ASO TOFI 3 AOKUSO 2023
FOLASAGA MUA MA PAIA
O lea ua ifo i le tuasivi faiva o manusisina, ua a’e foi tautai ma le atu na faamanusina auā lo tatou va tapuia ma lo tatou Atua, i le tatou faasagi ma le faapolo e pei ona saunoa iai le Ta’ita’i o le sauniga, Susuga ile Sea, Falefia Tupu. Tau lava ina matou fono fa’apip’ii ma fa’aluaina le agaga fa’afetai i talosaga aemaise le upu folafola. Tau ina ia maua se viiga o le Atua ma tō mai manū aua le asō ma le fa’amoemoe. Maua pea le soifua malolōina i le tino, le mafaufau ma le agaga, ma faatumu mai lagī faautu a le faimea le tofā auā le Atua ma lona finagalo.
E iai le manatu, o le a ta’oto ia faamaene o tailoloto pa’ia ma sa o le tatou nuu, o sā lē avea foi o Maota o Tumua, o le Tupua e Afifio ai Mata’utia ma le To’afa. Afio le Matua (Mo’oui) ma Ma’opu, o le a nu’unu’u atu ia faatini o tausala i le Falelua ma le Taupoloalii faapea le mamalu i le Alataua, latou te fa’afaileleina.
TALA O LE GALUEGA
O le auala fou lenei / ua ma’ea ona fausia i lona tulaga mautū e aofia ai ma alavai e puipuia ai lenei auala. O lenei foi auala ua fesoasoani mai ai lo tatou malo, I nisi o atinae a le tatou nuu. Talitonu le taofi, o le a tele se sao o lenei auala / Ini fuafuaga mamao ile aga’I I luma aua se manuia o alo ma fanau lalovaoa ile lumanai.
O le tatalo ma le faamoemoega a lo tatou Malo, e umi ona lelei lenei auala pe ‘afai e tatou te galulue faatasi i le tausiga ma le vaaia lelei o lenei atinae, ina ia fa’aaoga tatauina tupe a le tatou Malo. …
O lenei galuega sa fausia ma mulimulitai’a i luga o aiaiga ma faiga faavae o galuega faatino o auala tetele a le Malo.
Sa faatauofoina faalauaitele lenei galuega, ma maua ai ele kamupani a le Handymen Constructions I le tau e $442,908.13 ina ua faamalieina uma vaega sa tuuina mai I le tauofoga.
O le auala ua mae’a fausia e:-
- 465 mita le umi o le galuega ma sa vali taina
- 4 mita le lautele ua vali taina faatasi ai ma le fausiaina o alavai.
Faamoemoe o le a tumau pea le matagofie o lenei galuega, ma ia
Avea o se atiina’e aua le manuia o lenei afioaga, faapea le tatou Malo.
UPU FAAMALO
Ou te momoli atu le faamalo ma le faafetai i la outou pule faamalumalu a o faagasolo nei galuega.
Faafetai foi i le Konekarate a le Handymen constructions mo le faatinoina o nei galuega i aiaiga na faatauofo ai.
E momoli foi le Faafetai i le Pulega o Felauaiga i le Laueleele mo lo outou galuega faatino ua mafai ai ona tino mai le finagalo o le tatou Malo.
Ia auomanū lenei aso i le alofa faasoa mai o le Atua mo tatou ma si o tatou atunuu atoa.
Ia soifua ma ia manuia.
