11 Mati 2024 – Iunivesite Aoao o Samoa
Komesina Sili o le Malo o Ausetalia, William Robinson
Taitaifono ma Sui o le Komisi o Galuega a le Malo
Tapaau o le Iunivesite Aoao o Samoa
Faauluuluga o Matagaluega ma Faalapotopotoga a le Malo
Sui Mamalu o Pisinisi ma Faalapotopotoga Tumaoti
Talofa ma le Laufofoga Fiafia.
E faatalofa ma faatulou atu i le paia maualuga o lenei aso. Malo le folau manuia. O le agaga o le fiafia ma le faafetai ua mafai ona tatou faatasi i lenei itula o le asō mo le patipatia ma faalauiloa aloaia le faataunuuina o lenei polokalame tāua mo siitia o tomai ma agavaa faa-Ta’ita’i mo Ofisa Sili ma Faauluuluga o Matagaluega ma Faalapotopotoga e lē gata i auaunaga a le Malo ae faapea Faalapotopotoga ma Pisinisi Tumaoti.
O tulaga faa-Ta’ita’i o se tasi o vaega e aupito sili ona tāua i le atinae ma le lumanai manuia o soo se Malo ma se atunuu. O le atinae foi o tomai ma agavaa faa-Ta’ita’i ma Pulega o se tasi lea o poutu o loo ave iai le faamamafa a le tatou Komisi o Galuega a le Malo i le tuliloaina o Sini autu a le Malo e pei ona faatulaga mai i le Taiala mo le Lumanai Manuia o Samoa poo le Pathway for the Development of Samoa.
O le naunautaiga ina ia mautu tomai ma agavaa o Faauluuluga i pulega lelei ma pulega manino aemaise o le ta’imua i le una’ia o amioga ma uiga taualoa, e moomia mo le tuuina atu o auaunaga lelei mo le ausia o sini autu ma faamoemoega.
O le tausaga muamua lenei ua faatino ai lenei polokalame e pei ona sa amatalia i le masina o Fepuari. E 50 sui auai ua mafai ona lagolagoina mo lenei polokalame ma sa filifilia mai i Matagaluega ma Faalapotopotoga a le Malo faapea avanoa e 10 sa tuuina atu i sui o Pisinisi ma Faalapotopotoga Tumaoti. O le tau aofa’i o lenei fesoasoani e $120,000 Tala Samoa.
Mo sui auai o lenei Polokalame, ia sagai ane ai o le tai i lo tou alofaiva ia maua se ‘ai o lenei polokalame aua se manuia mo Samoa nei ma a taeao. E le faigofie manaoga o tofiga faa-Ta’ita’i ae e iai le faamoemoe o le a tele se aogā ma le tāua o lenei polokalame mo le saga faamausalī o tomai ma agavaa e le gata mo outou o loo avea ma Ta’ita’i i le taimi nei ae faapea foi sui o loo tapena mo tofiga faa-Ta’ita’i i le lumanai.
E momoli le agaga o le faafetai i le Malo o Ausetalia mo le faaauau pea o polokalame fesoasoani e auala mai i le poloketi a le Tautai ua maua ai avanoa faapenei e fesoasoani i le atinae ma le siitia o tomai ma agavaa o tagata faigaluega i itutino ‘ese’ese o le tatou Malo ma le atunuu.
Faafetai foi i le Faauluuluga ma le Pulega a le tatou Iunivesite mo le
faatinoina o nei polokalame faaleaoaoga faaauau mo le saga siitia ma le atinae o tomai ma agavaa o tatou tagata faigaluega.
Ia manuia polokalame faaauau a le tatou Komisi o Galuega. Ia
faamanuia foi le Atua i le alofaiva o sui auai o lenei polokalame.
Soifua ma ia Manuia.
