EFKS MATAUTU-UTA (ASO TOONAI, 27 IULAI 2024 – 10:00AM)
Ou te fa’atulou atu i le pa’ia maualuga o lenei sauniga;
I le Susū o lau Susuga i le Ta’ita’i o le Sauniga;
Fa’apea le nofo a Fa’afeagaiga ua o tatou mafuta fa’atasi;
Afifio o Minisita o le Kapeneta, vae-atu le pa’ia o le Malo Tuto’atasi o Samoa i
le tapua’iga a le Ao Mamalu o le Malo, Le Sui o le Fono a Sui Tofia,
Fa’apea le tafatolu o le Malo o Samoa.
E lē vaea le fala’o’oto i le paia maualuga o aiga, o paolo, o itu tetele ma itu
taulagi o le Afioga iā Solialofi Tua’imalo Papali’i Pisimaka, fa’apea le nofo-ā-alo; Ae a le pa’ia maualuga o Samoa ua potopoto i ona tulaga fa’alupe;
Ou te fa’atalofa atu.
Ou te fa’afetai atu i le paia o le aiga mo lenei laolao taua, e momoli atu ai le fa’afetai ma le fa’amalo ale tatou Malõ i le tautua atunu’u, le tautua malo ua afu lelea, a le afioga ia Solialofi Tua’imalo Papali’i Pisimaka, ma ua iloga ona lagi soifua. E momoli atu malū i pu’ega ona ua le pa’au mai le afioga i le Tama’ta’i Palemia, ae o le a fai le leo o Tuala e molimoli le fa’afetai a le tatou Malõ. O le mau a Samoa, “E ui ina tele le ulu niu, ae iloga niu o le fīliga. E ui foi i le ‘auaoa o le lagi i ona po tu’utu’u loloa, ae iloga fetu pupula e ta’ita’i ala”. E mafua i se a? E mafua ona e iloga Solialofi.
Na amata le tautua a Solialofi i le tausaga 1968 o se tama’ita’i Tausi Soifua i Falema’i i Moto’otua. I le tausaga 2000 – 2007 sa avea ai o ia ma Peresetene o le Asosi o Tagata Faigaluega a le Malo (PSA). I le avea ma Peresetene o le Asosi a Tama’ita’i Tausi Soifua a Samoa, se ia o’o ina fa’amanavaina e le Atua lana tautua. Ua matua le tautua, ma ua tautalaaso le 56 o tausaga o le soifua galue o Solialofi i le Malõ ma le atunu’u i le auaunaga fa’asoifua maloloina. Amuia lea ‘auauna ua vala’auina e lona Matai-ae o lo’o faapea lava ona fai le soifua galue”.
Ou te taofi o lo’o afifio mai i lenei sauniga nisi o pa’aga totino a le afioga i le Peresetene ua tu’umalo nei, e latou te silafia lelei le sailimalo o Solialofi mo Tausi Soifua i le fonotaga ale Samoa National Tripartite Forum. E le gata mo Tausi Soifua, ae fa’apea fo’i mo tagata faigaluega uma o le atunu’u. O lana mau, ‘ia ola soifua maloloina ma manuia tagata uma.”
E le o po pe lilo i lenei sauniga, o le soifua maloloina, o se tasi lea o
fa’amuamua tupito a le tatou Malo. Aua o le fatu lea o so’o se taumafaiga mo le atina’e manuia o le atunu’u. E ao ona soifua maloloina ona tagata, ma ia a’oa’oina lelei. Ae fa’amoemoe, i le ‘au’aunaga a ali’i ma tama’ita’i foma’i ma tausi soifua lea fa’amuamua a le tatou Malo.
I le tele o nei tausaga sa auauna ai Solialofi o se Tausi Soifua, e le taumate le tele o lona sao e vanivani ma tapu’e le soifua auauna o ali’i ma tama’ita’i o lo’o tauaveina lenei ‘au’aunaga taua mo le soifua maloloina.
O le tautua a Solialofi i le atunu’u, na fa’apaleina i le 2023, ina ua fa’ae’eina atu iai e le tatou Malo le Pine Taualoa o le Ofisa o Polo’aiga a Samoa (Officerof the Order of Samoa). O le fa’aaloalo maualuga lea a le Malo o Samoa, e amana’ia ai le sao ua iloga, ma ta’uleleia mo Samoa o se tagataa-nu’u Samoa, atoa ai ma le filigā i so’o se taumafaiga mo le atunuu ma le va i fafo.
O le ala lea e le itiiti ai le agaga fa’afetai a lo tatou Malo, i le soifua auauna o le afioga ia Solialofi. Ua fa’amalo tautua matavela, ua malie mata i va’ai, malie taliga e fa’alogo, ua malie ma le lautua o le loto. Ou te taofi, o lona soifua auauna, o se mea’alofa mai le Atua mo Samoa, ma le ‘au’aunaga fa’asoifua maloloina.
O le tatalo ale Malo, ia so’oso’o fau le tautua a Solialofi. E le gata i le nofo-a-alo, ae fa’apea fo’i i tupulaga o Samoa, e fia ofoina le soifua ‘au’auna e avea ma Tausi Soifua.
Fo’i ia le tinā e tofā i lona tu’ugamau, ae mapu atu lona agaga i aao o lo tatou Atua, seia o’o i le aso e ilia ai le pu fa’auma, ma le ‘alaga o le manumalo. A o ana galuega e mulimuli atu ia te ia, ma e manatua pea.
Le paia o aiga, ma le nofo-a-alo, fa’afetai tele mo nei tausaga e tele sa outou tu’itu’i malofie ai, ma seu i faleva’ai, a o seu i falemua le afioga ia Solialofi, auā lana tautua isi o tatou atunu’u.
Tatou loto tetele pea, ma fa’amafanafanaina e le Agaga o le Atua le nofo-a-alo, o aiga, o paolo ma gafa. Tatou te le fa’anoanoa fa’apei o e ua leai se fa’amoemoe. Aua o Iesu Keriso o le Ali’i o le Toetu. O lo tatou ala i le manuia e fa’avavau.
O lea ua folau Solialofi e tofā i lona tu’ugamau, a o tatou, e i ai foi le aso ua tapenaina e le Atua, e mānava ai a tatou galuega i le ola nei.
Ia manuia lau Susuga i le Ta’ita’i o le Sauniga ma le paia o lenei
fa’alapotopotoga.
SOIFUA MAI IA MANUIA
Ata Pueina – Malo o Samoa (Pesetā Tusiga Taofiga)
