(OCTOBER 4, 2024)
Lau Susuga ile Taitai ole Sauniga
Lau Afioga ile Sui Palemia o Samoa
Afioga i Minisita ole Kapeneta ma Minisita Lagolago
Faauluuluga o Matagaluega ma Faalapotopotoga Tumaoti ole tatou Malo
Ma le mamalu ole tatou mafutaga i lenei afiafi
Folasaga
Manatu o lea ua paega laulelei lo tatou afiafi ma le aso nai fatu-mati’e. Fatufatu siliga fo’I nai manu nai o le tuli le lologo o le mauga o ao. Ina o lea ua faamanusisina le tautiaga nai i le vasa. Ma ua tafatu seuga fo’i le papa faasau i mulifanua o Savaii ma Aana, ae fa’atu i Upolu e tu lalata i Muliava. A’o le Aga’e i tai & Aga’e i uta faimai e A’a i muli i Fitiuta o paia na o lenei taeao na liugalua. Mai le Malaetele o le Tuimanu’a seia paia le faga tele na tauilo ai manu o malo….Tulou Tulouna lava.
O lea ua maea ona momoli fau o malo aua le Atua mo lona finagalo e pei ona fitaituga ai le Susuga ile Faafeagaiga, Ia tau ia ina ia togi pa tau le ave i le faafofoga a le Matai le taulaga ua siitia. E momoli ai le faafetai tele I lau Susuga ile Faafeagaiga mo le tapenaga. Ia saga faamanuia le Atua, aua nei puupuu fue-afa o lou fuesina aua le galuega ua totofi ai le soifua.
Mafuaaga & Faamoemoe
O lea ua tatou iai i lenei tauafiafi sei o tatou patipatia ma faafetaia le alofa o le Atua ua afua ai lenei faamoemoe, o le ausia lea e le tatou malo e tauala atu ile Auaunaga o Vaa a Samoa lenei Tusi Pasi Tauoloa Faavaomalo (International Standards Organization Certification).
O lenei Tusi Pasi ose faailo o le mautu o taiala ma faigafaavae (Quality Management System) o loo limataitaiina ai galuega faatino a le Auaunaga o Vaa a Samoa. E pei ona faamaonia (endorsed) e le Faalapotopotoga Suetusi faavaomalo mo Taiala o le British Standards Institution (the World’s first standards Body & Founding Member of ISO)
O le ISO Certification o se tasi o galuega a le Auaunaga o Vaa oloo i totonu ole Fuafuaga Autasi (Sector Plan) a le Vaega Maoti o Galuega, Felauaiga ma Atinae Eseese 2023-2028. I lalo ole manulauti ole faamalosia o le usitaia o taiala faavaomalo ma faalotoifale o le faatinoina o galuega. Oloo faamauina foi i le Fuafuaga Autasi a le Auaunaga o Vaa (Corporate Plan 2025/2027) e pei ona amata faamamaluina mai ia Iulai o le tausaga nei.
O se matati’a taua tele ua ausia aua o le a mausali atili ai le faatuatuaina o le Auaunaga o Vaa a Samoa i ana faigapaaga faapisinisi faavaomalo (foreign business partners) e pei ona iai ana matafaioi.
Ole upu moni, o le a amanaia e ana paaga faalotoifale (local stakeholders) galuega faatino ona ua mautinoa oloo faatino lava galuega i faigafaavae ma taiala mautu. O le a atagia ai foi faigamalo lelei (good governance), o le manino ma malamalama le faatinoina o ana faaiuga (accountability and transparency) e pei ona iai manulauti a le tatou malo.
O le a fesoasoani foi lenei Tusi Pasi e tali atu ai i nisi o Vaega Faamuamua o Taiala mo le Lumanai Manuia o Samoa (Key Priority Areas ole Pathway for the Development of Samoa)
1. Faatupulaia ma le Atina’eina o Pisinisi – Business Innovation & Growth
2. Siitia Avanoa Faigaluega i Atunuu i Fafo – Increased Labour Mobility
3. Faamausali le tulaga ole Tamaoaiga – Macroeconomic Stability
Faatupeina
E lua (2) vaega o lenei galuega o le Vaega muamua (Phase 1) na amata mai ia Mati 2023 ia Iulai 2024 ma sa faatautaia e le Consultancy Firm a le Scarab Systems Limited, New Zealand i lona tau SAT$68,223.09.
O le vaega lona lua o lenei galuega (Phase 2) o le final Audit lea sa faatinoina e le British Standards Instituion mai Ausetalia, ma faamae’aina ile Aso 16 Setema 2024 i lona tau aofai e SAT$22,092.26. ma sa faatupeina lava e le tatou malo e tauala atu ile Auaunaga o Vaa a Samoa.
Upu Faaiu
Ua faamauina ai e tusa ma molimau o nei Faalapotopotoga Faavaomalo sa faatinoina nei galuega. O le Kamupani Vaa (Shipping Agent) muamua lenei i totonu o Samoa ua ausia lenei Tusi Pasi Tauoloa (ISO Certification).
E momoli atu le faafetai ile Taitaifono ma le Komiti Faatonu, Pulega ma le Aufaigaluega Auaunaga o Vaa ile faatinoina o lenei galuega taua, aemaise o galuega ua faataoto e lo tatou malo i ana fuafuaga mo le manuia o Samoa.
Ia alo i outou faiva ia maua se ’ai o lenei Tusi Pasi ma ia atagia ai lenei faamoemoe ae sili ona viia ai le Atua.
Ia alofa mai le Atua i lenei afiafi ma le faamoemoe, ma ou te fiafia e faasilasila atu ua talia aloaia nei e le tatou Malo e tauala atu ile Auaunaga o Vaa lenei tusi pasi tauoloa.
Faafetai. Soifua ma ia manuia.
Ata Pueina – Malo o Samoa (Leaosa Faaifo Faaifo)
