Ou te manatu o le a ou le toe afea le tumutumu o le faleselau, aua ou paia faalupe ma ou mamalu sausaugata Samoa, o lele ua maea ona fola I lumamea e le fofoga o le tatou taeao, taoto laia faa ia o le tai loloto, e le toe auafagaina e se matou tala, aua o lele ua taoto ao se ala ua oo.
Ae ua faafualalaga se matou leo, e fai ma sui o le Taitaifono, le Komiti faafoe ma le Pulega a le Lakapi Samoa, e faaleo atu ai le agaga Faafetai e tusa male tatou mafutaga I lenei taeao matagofie. O le taeao totoa, o le taeao ua manino, o le taeao, na atofa e le Atua tatou te patipatia ai le aulia mai ole 100 tausaga o lau lakapi..o le lakapi a le atunuu, o le lakapi a Samoa atoa.
Ua maea ona tapa tulia I le tata, ma ua faafofoga le lagi I le feau mai le Atua ua manavaina e le taitai o le sauniga, ou te manatu ua nofo fale ia satui a maa I loto ma finagalo oi tatou uma. Faamalo faafetai mo timaiga ma faamanuiaga.
E i ai le manatu e manusina le soa le saunoaga a lau Afioga I le sui Palemia, e le taumate o le tofa faalele foi lea aua le Afioga I le Ao Mamalu o le malo, le sui ao, le tamaitai Palemia ma le Kapeneta, le Palemene, le Faamasinoga ma Samoa atoa. O lau lauga, o le lauga foi lea a Lakapi a Samoa, ta seelua I lou sa..tulou
Tau lava ina matou fono faapipii ma faapea atu, se Ua faamalo faalaeiau, o lea ua pau le susuga ma ua e tofa faatoeaina, ua e saunoa faataitai, ua e tomatau faatama, e momoli le faafetai ma le faamalo e tusa ai ma galuega a lau Iuni Lakapi I le 100 tausaga ua mavae.
Matou te Faafetai faapitoa I le malo o Samoa I lau lagolago faifaipea ua mafai ai ona ausia ni matatia se tele ma iloa ai si o tamai atunuu, I itu e fia o le lalolagi ona o lau lakapi. O le mea moni e le mafai ona manuia a matou taumafaiga pe ana le seanoa le tuuina mai o le tauau a le tatou faigamalo. Faamalo faafetai
FAIFEAU
E le faagaloina le aifagaluega totofi a le Atua I soo se fata faitaulaga, I Samoa nei ma atunuu e mamao, Se Ua tafe tino i vai, le mana o a outou talosaga.. E lē mafai ‘ese ‘upu molemole ona fa’alanuina, la outou galuega fita. Fafetai tele lava
LUITAU
E le natia le tele o ni luitau o loo feagai pea ma lau Iuni Lakapi, e pei ona faasalalauina.
Matou te asu atu vaimalu ma faamalulu atu Samoa, pe o le a foi sa outou maitau mai, I se matou tautua ua le au, ma ua le tau I sau silasila, ia malu avei fale I so outou finagalo malamalama. O le mea moni, o loo faatino lava galuega uma I le mea e gata ai le mafai, ma faamoemoe I le fesoasoani mai a le Alii…
Ae matou te faafetai I la outou tuualalo, o ni faasea ma ni faitioga, e aoga tele, aua o le tatou sa e fautele.
O se matou tautaulemau, o lau Lakapi e tua atu ia te oe Samoa, E malu atu ia te oe ma lau faatofalaiga,
Aua o ai ea matou te tua I ai I itula ma ituaso faapenei.
O upu a le atunuu, a ua sala uta, ia tonu tai,
A ua vale utumua, ia tali utumuli..
Aua o loo silasila le Atua, o ia e atoa ai mea uma.
May I also specially acknowledge our family of sponsors. We would be remiss not to extend special mentions to you all, our past and present sponsors and partners. Your tremendous support and contribution has been instrumental in our success. Faafetai tele lava..
May I again specially acknowledge World Rugby, the Hon Chairman of the Board, I lau Afioga Tootoo o Tumua Sir Bill Beaumont and your Directors. May I particularly mention here Mr David Garridy and your team, The celebration of our 100 years today is also a recognition of the World Rugby efforts to promote and develop the Game of Rugby in our small island country. We thank you for your guidance, and all that you have done for Samoa and its Rugby. Faafetai tele lava and I wish you well.
Muliai se matou faafetai Ia latou uma ua Malaga mamao mai, (aemaise lava sui Tuai o lau Manu samoa ma o outou aiga) tatou te auai faatasi I lenei faamoemoe, ua tuua lava o outou tiute tauave ma valaauina ona o lo outou talia o se matou faatalauula atu, ua maualuga ma matagofie ai mea uma..please enjoy your return to our beautiful Paradise and wish you well when you return home.
Faatai ma se matou leo, ia alofagia e le Atua lau susuga I le taitai ole sauniga, ia maua le tofa faaleatua mo ia ma lana galuega,
Ia faaaupegaina e le Atua lau Afioga I le Sui Palemia I lona sosia ma lona agalelei aua tiute tauave.
Ia to mai I le lagi ni manuia aua Samoa Atoa aemaise lana Lakapi ma lana faamoemoe I lenei vaiaso atoa,
Tatou Talosia le alofaiva a lau Manu Samoa aua lana taaloga ma Toga I le faaiuga o le vaiaso..
Ia ae maloloina le leo o Safotulafai I lona alofa a lona agalelei
Soifua
Ata Pueina – Malo o Samoa (Pule Puleina)
