Faafeiloa’i:
(Ua mae’a paepae e le Fofoga o le Aso paia o le au valaaulia)
- Lau Susuga i le ta’ita’i o le Sauniga, lau Susuga Komisi Samuelu, EFKS Fugalei Sisifo
- Afifio Afioga i Minisita o le Kapeneta
- Afifio Faauluuluga o Pisinisi Tumaoti, o Matagaluega ma Faalapotopotoga
- Afioga i le Sui Ta’ita’ifono ma le Komiti Faatonu a le ACC
- Le mamalu o le au valaaulia faapea le mamalu o Samoa ua potopoto
Faafetai i le Ta’ita’i o le Sauniga:
Ua mae’a lafo le upega o le Tala Lelei, ma ua sasa’a i uta le fāgotāga a le Manusina, e ala i le upu folafola ma le tatalo faamanuia a le Susuga i le Faafeagaiga mo lenei poloketi ua mae’a. Tau ia, ia togi-pa-tau-ile-‘ave i le faafofoga se upu e ta’imua ai le folauga a i latou ua maua avanoa mo fefaatauaiga aua se manuia o Samoa, ae ia foa’i e le Atua le mau i lau Susuga Komisi Samuelu.
Ae o le a fagatonu le malama i le faamoemoe ma le autu o lenei aso.
“O le tatala aloaiaina o faleoloa e 13” i le tatou Maketi i Fugalei.
O le agaga o lo tatou Malo, ia faatamāoāigaina o tatou tagata e ala i le faatupulaia o avanoa mo atina’e eseese. Ua fausia ai nei avanoa e 13 e maua ai avanoa o o tatou tagata e faatautaia pisinisi aua le siitia o atina’e o le tamaoaiga o tatou aiga, nuu, ekalesia aemaise si o tatou atunuu.
Talaaga o le galuega:
Sa taliaina e le Komiti Faatonu ia Fepuari 2023 le suia o le Green House sa iai i le nofoaga lenei, aga’i i faleoloa mo fua o faatoaga ma faaeleeleaga. Sa faasalalauina le ata sa tusia e le Susuga i le tusi ata ia Allen Sione, ma manumalo ai le kamupani o le T & T Construction. O le aso 21 o Aokuso 2023 na amatalia ai lenei galuega. O le faafitauli sa faailoa mai e le kamuta, o le fesiita’iga o tau o oloa fau fale sa tau faatuai ai le galuega.
O le tau aofa’i o lenei galuega:
O le tusi ata ia Allen Sione sa ia vaaia foi le galuega i lona tau e $18,000.00.
O le kamupani a le T & T Construction sa o latou fausia i le tau e $187,800.00 ma o le Tau aofa’i e $ 205,800.00
Peita’i, sa toe suia le faamoemoe o nei fale mai le faatau ai o fua o faatoaga ma faaeleeleaga; agai faleoloa e faatau ai isi oloa e ese mai faatoaga. Sa toe faaopoopo ai le tau e $93,900 ina ia malosi ma mausali le fale aua pisinisi eseese o le a latou faaaogaina, e pei ona iai le faamoemoe o le asō.
Faafetai & Faamanuia:
E momoli ai le agaga o le faafetai tele i lau Susuga i le matua o faiva, lau Susuga Vainalepa Armaur Tuli Taogaga o le T & T Construction ma lau au faigaluega mo lenei galuega. O lea ua tini pa’o le uto, o lele ua tu le failā, ua mae’a le galuega sa feagai ai mo le fitu masina. Malo le galulue, malo le onosai i faafitauli.
Lau Susuga i le Architecture, Allen Sione; o le tusi ata ma lē sa vaaia le galuega, e talitonu ua ese lagona pe a silasila atu ua tino mai se ata sa tusia i mafaufauga ma luga o laupepa. Faafetai mo le ata o lenei galuega.
O le ‘auga lava o lenei aso, o le tatala aloa‘ia o lenei maota ua faapitoa mo le faatauina atu o oloa eseese. Faafetai tele i le Ta’ita’ifono ma le Komiti Faatonu, le Tama’ita’i Pule ma le Pulega ma le aufaigaluega a le Faalapotopotoga o Taui mo Faalavelave Faafuase’i, ona o le avanoa ua maua e le mamalu o le tatou atunuu o loo fia maua se nofoaga e faatautaia ai ni pisinisi faapenei, aua le faatupula’ia o le atina’e o le tamaoaiga.
A tele ni avanoa faapenei, e tele foi tagata ua faafaigaluega ma maua ai le silafia ma le iloa e fa’atautai ai pisinisi ma fa’amaite i nisi atina’e.
Mo i latou e 13 ua maua avanoa i lenei nofoaga. Ia faamanuia le Atua i o tou faiva alofilima. Ia saga tulu’i atu e le Atua lona tomai ia te outou e saunia ai oloa lelei, anagatā ae taugofie; aua le mamalu o lo tatou atunuu, faapea tagata tafafao mai fafo.
Ia manuia tele outou uma i le alofa ma le agalelei o le Atua.
Soifua.
