo’o totoe mo le tatou Komiti o Fa’atonu.
O tomai ma agava’a o lo’o tauaveina e Fa’atonu fou nei o le Komiti, o le ā fesoasoani tele i le Taitaifono ma le Pulega ale UTOS e fa’atino tiute tauave o le Kamupani o le Pulega ma le Fa’aputugatupe. Ia manuia tele o outou faiva!!!
E avea ai foi lenei avanoa e momoli atu ai se fa’afetai a le tatou Malo, i le Afioga i le Taitaifono ma Fa’atonu sa tauaveina mai tiute tau pulega lelei ma le fa’afoeina mai o le tatou Komiti o Fa’atonu i tausaga ua mavae.
• Le Afioga ia Afoa Asiata Kolone Vaai, sa avea ma Taitaifono o le Komiti o Fa’atonu mo le 13 tausaga, o le matua foi lea o le tatou Fa’aputugātupe ma le Kamupani a le Pulega a le UTOS, sa fa’afailelei mai i lalo o lau taitaiga. Ua fa’amalo tautua, fa’afetai mo lou soifua auauna ia Samoa.
• Le Afioga ia Lauano Lauina Grace, Afioga ia Talaepā Lutuiloa Vaiula Solomona ma le Afioga ia Toleafoa Douglas Creevey, fa’amalo, fa’afetai mo lo outou sao taua i le fa’afoeina ma taimua i Pulega lelei, a o outou avea ai ma Fa’atonu a le Kamupani a le Pulega a le UTOS. Ia fa’amanuia le Atua i lo outou soifua galulue, fa’apea nisi o tofiga ua vala’auina ai outou.
I le Tausi Mavaega, fa’amalo le fa’afoefoe i le fa’ataunu’uina o lenei galuega taua sa oulua fitā-i-tugā ai.
I le tatou Ofisa Sili o Pulega, le pulega, ma le aufaigāluega a le Kamupani o Pulega, o lo’o galulue mo ni fa’amanuiaga mo le aufaiiunite, ua fa’amalo le fai ole faiva ma le tautua matavela ia Samoa.
Ma fa’auma atu ai ma sau fa’amatalaga, oute fa’apea atu ai, ua tatala aloaia nei le fonotaga fa’aletausaga lona sefulumalelua (12) a le au fai-unite, a le Fa’aputugatupe Teu-Fa’afaigaluega o Mavaega Tausi a Samoa.
SOIFUA MA IA MANUIA.
