(ASO TOFI, 17, 2024 @ 1:00 PM – NIUVAI, TUFULELE)
O lea ua molia i le nofoalii o Lē Paia e faavavau, la tatou taulaga o le faafetai ma le viiga, e pei ona osia e lau Susuga i le Alii Sea – Rev. Fonofa’avae So’oalo. Tatou te molimau faatasi, o le pule faasoifua a le Atua, ua fatu lē gāe’e ai lo outou soifua laulelei ma so matou ola, ma tau ai i fuga o matagofie lenei aso ma le faamoemoe. Ia foi lava le viiga ia te ia, e lē aunoa. Ou te faatulou i le paia o le aufaigaluega totofi a le Atua i le afioaga nei.
E faatulou atu i le paia maualuga o Niuvai. E afio ai lau afioga i le Toetaufanua o Tulafale e fia a le Malietoa, lau afioga Luatuanu’u. E afio ai le uso ia Fatitaua’i ma Usoalii, afio le Matua. E alalatai ai le Gautāala ma le Si’uolefanua. O paia o le Itumalo aua le afifio o Aiga e tolu, Afifio Maopu, Alo Sina ma Alo o Malietoa. E pola puipui e le fetalaiga a Luatua ma le Gautāala, Le Faletolu, ma le Si’uolefanua. Faamalo le soifua manuia.
Afifio mai le aiga Kapeneta ma le mamalu ua tatou aofaga potopoto i lenei aso. Ou te faatulou atu.
O tala fa’amau gagana o ou vaifanua, i le folauga mai Salafai, na numia ma le li’a, sei tali le aso o le Tupu. Na gāfoa ai le ata, ma tofutofu ola ai alii ina ua ifo le fa’anu’upo, ae foe lava pese le malaga. Ou te iloa o loo pine i Niuvai nei, suafa o Pa’iatea ma Pa’ialala. E mafai ai ona faapea, o eleele faamanuiaina, o laufanua e mapu i ai le ua tigā, ma le fa’asuaga o folauga saogalemu.
E faapena le agaga o lenei aso i lo tatou auai mai, e molimau ma paitpatia le tatalaina o lenei galuega ua mae’a, sa fitaituga i ai le afioaga nei. O le toe atinaeina o le vai faamālū, atoa ai ma le maota mo tinā ma tupulaga talavou o Tufulele.
O le soifua atinae ma le taunapo e aputiputi a tatou alagāoa mo le lumanai manuia o Samoa, o lo tatou faiva e soa faatasi. Aemaise lava i lo tatou i ai i tulaga ma’aleale o suiga ogaoga o le tau ua aafia ai le lalolagi, ae aupito sili ona afaina ai atumotu laiti e pei o Samoa. O le u’unaia o atina’e anagatā, ma le matimatiina o galuega mo le soifua manuia o le atunuu ma ona tagata, o le ute lea o faamuamua a le tatou Malo i lana Fuafuaga mo le Atinae o Samoa. E pei ona i ai le tatou atinae o le miliona Tala mo Itumalo. Atoa ai ma le u’unaia o sootaga ma faiga paaga vavalalata ma atunuu ma faalapotopotoga o loo fesoasoani mai, o le Vaega Tumaoti ma pisinisi, e galulue soosootauau ma le Malo, o Nuu ma Afioaga i le fausia o atina’e anagatā.
Ou te talitonu o se tasi lenei o atinae o loo pine ai le tāua o le lalago faatasi o polokalame a le tatou Malo, o Faalapotopotoga fesoasoani mai, ma le mapo o le tōfā ma faatautaiga a le pulega mamalu a alii ma faipule, o le sao o tina ma tamaitai, le malosi o le nuu, ma ana tama fanau e ‘opogi ma vanivani le atinae o Tufulele.
O lea ua o tatou molimauina le toe fausia atoa o le vai o le afioaga. O le punāoa e le gata e i ai lona talaaga faaleaganuu, a o le aseta e tua iai le Nu’u i aso o lāmala, ona o fesuiaiga o le tau. E faapena foi i le atinae o le maota mo tina ma tupulaga talavou, e tua i ai atinae mo tamaitai ma le lumanai o le nuu ma le itumalo.
E avea ai lenei laolao ou te momoli atu ai le faafetai a le tatou Malo i le afioaga. Faamalo le galulue, faafetai le faatoatoa, ma lo outou pulunaunau e fausia atinae mo le afioaga ma ona tupulaga lalovaoa. O lea foi e māua o le a tatala lenei atinae mo le mamalu o le atunuu, aemaise o i latou e tafafao mai maimoa mai i fafo, e faaaoga. O itu taua ia, e faalauiloa ai si o tatou atunuu, o la tatou talimalo, ae maua ai seleni ma galuega a o tatou tagata.
Ia faamanuia le Atua i lenei atinae. Ia avea o se punaoa e tua i ai le nuu ma le itumalo. Ia avea foi ma faamanatu i tupulaga o le nuu ma le itumalo, ina ia galulue punoua’i e faaaoga taleni ma agavaa ua foai mai e le Atua, e atinae ai nuu ma afioaga. Ia manuia lau afioga Luatuanuu ma le afioaga o Tufulele. Ia manuia le aufaigaluega totofi a le Atua, aemaise o lenei potopotoga
Soifua ma ia manuia.
Photo by the Government of Samoa (Leota Marc Membrere and Leaosa Faaifo Faaifo)
