25 Mati 2024
E faaleoina le agaga faafetai mo talosaga e sulaina ai le alofa o le Atua ma talosia ai faiva ma galuega o lenei aso ma le fa’amoemoe. Ia tumau pea I le Alii lona viiga, ia maua pea le tofa paia i lau Susuga aua lou valaauina.
Manatu o le a lelepa ia fa’a va’a tiu o ‘a’au loloa pa’ia sautuafafafa o
Samoa, ma ona tuaoi. I le amata mai i le oneone le ufitia i le Matasaua o le Tuimanu’a, se’ia pa’ia le maota o le tamaita’i o Nafanua .Ae ou te le’i taiaina la ao o maugaloa ma tatala le ta’afi tualua, lea na ifo ai le aso o le ‘āiga sa Sa’umani. Ae muamua lava ona ou fa’atulou atu i le pa’ia ma le mamalu lea ua sasao nei.
I paia faalemalo aua le afio mai o le Minisita o Tupe lau Afioga
Lautimuia Uelese Vaai, afifio Afioga i Faipule o le palemene poo
Taitaifono o Fono Faavae o Itumalo ua lautogia I lenei aso.
E faatalofa atu foi i paia faaleaganuu, aua le afifio mai o Afioga Sui
taitaifono , failautusi ma le komiti mamalu o fono Faavae a Itumalo ua tatou mafuta nei taeao. Ae matua lava le tuu i le Atua ma lana talalelei auā o lea ua tatou fesilafa’i i le mauga o ao ae le o le mauga o liulaumea i le soifua maua ma le lagi e mama.
E faatalofa foi i faauluuluga o Matagaluega na lua ma le aufaigaluega a le malo o lo’o taulamua i le tauavameaina o lenei poloketi.
O le aso o lea ua sausau fialele nei le manu na moe afusia, ina ua tini lau o le faamoemoe sa lavasi i le ao ma le po. Le faamoemoe sa tulimatai i ai le tele o Itumalo, ae o lea ua tinitauao i lenei taeao. Ua mavae atuvasa o le miliona muamua ,sa feagai ai ia le mamalu o Fono Faavae i le faatinoina o Poloketi o Atinae o Itumalo. I le maea ai o le iloiloga o Ripoti a Suetusi sa tuuina mai ma faamaonia e le Komiti Faafoe, ua agavaa ma aloaia ai Itumalo nei e 5 mo le saini ina o maliega tau tupe (Funding Agreement) o le Miliona lona lua ma faamatuuina o vaega tupe 1 miliona tala mo Itumalo taitasi i vaega tupe faaletausaga FY2023-2024.
1. Vaa o Fonoti
2. Salega 2
3. Sagaga 2
4. Safata 2
5. Lefaga & Faleaseela
O le taeao nei, o leã sainia aloaia ai maliega tau tupe (Funding
Agreement) o Poloketi o Atinae o Itumalo ua lautogia mo le Miliona lona lua(FY 2023-2024).
E momoli atu ai le agaga faafetai ma le faamalo i Afioga Taitaifono, Sui Taitaifono ma le mamalu o Komiti Fono Faavae i lo outou onosai ma le faapalepale. O le upu moni, e tele luitau ma faafitauli sa tatou ui mai ai Ie miliona muamua, ae ua tele foi lesona taua ua aoaoina mai ai ma toe atimati ai le upega mo le tatou savaliga o lea amata nei. O le matou tatalo, sagai ane ai o le tai i Taitaifono ma le Komiti aua le lufilufi lima lelei o nei faamanuiaga ina ia oo uma i tagata taitoatasi o le Itumalo ae aua nei faapito manu ia tasi. Ia aua nei vale tuu lima lenei faamanuiaga, ae ia avea ma faamanuiaga ma vai puna e punafanau mai ai manuia mo le Itumalo. Ia aoga luitau sa feagai ai, e fai ma fetu faatonu folau ma taitai tama I le savaliga.
E ao foi ona nofo silafia e lo outou mamalu le fagaioina o lenei
faamoemoe. O le maea o le saini ina o maliega I le taeao nei, ona
tapena lea e Matagaluega o Tina ma Tamaitai , Atinae o Afioaga ma
Agafesootai vaega uma e manomia mo le tuuina atu I le Matagaluega o Tupe mo le faamatuuina o vaega tupe muamua e $150,000 I totonu o tusi tupe a Itumalo mo le faagaioiina o Ofisa Fono Faavae. Ae o le tuualalo, ia maua pea le onosai ma lava papale ao feagai ai ia matagaluega mo le faatinoina o le tuuina atu o vaega tupe.
Ae o vaega tupe e $840,000 mo le faatinoina o atinae o Itumalo, e ao ona toe faamanatu atu mo le silafia ia aiaiga mo le faamatuuina o nei vaega tupe.
1. Vave tuuina mai I le PMU ia taiala o atinae faaletausaga ma le
paketi (Annual Plan & Budget) mo le iloiloga a le Komiti Galulue ma le faamaoniga a le Komiti Faafoe (Due February)
2. Faatino le faatalatalanoaga (One on One Consultation) i le va o le
Komiti Galulue ma le Komiti Fono Faavae mo le faamaninoga o
Poloketi ua ave ai le faamuamua a le Itumalo. (March)
3. Faamatuuina vaega tupe $420,000 (1 st Tranche) (March)
4. Tuuina mai ripoti o le faaogaina o vaega tupe muamua (Acquittals report) (June 24)
5. Faatino le faatalatalanoaga (One on One Consultation) mo le
faamaninoga o poloketi o lea faaoga ai vaega tupe mulimuli
$420,000 (2 nd tranche) June 24
6. Faamatuuina vaega tupe mulimuli $420,000 ( 2 nd tranche)June 24
7. Tuuina mai ripoti o le faaogaina o vaega tupe mulimuli (acquittal
report) ma le ripoti a le suetusi (1 milion full audit report) September 24
8. Faamaonia e le Komiti Faafoe ripoti suetusi (audit report), ma
agavaa ai Ioa Itumalo mo le Miliona lona 3.
E le o po le silafia i le tulaga o le tuai o le faagasoloina o lenei poloketi, ae o le matou tuualalo, tatou galulue faatasi ma tausoa le tatou galuega. O le faatuatuaga ua tuuina atu ia outou Afioga Taitaifono ma le Komiti Fono Faavae, ae ia maua pea le onosai ma le lototetele. O loo tatou malaga faatasi ma le Atua , e manuia ai faiva ma faamoemoega.
Ia agalelei le Atua I lenei aso ma faamoemoega , se taimi tuuama le fua ma tatala le filialii, ia agalelei le Atua. Maua le tofa I lau Afioga Minisita aua ou faiva ma le valaauina. Maua foi le tofa I Afioga I Taitaifono ma le Komiti Fono Faavae aua le tautuaina o tatou Itumalo. Maua le malosi ma le onosai i Matagaluega a le malo aua lo outou valaauina
Soifua ma ia Manuia.
Ata ma le Saunoaga Tapenaina – Ministry of Women, Community & Social Development
