Aso Gafua, 11 Mati 2024 – 8.30am – Taumeasina Island Resort
O le a lē tau faamapu’epu’eina auma atiloloa o le vasa pe tau faafuluina le pa’ia ua potopoto i lenei taeao.
-Ua te’a foi I le lagī le fetu ta’i matagi e ala i la tatou fa’afetai i le Atua na alausu i ai le susuga i le fai lotu se’i nonō mai ni manū mo lenei aso tāua. Fa’afetai mo le fe’au folafola. Fa’afetai foi i le tapuaiga a le aofia nei.
Tau ia ina ou uia ala o i’a sa ma ou faatulou i le pa’ia ua aofaga potopoto mai i lenei aso. Susuga i puleaoga faiaoga, o Aoga Tulagalua ma Kolisi a le tatou Malo faapea Aoga Tuma’oti ma Aoga a le Ekalesia. Nu’unu’u ia faatini o le tamaitai o outou sa ma Faiga.
O le fa’amoemoe o lenei aso o se galuega so’oso’o tau’au a le Matagaluega o Aoga ma Aganuu ma le Matagaluega o Tinā ma Tamaitai, Atina’e o Afioaga ma Agafesootai.
Ua loa ona silafia le manulauti a le Matagaluega o Aoga ma Aganuu. O lana anavatau o le faafoeina o a’oa’oga ‘ānoa e laugatasia uma ai fanau ma ia maua uma e latou faamanuiaga e aunoa ma se faapito o mānū i se to’atasi.
O le taumafaiga la a le tatou Mālō ina taunuu nei faamoemoega ua tuufaatasia ai matagaluega nei e lua e faatini a tatou manulauti ma anavatai pei ona moemiti i ai. A o le agaga faafetai ona o le lagolago a le mālō o Ausetalia e ala i le polokalame o le Tautua ua mafai ai ona faatino lenei faamoemoe.
Mo le silafia, o le toatele o alo ma fanau e iai aafiaga tumau o le Soifua i tua i nuu ma Afioaga e le’o maua avanoa e a’oa’oina ai. O le mafuaaga lena o le faia o lenei polokalame mo le atunuu lautele. Ua ‘āmatamea tatou faiaoga ona o lo’o lagona pea le leo ‘uti’uti o alagā’oa e lagolago ai le a’oa’oina o nai fanau nei. O le manatu e leai lava se isi e sili ona lelei lana faalogo i matua o ‘auala ese’ese e fesoasoani ai i nai fanau nei nai lo a outou susuga. O la outou faasoa i nai matua e nofo ilo ai foi i latou i auala ma avanoa o lo’o maua e lagolago ai i nai fanau o iai aafiaga tumau o le soifua.
O le tāua foi o lenei faalauiloa mo tatou Faiaoga ma Puleaoga, ina ia lava le silafia i auaunaga eseese mo A’oa’oga Sauo’o (Inclusive Education Services) e fesoasoani ina ia auai atoatoa le fanau i a’oa’oga tusa lava po o le a lo lotou tulaga. Ia manatua, o fanau uma e iai le aia tatau e auai ai i Aoga i totonu lava o ō latou nuu ma itumalo. O le vaega lena o la tatou anavatau o loo uunai malosi e le Matagaluega o Aoga ma Aganuu aua le amanaiaina i tagata uma.
O le agaga maualuga ia silfia e le mamalu o le atunuu tusa lava po o le a la tatou matāfaioi a ia malamalama o loo iai auaunaga e mafai ona fesoasoani ai i nai fanau o loo iai aafiaga tumau. E le gata foi i lena a o fanau o lo’o iai faafitauli mo le ola a’oa’oina. O nei auaunaga e mafai ona oo atu I afioaga ma aiga pe a fai e faailoa mai.
Avea lenei avanoa e o’oo’o atu ai le feau i o tatou tagata ina ia amanaia fanau uma. Ia tutusa le va’ai i fanau e malolosi ma fanau e iai a’afiaga tumau o le soifua.
Tau ina ia alofa mai le Atua, ia au o manū lo outou feagai ai ma le faiva , o le a’oa’o atu o lenei mataupu mā’ale’ale, e lē gata i totonu o ā’oga, ae fa’apea fo’i i totonu o afioaga. Ia maua e nai o tatou tagata, se Samoa atamai ma ola fiafia ona tagata i le lumanai.
Ua tatala aloaia foi ma le tatou polokalame o lenei vaiaso.
SOIFUA.
