Lau Susuga i le Taitai o le Sauniga – Rev Fepai Kolia
Afio lau Afioga le Tamaitai Palemia – Fiame Naomi Mata’afa ma
Afifio Afioga i Amepasa o Mālo esese i Samoa
Afifio Afioga i Fa’auluuluga o Matagaluega eseese a le Malo
Le Mamalu i le au valaaulia fa’apea Tupu ma e’e o Samoa ua tatou mafuta i lenei taeao fou.
O ō outou sā ma faigā, ō outou paia fa’aletalalelei, mamalu
fa’alēmalo, mamalu fa’alēaganu’u o le a le oo iai se faamatalaga.
Tulou! Tulou lava! Auā o sā ma faiga mai le vavau e oo i le fa’avavau.
Ae ua tatou potopoto i lenei taeao, e faafeiloa’i aloaia ai le taunuu mai ai o le Va’a a Leoleo mo le Gataifale, le “NAFANUA III”. O le faamoemoe i le asō o se la’asaga maoa’e tele aua le fa’atumauina o puipuiga o le gataifale o Samoa ae le gata i lea o se faailoga lea o le tuumai pea o le lagolago fa’aauau a le Malo o Ausetalia ina ia siitia auala o puipuiga i totonu o le Itulagi a le Pasefika. O le tauaaoina mai o lenei Va’a o le saga fa’amalosia ai pea lea o faigapaaga i le va o le Malo o Ausetalia ma le Malo o Samoa e pei ona iai le ‘Boe Declaration’. Ua autausagā galuega fesoasoani a le Malo o Ausetalia mo le malu puipuia o le gataifale o Samoa pe a fua i le 40 tausaga ua tuanai. Na amata aloaia faigapaaga faa-le-malo ma le Malo o Ausetalia i le tausaga e 1971, i le tuanai ai lea o le 9 tausaga talu ona avea Samoa ma atunuu muamua o le Pasefika ua tutoatasi mai pulega a Niu Sila.
E talitonu o le gataifale ma ogasami o le tasi ia o punaoa fa’a-le-natura o lo’o iai le tele o manuia ma avanoa mo so’o se atunuu e le gata i le itu tau i le tamaoaiga i lona aoaotetele ae fa’apea foi mo le lelei lautele o ona tagata nuu. E lē nā ma le lāina luitau ua aliae ma ua māaleale ai le gataifale ma ogasami ona o a’afiaga o suiga o le tau, fāgotaina fa’asolitulafono, aemaise o le feavea’iina faasolitulafono o tagata ma fualaau faasāina, ma isi ituaiga o gaioiga le ma’alofia e ono uia ma fa’aaogaina ai o tatou gataifale. O itu nei ua matua taua tele ai le sauniga e pei ona o tatou molimauina i le asō.
O le ave o le faataua i puipuiga o le gataifale o le a fesoasoani tele lea mo le saogalemu o le itu tau i fefa’atauaiga faava-o-malo faapea le malu puipuia o le siosiomaga o le sami faapea i’a ma figota mai le faatamaiaina.
O lenei foai e pei ona iai le Va’a o le NAFANUA III o le a matuā aoga tele mo le vaaia ma le mata’ituina o agasami fa’ava-o-malo. O lenei Va’a ua mae’a ona faatotogaina i ni masini tekonolosi faaonaponei ina ia siitia tulaga o auaunaga a Leoleo o Samoa e tali atu ai i soo se ituaiga mataupu e ono avea ma tulaga taufa’amata’u i le gataifale ae le gata i lea o galuega mo le laveaina o le soifua ma le ola o tagata faapea ma matafaioi tauave i taimi o faalavelave faa-le-natura.
Ina ua aafia le Va’a o le NAFANUA II, sa matua aafia tulaga tau i puipuiga mo le gataifale o Samoa ma ua avea lea ma fa’amanatu ina ia mataala i le vaaiga ma le tausiaina lelei o nei meatotino aoga faapea le aloaia o aoaoga ma le usitaia o taiala ma alafua ua mae’a faataatitia mo le lelei ma le saogalemu o auaunaga tau i le gataifale. Ua avea foi lea faafitauli ma avanoa e toe iloilo ai e le Malo mea sa faaletonu ai le faatinoga o galuega ma toe tapena taiala aua le puipuia o le toe ono tulai mai o ia ituaiga faalavelave i le lumanai.
E talitonu o le galulue faatasi e mafai ai ona faailoa luitau uma tau i puipuiga o le gataifale ma e moomia tele e Samoa le galulue faatasi ma le Malo o Ausetalia e ala i le fa’afesoaai o meafaigaluega, o faamatalaga faatasi ai ma le agaga o le galulue soosoo tauau.
E avea ai ma sui o le Malo ma tagatanuu uma o Samoa e momoli atu ai le Faafetai tele i le Malo ma tagatanuu uma o Ausetalia mo le foai e pei ona iai le Va’a lona tolu lenei mo Samoa. O lau tatalo ia saga faatumauina ma faaauau pea faigapaaga i le va o le Malo o Samoa ma le Malo o Ausetalia nei, ma le lumanai.
O le toe iai o se Va’a mo le puipuiga o le gataifale o Samoa o se mitamitaga tele lea i le Malo ma tagata uma o Samoa. Ia avea lenei Va’a ma fa’ailoga ole galulue faatasi ma le taua o le vaaia ma le tausia lelei o le gataifale aua auagatupulaga fai a’e ma le manuia lautele.
Faamanuia le Atua i le Malo o Ausetalia,
Faamanuia le Atua ia Samoa faapea malo valaaulia ua potopoto i le asō.
SOIFUA MA IA MANUIA.
