Aso: Gafua, 04 Novema, 2023
Taimi: 9.00 i le taeao
Nofoaga: Maota o le Tooā Salamasina, Sogi
Laugaina: Hon. Mulipola Anarosa Ale – Molio’o, Minisita o le Matagaluega o Tinā ma Tamaitai, Atinae o Afioaga ma Agafeso’ota’i
_____________________________________________________________________________________
Lau susuga i le taitai o le Sauniga – Rev. Nuuausala Siaosi Siutaia;
Minisita o le Kapeneta;
Sui o Malo mai Fafo;
Sui o Paaga Galulue – Faauluuluga ma Sui o Matagaluega ma Faalapotopotoga a le Malo, faapea Faauluuluga ma Sui o Faalapotopotoga Tumaoti;
Sui o Afioaga;
Samoa ua potopoto;
Ua savini faapuna o manu lagona o lenei taeao i le paia maualuga ua faatasi mai. E tu ae lili’a aua o paia ua atoa i lenei taeao, e lē popo i se faamatalaga. Ou te faatulou i le pa’ia maualuga o lenei aofia, o paia faa le talalelei, paia faa le Malo ma paia faa le Aganuu. O paia ua mae’a ona tu’ulaupua ma mamanu fa’a titi e o tatou tua’a ua lagomau mai i tia sa, ma e leai se ma’ema’e e gafataulinaina ona autalatala. E ui ai i se nanau ma se momo’o faalupe o naumati e o’o i itu tetele ma itu taulagi, ae manatu, o le a ta’alolo, aua o paia lava mai le vavau, e tumau e o’o i le faavavau, ua taoto a’o se alao’o. Nu’unu’u atu ia faatini o tausala, ae sei o’u liliu ane e fai se upu e avea ma leo o le Malo e tusa o le faamoemoe o lenei taeao.
O le faamoemoe o le asō, o le Faamanatuina o le Aso Fa’a va o Malo mo i latou e iai aafiaga tumau o le soifua.
O le tausaga e 2016, na sainia ai e le Malo o Samoa le feagaiga faa va o malo mo le amanaiaina o aia tatau a i latou e iai aafiaga tumau o le soifua.
Talu mai ona sainia e le Malō lenei feagaiga, e tele taumafaiga ua faatino mo le unaia ma le amanaiaina o aia tatau a i latou e iai aafiaga tumau o le soifua, e aofia ai le fausiaina o taiala ma faiga faavae talafeagai, faapea le tele o polokalame faapa’aga a le Malo ma Faalapotopotoga Tumaoti mo le faatinoina o galuega eseese mo le manuia o i latou e iai aafiaga tumau.
O nisi o tapenaga tetele a le Malo mo le manuia o i latou e iai aafiaga tumau o le soifua, e aofia ai ma le fausia o le Faiga Faavae mo i latou e iai Aafiaga Tumau (National Disability Policy), o le tulafono faatonutonu mo le fausia o fale (National Building Code), o aoaoga sauo’o (inclusive education), o le faaleleia o auaunaga faa le soifua Maloloina, faatasi ma le tele o nisi, aemaise le penefiti selau tala ua faasafua atu mo le tausiga o i latou e iai aafiaga tumau o le soifua i masina taitasi.
I lena faamaite a le Malo, e o’o mai i le taimi nei, ua lata i le 3000 le faitau aofai o nai o tatou tagata ua mafai ona faamanuiaina ai.
O le vaaiga taula’i (vision) a le Taiala mo Atinae o Samoa (Pathway for the Development of Samoa), ua faaupuina o le Tausia o le nofo fealofani, saogalemu ma le saolotoga o tagata uma – “Fostering social harmony, safety, and freedom for all”. O lenei vaaiga taula’I, e atagia ai le moomiaga ina soifua manuia ma maua avanoa tutusa o tagata uma i so’o se auaunaga ma so’o se faamanuiaga, ma ia le tuulafoaina se tasi, tusa lava poo le a le itūpā, o le matua o le soifua, iai pe leai foi se aafiaga tumau. I le taiala autu numera muamua o lenei Taiala, o lo’o faamamafa ai le Faaleleia o le Atinaega o le Soifuaga Lautele, ma o lea taiala autu, o lo’o manino ai le una’i a le Malo ina ia mautū auaunaga ma tapenaga, mo le manuia lautele e aofia ai ma le itu tau i le aoaoga, o le soifua maloloina, o le soifuaga saogalemu, faapea le maua o agavaa eseese e fa’aa’upegaina ai tagata uma e tusa o o latou malosiaga ma vaega e fiafia iai.
O faamaumauga mai i le suesuega o Fale ma Tamaoaiga sa faatautaia e le Ofisa o Fuainumera Faamauina i le tausaga e 2021, o lo’o faamauina ai, e lata i le 3% o le faitauaofa’i o i latou e 5 tausaga ma luga atu o le tatou atunuu, o i latou ia e iai o latou aafiaga tumau. E tusa lena o le lata i le 5000 tagata, e le o aofia ai i latou i lalo ifo o le 5 tausaga le matutua.
O tagata e iai aafiaga tumau o le soifua, e iai o latou faasinomaga, o alo ma fanau e faasino i o tatou aiga, o tamalii ma failauga e au i measina a o tatou aiga, o tinā ma tamaitai e au ai gafa o aiga ma alalafaga. E lē o ni fua i mamao, ao tama a le eleele.
E iai o latou aia tatau faa tagata soifua, ma e agavaa i so’o se avanoa ma so’o se faamanuiaga faa tagata a nuu o se atunuu.
O le autū o le Aso Faa va o Malo o lenei tausaga. o lo’o faamamafa le Tūtū Faatasi ina ia ausia manulauti gafataulimaina a Malo Aufaatasi mo i latou e iai aafiaga tumau o le soifua. Ua o gatasi ma le manulauti faamamafa o le Polokalame o le 16 Aso e Tetee atu ai i Sauaga, ma o se vaega taua lea i tausaga uma, le faamanatuina o lenei aso faapitoa i totonu o le vaitau o le 16 Aso e matuā unaia ai foi le taua o le puipuiga o le saogalemu o i latou e iai aafiaga tumau o le Soifua, mai so o se ituaiga sauaga.
O le polokalame o lenei aso, o le a maua ai le avanoa e faasoa ai a tatou Paaga i auaunaga eseese o lo’o o latou ofoina atu mo i latou e iai aafiaga tumau, mo le silafia e sui o afioaga faapea i tatou uma.
E faaogaina ai lenei itula e faaleo ai se faafetai faapitoa i le Malo o Ausetalia mo le lagolagoina o lenei faamoemoe, faapea le tele o isi galuega faatino a le Lala Maoti mo le Atinae o Afioaga, e tauala mai i le Poloketi o le Samoa Disability Partnership Project.
E le gata i lea, e fia faailo foi le faafetai i paaga ma faalapotopotoga uma o lo’o galulue so’oso’o tauau ma lo tatou Malo tauala atu i le Matagaluega o Tina ma Tamaitai, Atinae o Afioaga ma Agafesootai, i galuega mo le manuia ma le amanaia, o aia tatau a i latou e iai aafiaga tumau o le soifua.
I lenei taimi, ou te fiafia e faapea atu, ua tatala aloaia nei le Aso Faa va o Malo mo i latou e iai Aafiaga Tumau o le Soifua mo le tausaga, 2023.
Ia manuia tele le faamoemoe o lenei aso
Soifua ma ia Manuia
